Փաստ ինֆո

Գովազդի համար վարչապետի աշխատակազմը պետբյուջեից 48 միլիոն 900 հազար դրամ կստանա։ Որոշումը ընդգրկված է եղել կառավարության այսօրվա նիստի օրակարգում՝ չզեկուցվող նախագծերի շարքում։ 

Պետբյուջեում վերաբաշխում կատարելու վարչապետի աշխատակազմին գումար հատկացնելու եւ գնման գործընթաց կազմակերպելու մասին նախագծում նշված է, որ «Հայաստանի վերափոխման ռազմավարություն 2050»-ի տեսլականի ուղերձները հանրությանը ներկայացնելու և պատշաճ ձևով հաղորդակցվելու նպատակով ցուցապաստառների տպագրության, գովազդային ծառայությունների ձեռքբերման նպատակով պահուստային ֆոնդի հաշվին ՀՀ վարչապետի աշխատակազմին կհատկացվի 48 միլիոն 900 հազար դրամ։

Ուշագրավ է , որ գովազդային ծառայություններն իրականացվելու են մեկ անձից գնում կատարելու ընթացակարգով։ Կառավարության որոշման մեջ, մասնավորապես, նշված է . «Հաշվի առնելով նախագծով նախատեսված «Հայաստանի վերափոխման ռազմավարություն 2050»-ի տեսլականի ուղերձները հանրությանը ներկայացնելու և պատշաճ ձևով հաղորդակցվելու նպատակով ցուցապաստառների տպագրության, գովազդային ծառայությունների առանձնահատկությունները, ինչպես նաև ժամկետի սղությունը և մատուցվող ծառայությունների անհետաձգելիությունը՝ գնման առարկայի համար գնման ձև է սահմանվել մեկ անձից գնում կատարելու (ՀՄԱ) ընթացակարգը»։

Թե ինչով է պայմանավորված գովազդային արշավի հրատապությունը, որ ծառայությունները գնվելու են առանց մրցույթի, դժվար է ասել։ Այս որոշման ֆոնին ուշագրավ է՝ վերջին օրերին վարչապետ Նիկոլ Փաշինյանի հրապարակած մի լուսանկարը, որտեղ մեծ գովազդային վահանակի վրա գրված է «Հայաստանն իմ Օջախն է, ժողովուրդն իմ Ընտանիքն ։ Փաշինյանը լուսանկարին կից գրառում էր արել. «Երեւանում եւ ընդհանրապես՝ Հայաստանի Հանրապետությունում, ՀՀ տարբեր քաղաքացիների ձեռքով գրված»:

Մեկ այլ որոշմամբ կառավարության աշխատակազմին կրկին պահուստային ֆոնդից հատկացվել է 30 միլիոն դրամ ՝ «Մեր ժամանակի հերոսը» մրցանակաբաշխության 45 հաղթողներին պարգևատրելու նպատակով։

Նախագծում նշվում է, որ մեր ժամանակների հերոսների դերում ՀՀ հասարակ քաղաքացիներ են, ովքեր քաջություն են ունեցել սեփական նախաձեռնությամբ փոխելու իրենց ու շրջապատի մարդկանց կյանքը։

Հիշեցնենք «Մեր ժամանակի հերոսը» մրցանակաբաշխությունն ամփոփվեց Գյումրու Սև Բերդ ամրոցում՝ սեպտեմբերի 21-ին՝ Անկախության օրը։

Մրցանակակիրները վերջին մեկ տարվա ընթացքում հանրային հեռուստաընկերության՝ «Մեր ժամանակի հերոսը» հաղորդման հերոսներն են:

Հաղթողներն ստացել են արձանիկներ ՝ ««Մեր ժամանակի հերոսը» եւ «Եվ այդ մեկ մարդը դու ես գրությամբ։

Աղբյուր` Փաստինֆո