Փաստ ինֆո

«Խոսում են ինչպես 5 տարի առաջ, ինչպես 10 տարի առաջ գրեթե նույն մարդիկ՝ նույն բաները, շատ հաճախ նույնիսկ թվում է, թե զարգացումները նույնիսկ  զարգացում չեն, այլ՝ իմիտացիա»,-«Փաստինֆո»-ի հետ զրույցում ասաց Առաջին հետախուզադիվերսիոն ջոկատի հիմնադիր-հրամանատար, ազատամարտիկ Վովա Վարդանովը՝ անդրադառնալով Արցախի շուրջ ընթացող զարգացումներին։

Վարդանովի խոսքով՝ կարեւորը ոչ թե այն է, թե ինչ է խոսում «երկար վարսերով տղա  Ալիեւը», այլ այն, թե որոնք են մեր անելիքները։ «Աշխատել, հարկերը պարտաճանաչ մուծել, բանակն ամրացնել, որի համար հարկավոր է հարկերը մուծել եւ տնտեսությունը զարգացնել, կրթել ժողովրդին,  սա է մեր անելիքը, ոչ թե ժողովրդի «ռաբիս» շահերի  հետեւից քայլելը»։

Սահմանին հնարավոր սադրանքները Վովա Վարդանովը չի բացառում, ասում է՝ ռիսկեր միշտ կան։ «Եթե   2008 թվականի մարտի 1-ը հիշենք, ի դեպ, ես այդ ժամանակ Օպերայի վրանային քաղաքում էի, տղաներով վրան էինք խփել, այդ ժամանակ թուրքերը  առաջխաղացում արեցին, 2-3 դիրք  վերցրեցին, ինչը որոշակի դժվարություններով՝ առանց պայմանագրային զինծառայողներին օգտագործելով, միայն սպայական խմբերով ՊԲ-ն  դիրքերը հետ վերցրեց։ Նույն բանը եղավ անցած տարվա գարնանը, երբ մեզ մոտ հեղափոխական գործընթացը սկսվեց, թուրքերն իրենց դիրքերը առաջ տվեցին, , ճանապարհներ կառուցեցին եւ 2-3 կմ հեռավորության փոխարեն հայտնվեցին 400-500 մետր հեռավորության վրա։ Այդ չեզոք գոտուց հսկայական  տարածք իրենց վերահսկողության տակ վերցրին։ Մենք  օգտվե՞լ  ենք իրենց լարված իրավիճակներից, սխալներից, բնական է, որ օգտվել ենք»,-ասաց ազատամարտիկն ու հավելեց, որ բնական է՝ հակառակորդը միշտ փորձում է օգտվել ներքին խնդիրներից։

Վովա Վարդանովի խոսքով, ներքին քաղաքական զարգացումներն ու  պայքարը չպետք է վերածել խնդիրների, որոնց  լուծումները բարդ ու ցավոտ են լինում։ «Եթե այդպես չլինի, ոչինչ չի  լինի, որը բացասական կերպով կարող է անդրադառնալ մեր ապագայի կամ անվտանգության վրա։ Պետք է խելացի լինել եւ վերջապես հասկանալ, որ  անընդհատ հեղափոխություններով կամ հեղաշրջումներով չպետք է առաջ գնալ, պետք է հասկանալ, որ ոչ թե ռեվոլյուցիոն, այլ էվոլյուցիոն ճանապարհով  կարող ենք առաջ գնալ, որովհետեւ  ցանկացած հեղափոխական սկզբից աշխատում է ոչնչացնել նախորդներին։ Մենք,   սովետի նախկին տարածքում լինելով, լավ գիտենք 17-18 թվականները, 2-3 տարի տեւած քաղաքացիական պատերազմները, դրանից հետո երկու տասնամյակ տեւած ռեպրեսիվ քաղաքականությունը։ Միշտ այդպես է լինում, եթե դու կտրուկ  հեղափոխական լոզունգներով ես հանդես գալիս»,-ասաց Վովա Վարդանովը՝ հավելելով, որ ԽՄ տապալման մեջ մեծ դեր  խաղացին  Խրուշչովի հեղափոխական գործողությունները։ «Խրուշչովը չհասկացավ, որ երբ ինքը Ստալինին չսիրելով Ստալինին էր կպնում, ձեռքի հետ  նրա պատկերը պատից քերելով նաեւ պատն էր քանդում, որն  ի վերջո բերեց իր հայրենիքի տապալմանն ու ԽՄ  ոչնչացմանը։ Մենք պետք է մի քիչ խելացի լինենք, մեր  վտանգները ավելի մեծ են , քան ռուսական կայսրության կամ սովետի»։

Միեւնույն ժամանակ, Վովա Վարդանովը կարծում է, որ,  Նիկոլ Փաշինյանը «որոշ բաներ է ջարդում» եւ դա պետական մեքենային ձեռք չի տալիս. «Նա շատ խելացի է այդ առումով, եթե գեներալներ  է փոխում, զորամասեր  չի փակում, իսկ Սերժը Սարգսյանը փակել է զորամաս, որի հրամանատարը  ռոբերտական էր։ ԿԳԲ-ի սպեցնազը փակեց, որովհետեւ այն ղեկավարում էր Ռոբերտ Քոչարյանի անվտանգության պետի տեղակալը։ Փաստորեն, հիմա Նիկոլ Փաշինյանը ավելի խելացի է իրեն պահում՝ պայմանական ասած՝ ոչ հեղափոխական, քան Սերժ Սարգսյանը, եթե հեղափոխությունը դիտարկենք հներին ոչնչացնելը»։

Անդրադառնալով Ստեփանակերտ-Երեւան հարաբերությունների՝ երբեմն դրսեւորվող սրացումներին ու Արցախի ԱԱԽ նախկին քարտուղար Վիտալի Բալասանյանի հարցազրույցին, Վովա Վարդանովն ասաց, որ քաղաքականության մեջ մտնել չի ցանկանում, բայց նշեց. «Երբեք զինվորականը, որը կրակել է եւ  որի վրա կրակել են, տակտի զգացումով աչքի չի ընկնում։ Դա երեւի ինձ հետ զրույցից էլ է զգացվում։ Ցանկացած զինվորականի մեջ կա солдафонство , դա, ինչպես ես եմ ցուցաբերում, ցուցաբերեց  նաեւ Վիտալի Բալասանյանը։  Դա  ցուցաբերվեց նաեւ այն հայտարարության մեջ, որը ազատամարտիկներից կազմված կազմակերպությունն էր տարածել»։

Ըստ նրա, երբ քաղաքական պայքարը պատերազմի է վերածվում, նմանվում է խաղահրապարակի, որտեղ երեխաները խաղում են ու հանկարծ սկսում կռվել։

Անդրադառնալով Վիտալի Բալասանյանի հարցազրույցում բարձրացված մտահոգություններին, մասնավորապես Նիկոլ Փաշինյան-«Սասնա Ծռեր» հանդիպման վերաբերյալ, Վովա Վարդանովն ասաց, որ  ցանկացած մարդ կարող է վտանգ տեսնել այս կամ այն երեւույթի մեջ։ «Նման փաստը մեկի համար լուրջ պրոբլեմ է, որովհետեւ  նա գնահատում է՝ «Սասնա  Ծռեր» կուսակցության որոշ  անդամներ ՊՊԾ գնդի գրավման մասնակից են, մարդ էլ կա՝ այդտեղ որեւէ արտառոց բան չի տեսնում, որ  կուսակցություններից մեկը Հայաստանի ներկա ղեկավարի կողքին է ինչ-որ տոնակատարության ժամանակ։ Ես դրա մեջ կատաստրոֆա չեմ տեսնում։ Կարծում եմ, որ ճիշտ կլինի դատը գնա այնպես, ինչպես գնում է։ Մի քիչ ավելի տեմպ տալը ճիշտ չի  լինի, դա որպես իրավաբան եմ  ասում, իսկ կուսակցությունն այդ գործունեության հետ այնքան էլ կապ չունի։ Վիտալի Բալասանյանն ընդհանրացնում է  տարբեր կառույցներ։ Ես չեմ արդարացնում ՊՊԾ մտնելը, բայց ընդհանրացնել երկու տարբեր կառույցները, այնքան էլ ճիշտ չէ։ Նույն մարդիկ ե՞ն, եթե ապացուցվի իրենց մեղքը, թող գնան նստեն, իսկ ցանկացած երկրում մարդը հանցագործ չի համարվում, մինչեւ չլինի դատարանի  որոշումը»։

Վովա Վարդանովը հիշեց  նախկին ռուսական ու բրիտանական կայսրությունների հակամարտությունն ու նշեց, թե  Բրիտանական հատուկ ծառայությունները հասան նրան, որ  ռուսական կայսրության ներսում ընդդիմությունը ոչ թե պայքարում, այլ պատերազմում էր։ Ըստ նրա, այդ քաղաքականության հետեւանքները մինչեւ օրս զգացվում են։

Անդրադառնալով  երկրի ներսում բաժանարարների առկայությանն ու  դրանից բխող ռիսկերին, Վովա Վարդանովն ասաց.«Լավ է, երբ մենք այնքան խելացի ենք, որ նույնիսկ մեզ չարացնելով կոռուպցիոներ կամ  սրիկա իշխանավորի դեմ՝ մենք պատերազմում ենք , բայց երբ  հանկարծ թուրքը հարձակվում է, մենք նույն  խրամատում ենք հայտնվում։ Հիմա էլ այդպես կլինի, թե ոչ՝ չգիտեմ։ Ես գիտեմ մի բան՝ հաշվի առնելով մեզ շրջապատող վտանգները, մեզ բաժանողը հանցանք չի գործում, դա մեղք է։ Չի կարելի մեզ  բաժանել այն աստիճան, որ մենք իրար թշնամաբար նայենք»։

Ըստ նրա, այժմ մեր միասնության դեմ պայքարում են թե ռուսական, թե արեւմտյան , թե թուրքական  էմիսարները։ «Ուրիշի կամքը առաջ տանողները պետք է հիշեցնել՝ վերեւում Աստված կա։ Այն հայը, որը մեր միջով անցնող ճաքը վերածում է  անդունդի, օրերից մի օր Աստծո հետ հանդիպելիս պետք է հիշի, թե իրեն Աստված որ կողմ է ուղարկելու»,-եզրափակեց Վովա Վարդանովը։

Աղբյուր` Փաստինֆո