Փաստ ինֆո

Կյանքի լարված ռիթմը և ֆիզիկական գերծանրաբեռնվածությունը հաճախ ողնաշարում առաջացնում են փոփոխություններ։ Ողնաշարի դեգեներատիվ փոփոխության հետևանքներից մեկն էլ օստեոխոնդրոզն է, որը հանդիպում է հասուն բնակչության գրեթե 50 տոկոսի մոտ՝ առաջացնելով ցավեր, մկանային լարվածություն։

«Ողերի միջև գտնվող աճառային հյուսվածքը, աճառային սկավառակը հանդիսանում է էլաստիկ հյուսվածքային գոյացություն, որն ապահովում է ամորտիզատոր ֆունկցիան, այսինքն՝ միջողային տարածության էլաստիկ շարժունակությունը, դինամիկան։ Բնականաբար ինչ-ինչ պատճառներով դրա վնասումը կարող է բերել ողնաշարի սաստիկ ցավերի, այսինքն շարժումների սահմանափակման, ինչպես նաև եթե ունենք աճառային հյուսվածքի փոփոխություն, բնականաբար այն դառնում է ավելի փխրուն և խոցելի»,-«Փաստինֆո»-ի հետ զրույցում ասաց «Սիրմեդ» բժշկական կենտրոնի նյարդաբան, բուժական գծով փոխտնօրեն Անահիտ Ոսկանյանը։

Նա ընդգծեց, որ ամենակարևորը տարբերակիչ ախտորոշումն է, որից հետո հիվանդի հետ անամնեզի քննարկումը. «Անամնեզը բավական կարևոր է՝ որոշելու խնդիրն ինչքան ժամանակ է, ինչպես է դրսևորվում։ Այնուհետև նյարդաբանական ստատուսի ստուգումն է բավականին կարևոր։ Ստուգում ենք ռեֆլեքսները, զգացողությունը՝ մակերեսային և խորանիստ, ինչպես նաև ողնաշարի շարժունակությունը»,-ասաց Անահիտ Ոսկանյանը։

Իհարկե բժիշկները ողնաշարում կատարված փոփոխություններն ամբողջությամբ վերացնել չեն կարող, սակայն արդյունավետ բուժման միջոցով նպաստում են, որ երկար ժամանակ հիվանդների խնդիրը գլուխ չբարձրացնի և սրացումներ չլինեն։

«Մեր կենտրոնում բուժումը կազմակերպվում է բավականին համակարգված, ինչպես նշեցի խմբային աշխատանքով և բնականաբար արդյունավետությունը բավական բարձր է։ Հիմքը դրվում է ոչ միայն այդ պահին հիվանդի մոտ գտնվող գանգատների սիմպտոմների լավացմամբ կամ վերացմամբ, այլ փորձում ենք երկարատև, ռեմիսիոն լուծում տալ խնդրին։ Ֆիզիոթերապևտիկ բազմաթիվ միջամտության տարբերակներ ուենք՝ նույն հարվածալիքային թերապիան, ինտերֆերենցիոն թերապիան, որը բավականին արդյունավետ է։ Ունենք նաև ողնաշարի ձգման սարք, որը բավականին արդյունավետ է ճողվածքների դեպքում։ Այս դեպքում հաշվի են առնվում բոլոր հակացուցումները։ Ունենք ողնաշարաբան և մանուալ թերապևտ, կինեզիստ, որը բուժական ֆիզկուլտուրայի, մերսումների, այսինքն բուժական միջամտությամբ օգնում է խմբային, համակարգված բուժմանը»,-նշեց նյարդաբանը։

Եթե օստեոխոնդրոզը շուտ չախտորոշվի և չլինի բժշկական միջամտություն, ապա ժամանակի ընթացքում ողնաշարում կառաջանան ավելի լուրջ խնդիրներ, որոնց հետևանքով կարող է փոխվել անգամ Ձեր կեցվածքը, ինչն էլ ուղղակիորեն բացասաբար կազդի Ձեր կենսակերպի վրա։ Բժիշկները չեն կարող հստակ որոշել մարդու կյանքի տևողությունը, սակայն նրանք կարող են բարելավել կյանքի որակը։ Իսկ դա նշանակում է, որ առաջին իսկ ախտանիշների դեպքում անմիջապես պետք է դիմել բժշկին։

Աղբյուր` Փաստինֆո