Փաստ ինֆո

Արցախի ժողովուրդն անթերի է իրացրել իր ինքնորոշման իրավունքը։ Այս մասին Ստեփանակերտում այս պահին ընթացող  Արցախի բարեկամների համաժողովի ժամանակ ասաց Հայաստանի ԱԳ փոխնախարար Շավարշ Քոչարյանը։

«Իրավունք, որն ամրագրված է ՄԱԿ-ի կանոնադրությամբ որպես ՄԱԿ-ի երեք նպատակներից մեկը։ Իրավունք, որին չի կարելի հակադրել որևէ միջազգային իրավունքի սկզբունք, ներառյալ տարածքային ամբողջականությունը։ Իրավունք, որը գերակայում է ցանկացած այլ միջազգային փաստաթղթի հանդեպ։ Լինի դա երկկողմ, թե բազմակողմ, եթե կա հակասություն, ՄԱԿ-ի կանոնադրությամբ ամրագրված ինքնորոշման իրավունքի և որևէ այլ միջազգային պայմանագրի դրույթի միջև, գործում է ինքնորոշման իրավունքը»,-ասաց Շավարշ Քոչարյանը ՝ ընդգծելով, որ մեր բոլորի պարտքն է սատարել և առաջնորդվել Արցախի ժողովրդի կողմից հստակ արտահայտված ինքնորոշման իրավունքով։

ԱԳ փոխնախարարի կարծիքով լուրջ քննարկումների առարկա կդառնա նաև համագործակցությունը։ Շավարշ Քոչարյանը նկատեց՝ մարդկությունը ձգտում է, որ աշխարհը դառնա ավելի խաղաղ, սակայն կան խոչընդոտներ. «Եթե խորքային նայենք բոլոր զարգացումներին, ապա այդ խոչընդոտը հակաքաղաքակրթական ուժերն են։ Իրականում խորքային անընդհատ պայքար է ընթանում քաղաքակրթությունների և հակաքաղաքակրթական ուժերի միջև։ Հայ ժողովուրդը դա շատ լավ զգացել է իր մաշկի վրա։ Վկա է այն դաժանությունները, որը հայ ժողովուրդը տեսավ Ցեղասպանության օրերին։ Այդ հակաքաղաքակրթական ուժերն անընդհատ խոչընդոտում են մարդկության զարգացումը»,-հավելեց ԱԳ փոխնախարարը՝ պատահական չհամարելով այն հանգամանքը, որ Ցեղասպանություն վերապրած հայ ժողովուրդը միշտ գտնվում է քաղաքակրթական ուժերի կողմը։

Հեղինակ` Հասմիկ Կոշկարյան