Փաստ ինֆո

«Կամք»-նախաձեռնության հիմնադիր Վահագն Չախալյանի կարծիքով Ստամբուլյան կոնվենցիայի վերաբերյալ Վենետիկի հանձնաժողովի գնահատականն սպասելի էր։

«Արդեն 40-րդ օրն է, ինչ արդարադատության նախարար Ռուստամ Բադասյանը հայտարարեց, որ սպասում են Վենետիկի հանձնաժողովի պատասխանին, եթե մենք չսպասեինք, որ Վենետիկի հանձնաժողովը դրական պատասխան է տալու, մենք կդադարեցնեինք պայքարը։ Պարզ է, որ ԵԽ-ին կից կառույցը ԵԽ-ի կողմից պարտադրվող փաստաթղթին չի կարող դեմ խոսել»,-«Փաստինֆո»-ի հետ զրույցում ասաց Վահագն Չախալյանը՝ անդրադառնալով Վենետիկի հանձնաժողովի գնահատականներին։

Հիշեցնենք, արդարադատության նախարար Բադասյանը դիմել էր Վենետիկի հանձնաժողովին՝ խնդրելով կարծիք տրամադրել «Կանանց նկատմամբ և ընտանեկան բռնության կանխարգելման և դրա դեմ պայքարի մասին» ԵԽ կոնվենցիայի՝ Ստամբուլյան կոնվենցիայի սահմանադրական ազդեցության վերաբերյալ։ Հանձնաժողովը, հիշեցնենք, Եվրոպայի խորհրդի սահմանադրական հարցերով անկողմնակալ մասնագիտական կարծիք տրամադրող կառույցն է։
Արդարադատության նախարարության հրապարակած հաղորդագրության համաձայն, 120-րդ լիագումար նիստին Վենետիկի հանձնաժողովը հաստատել է ՀՀ Սահմանադրության վրա Կանանց նկատմամբ և ընտանեկան բռնության կանխարգելման և դրա դեմ պայքարի ԵԽ կոնվենցիայի սահմանադրական ազդեցության վերաբերյալ կարծիքը։ Նախարարությունը հանձնաժողովի կարծիքը դեռեւս չի հրապարակել։

Լրատվամիջոցների փոխանցմամբ, հանձնաժողովը նշել է, որ Ստամբուլի Կոնվենցիան չի պարունակում որևէ դրույթ, որը հակասում է ՀՀ Սահմանադրությանը: Ըստ հանձնաժողովի, Կոնվենցիայի հիմնական գործառույթը կանանց հանդեպ բռնության կանխումն է։

Չախալյանը շեշտեց, որ Վենետիկի հանձնաժողովը խորհրդատվական կառույց է եւ ամենեւին պարտադիր չէ առաջնորդվել նրա խորհրդով. «Մենք հակված ենք , որ ժողովրդի անունից խոսող, ժողովրդավարության արդյունքում իշխանության եկած ուժը չի կարող ժողովրդի կամքին դեմ գնալ»։
Վահագն Չախալյանը չի բացառում , որ անհրաժեշտության դեպքում «Կամք»-ը կդիմի նաեւ փողոցային պայքարի. «Մենք հայտարարել ենք, որ Սահմանադրությամբ եւ օրենքների շրջանակում մեզ տրված բոլոր միջոցներով պայքարելու ենք, բոլոր միջոցներին դիմելու ենք, մեր սահմանադրական իրավունքն իրացնելու ենք, որեւէ բան չեմ բացառում։ Ամեն դեպքում, հակված ենք մտածել, որ իշխանություններն ու ԱԺ-ում եղած քաղաքական ուժերը կանսան ժողովրդի կամքին»։

Չախալյանը միեւնույն ժամանակ նկատեց, որ արդարադատության, աշխատանքի եւ սոցիալական հարցերի եւ առողջապահության նախարարությունները, ինչպես նաեւ Հանրային հեռուստաընկերությունը ակտիվորեն լծված են Ստամբուլյան կոնվենցիայի լոբբինգին։ Նրա խոսքով, սա վկայում է այն մասին, որ իշխանության մեջ կան ուժեր, որոնք ունեն պարտավորություն եւ ցանկանում են, որ կոնվենցիան վավերացվի։

«Մենք պայքարը չենք դադարեցրել։ Այսօր ընդդեմ Ստամբուլյան կոնվենցիայի ստորագրահավաքի 89-րդ օրն է։ Հոկտեմբերի 18-ին՝ «Կամք»-ի մեկամյակին կներկայացնենք մեր հետագա անելիքներն ու ծրագրերը»,-եզրափակեց Վահագն Չախալյանը։

Աղբյուր` Փաստինֆո