Փաստ ինֆո

«Ընդհանրապես, ցանկացած դեպքում, մեկ անձից գնման գործընթացը ռիսկային է, այդտեղ կասկած չկա, բայց դա նաեւ չի նշանակում, որ ռիսկն իրականանում է»,-«Փաստինֆո»-ին ասաց «Թրանսփարենսի ինթերնեշնլ» հակակոռուպցիոն կենտրոնի  ծրագրերի ղեկավար Վարուժան Հոկտանյանը` անդրադառնալով կառավարության՝ հոկտեմբերի 10-ի որոշմանը, որով  վարչապետի աշխատակազմին հատկացվեց 48 միլիոն 900 հազար դրամ` մեկ անձից գնման տարբերակով գովազդային ծառայություններ պատվիրելու համար:

Հիշեցնենք, միջոցները տրամադրվել են կառավարության պահուստային ֆոնդից՝ «Հայաստանի վերափոխման ռազմավարություն 2050»-ի տեսլականի ուղերձները հանրությանը ներկայացնելու եւ ցուցապաստառների տպագրության ու գովազդային ծառայությունների ձեռքբերման նպատակով։ «Փաստինֆո»-ն տեղեկացրել էր, գովազդային ծառայությունը կառավարությունը «Անտարես»-ին է պատվիրելու։ Ընդհանուր ռազմավարության գծով վարչապետի խորհրդական Լեւոն Մազմանյանը մեզ փոխանցել էր,  որ  «Հայաստանի վերափոխման ռազմավարություն 2050»-ի մշակման աշխատանքներն  ընթացքի մեջ են ու կավարտվեն մոտ մեկ ամսից, բայց ռազմավարության ուղերձների հանրահռչակումն արդեն կառավարությունն սկսել է։ Մասնավորապես, քաղաքի տարբեր հատվածներում բիլբորդեր են տեղադրվել՝ «Հայաստանը իմ օջախն է, ժողովուրդն իմ ընտանիքն է» գրառմամբ։
 
Տեղեկացրել էինք, որ դեռ հոկտեմբերի 4-ին, վարչապետ Փաշինյանը իր Ֆեյսբուքի էջում վերը նշված բիլբորդի մի լուսանկար էր հրապարակել՝ կից գրառմամբ. «Երեւանում եւ ընդհանրապես՝ Հայաստանի Հանրապետությունում, ՀՀ տարբեր քաղաքացիների ձեռքով գրված»։ Այս փաստը վկայում է այն մասին, որ մինչեւ կառավարության համապատասխան որոշումը, որը կայացվեց հոկտեմբերի 10-ին եւ որով վարչապետի աշխատակազմը  48 միլիոն 900 հազար դրամ ստացավ եւ թույլատրեց մեկ  անձից կատարել գնումը` բիլբորդերի տեղադրման ծառայությունն արդեն իսկ մատուցվել է, մինչդեռ , վարչապետի աշխատակազմը, տեսականորեն, որեւէ երաշխիք չպետք է ունենար, որ կառավարությունն այդ հատկացումը տրամադրելու է եւ հաստատելու է մակ անձից գնման տարբերակով ծառայության ստացումը։
 
Վարուժան Հոկտանյանի խոսքով, մեկ անձից գնման ձեւով գնումների կատարման պրակտիկան, ինչպես նախկինում, այժմ էլ շարունակվում է եւ ինչպես նախկինում, այնպես էլ հիմա՝ որպես հիմնավորում նշվում է միայն անհետաձգելիության հանգամանքը՝ առանց փակագծերը բացելու։
 
Փաշինյանի կառավարության «նոու հաու»-ն ու 48 միլիոնանոց բիլբորդերը

«Նախկինում էլ էին այդպես ասում, հիմա էլ, դժբախտաբար պրակտիկան չի փոխվել ՝ դնում են անհետաձգելիություն, բայց անհետաձգելիության հիմնավորումը չեն տալիս։ Դա մի քիչ հումորով եթե ասենք՝ հին ադաթ է, որքան մենք գնումների համակարգն ուսումնասիրել ենք, որպես կանոն,  Սերժ Սարգսյանի ժամանակ էլ էր այդպես արվում ։ Օրինակ, ձմռանը պետք է մեկ անձից ասֆալտապատման ծառայություն գնել եւ ասել անհետաձգելի է , ձյունը պետք է գա, նո՞ր ասֆալտ անեն։ Դա ծանոթ երեւույթ է»,-ասաց Հոկտանյանը։

Թեեւ «Թրանսփարենսի ինթերնեշնլ» հակակոռուպցիոն կենտրոնը  2017 թվականի սեպտեմբերից այլեւս գնումների մոնիթորինգով չի զբաղվում, բայց  Վարուժան Հոկտանյանի խոսքով, լրատվամիջոցներից կամ իրենց հետ համագործակցող ՀԿ-ներից, մասնավորապես, Գնումների մասնագետների  հայկական ասոցիացիայից, տեղեկանում են, որ պրակտիկան շարունակվում է։

«Փաստինֆո»-ին, հիշեցնենք, վարչապետի խոսնակ Վլադիմիր Կարապետյանն ասել էր, որ  ամեն ինչ «արվել է օրենքի տառին համապատասխան, եթե օրենքի տառին համապատասխան է արվել, այդ դեպքում լրացուցիչ մեկնաբանության կարիք չկա», թե ինչու է ծառայությունը պատվիրվում մեկ անձից գնման տարբերակով։

Ըստ Հոկտանյանի, երկու խնդիր է ստացվում ՝ առաջինը, անհետաձգելիության հիմնավորումը, որը չկա եւ դժբախտաբար, օրենքը չի ստիպում ներկայացնել այդ հիմնավորումը եւ երկրորդ, հետին թվով որոշման կայացման հնարավորությունը։

«Այո, կոռուպցիոն ռիսկեր կան, բայց սա ռիսկ է, ոչ թե դրսեւորում, որովհետեւ ցանկացած գործընթացում կոռուպցիոն ռիսկ կարելի է տեսնել»,-նշում է Վարուժան Հոկտանյանը։

 Ըստ նրա, վարչապետի աշխատակազմը կարող է ասել, որ կառավարության որոշումից առաջ տեղադրված վահանակները տվյալ կազմակերպության հետ կնքված  պայմանագրի շրջանակներում չեն տեղադրվել։ «Ինչ-որ  մի բան կգտնեն, պետք է հասկանալ, թե ինչ է եղել իրականում, որովհետեւ հստակ պնդել, որ հենց այդ կազմակերպության հետ է  եղել,   այսինքն, որոշումն ընդունվել է հետին թվով, ռիսկային է, պետք է ուսումնասիրվի։ Չեմ հավատում, որ այդքան պրիմիտիվ լինեն նման քայլ անելու համար։ Հնարավոր է՝ մի գավառական կամ ոչ գավառական խորամանկությամբ  կարողացել են դա շրջանցել, բայց չեմ կարծում, որ այդքան «ափաշքյարա» լինի։ Պետք է հասկանալ, թե ադ ռիսկը որքանով է ակտուալիզացվում եւ որքանով է տեղի ունենում կոռուպցիոն հանցագործությունը, որովհետեւ ռիսկ կա, որ ես կարող եմ պետավտոտեսուչին կաշառք տալ, բայց դա չի նշանակում, որ ես տվեցի կաշառքը, այստեղ էլ կարող է նույն իրավիճակը լինել, ռիսկը բնականաբար կա, բայց չի բացառվում , որ այն չի իրականացվել»,-ասում է «Թրանսփարենսի ինթերնեշնլ» հակակոռուպցիոն կենտրոնը ծրագրերի ղեկավարը։

Նշենք, որ մայրաքաղաքում արդեն իսկ տեղադրված բիլբորդերի՝ վերը նշված ծառայության շրջանակներում ռազմավարության հանրայնացման մաս են, ըստ էության հաստատել է վարչապետի խորհրդական Լեւոն Մազմանյանը։ Հոկտեմբերի 11-ին «Փաստինֆո»-ի հրապարակած «Փաշինյանի կառավարության «նոու հաու»-ն ու 48 միլիոնանոց բիլբորդերը» հոդվածում  մազմանյանը ասել էր. «Բիլբորդերը, որ հիմա քաղաքում հայտնվում են՝ «Հայաստանը իմ օջախն է, ժողովուրդն իմ ընտանիքն է», առաջին քայլն է դեպի ռազմավարության հանրայնացումը»։ Նա նշել էր, որ վարչապետի աշխատակազմին կառավարության տրամադրած 48 միլիոն 900 հազար դրամի շրջանակում 5-6 ամսվա ընթացքում Երեւանի ու մարզկենտրոնների մայրուղիներին, ինչպես նաեւ Արցախում այլ գրառումներով եւս բիլբորդեր են տեղադրվելու։

Աղբյուր` Փաստինֆո