Փաստ ինֆո

«Սասնա Ծռեր» կուսակցությունը Նիկոլ Փաշինյանի հետ համատեղ որևէ մեկին ահաբեկելու և մարտական թև ստեղծելու ցանկություն չունի։

«Փաստինֆո»-ի հետ զրույցում ասել է «Սասնա ծռեր» համահայկական կուսակցության վարչության անդամ Վարուժան Ավետիսյանը։ Նշենք, որ նման մտահոգություն էր հայտնել Արցախի անվտանգության խորհրդի նախկին քարտուղար Վիտալի Բալասանյանը։ Վերջինս երեկ լրատվականներից մեկի հետ հարցազրույցում անդրադարձել է Նիկոլ Փաշինյանի հանդիպմանը «Սասնա Ծռեր» կուսակցության երկու անդամների հետ ու ասել.

«Նիկոլ Փաշինյանը փորձում է ահաբեկել բոլորին, ինչու ոչ նաև ինձ, և իմ նմաններին, որ տեսեք մենք ունենք մարտական թև, կարող եմ հրաման տալ և «Սասնա Ծռերը» կամ մնացածը ձեր հարցերը ֆիզիկապես լուծեն։ Լուր տամ բոլորին, մանավանդ Փաշինյանին և «Սասնա Ծռերին» թող չփորձեն նմանատիպ խոսակցություններ ծավալել կամ քննարկել՝ րոպե առաջ պատասխան են տալու։ Ցռան Վերգոյի տպավորությունը Փաշինյանն ու իր կողմնակիցներն են, մենք ճանապարհ անցած մարդիկ ենք»։

«Վիտալի Բալասանյանը 5-րդ շարասյան ժողովրդի իշխանությունը յուրացրած, ժողովրդին ցեղասպանության ենթարկած, ազգային դավաճանություն կատարած մաֆիայի, հանցավոր համագործակցության անդամ է և նրա խոսնակն է, ներկայացրել է այդ մաֆիայի 5-րդ շարասյան տեսակետները»,-ասաց Վարուժան Ավետիսյանը։

Կուսակցության անդամը նշեց, որ իր հայտարարությունում Բալասանյանն ուղիղ ձևով սպառնացել է ոչնչացնել ՀՀ իշխանության, «Սասնա Ծռերի» կուսակցության ներկայացուցիչներին և նաև, իր խոսքով ասած, ՀՀ հպարտ քաղաքացիներին։

«Նա իր այդ կեղծ, անհեթեթ պնդումներն արել է իր սպառնալիքներն, իբր, արդարացնելու նպատակով, հարկավ ծանրագույն հանցագործությունների նախապատրաստությունն որևէ արդարացում չունի։ Նա նման հայտարարությամբ է հանդես եկել՝ իրականացնելով 5-րդ շարասյան ռևանշիստական պլանը»,-ասաց «Սասնա Ծռեր» կուսակցության վարչության անդամն ու ավելացրեց, որ 5-րդ շարասյունն որոշել է սպառնալիքներով հանդես գալ, իսկ հաջորդ քայլը կլինի սպառնալիքների իրականացումը։

Հիշեցնենք, որ Սասնա Ծռերի անդամները  2016 թվականի հուլիսի 17-ին զինված հարձակում են գործել ՀՀ ոստիկանության Երևան քաղաքի վարչության պարեկապահակետային ծառայության գնդի վարչական շենքերի վրա. «ԿՌԱԶ» մակնիշի բեռնատարով հարվածելով՝ կոտրել են գնդի վարչական տարածքի մուտքի գլխավոր դարպասներն ու կից պարիսպը, իրենց մոտ ապօրինի պահվող ինքնաձիգների կիրառմամբ կյանքի և առողջության համար վտանգավոր բռնություն գործադրելով գնդում ծառայություն իրականացնող ոստիկանության աշխատակիցների նկատմամբ՝ ներխուժել են գնդի տարածք և զավթածն ազատելու պայմանով պետությանը գործողություն կատարելուն հարկադրելու նպատակով զավթել և պահել են գնդի վարչական շենքերը, շինություններն ու տարածքում գտնվող տրանսպորտային միջոցները: Ըստ մեղադրանքի՝ նրանց այս գործողության նպատակն է եղել  ծանր հանցագործություն կազմակերպելու համար մեղադրվող Ժիրայր Սեֆիլյանին և մի շարք այլ անձանց ՀՀ արդարադատության նախարարության քրեակատարողական հիմնարկներից ազատ արձակելուն պետությանը հարկադրելը։

Զինված հարձակման հետեւանքով զոհվեցին  գնդապետ Արթուր Վանոյանը, լեյտենանտ Յուրի Տեփանոսյանն ու ավագ ենթասպա Գագիկ Մկրտչյանը:

Հեղինակ` Սոնա Գեւորգյան