Փաստ ինֆո

Կարծում եմ՝ Ադրբեջանում հենց այնպես վարչապետին չէին փոխի։ Ադրբեջանում վարչապետի փոփոխությունը «Փաստինֆո»-ի հետ զրույցում այսպես մեկնաբանեց ԱԺ «Իմ քայլը» խմբակցության պատգամավոր, ադրբեջանագետ Տաթևիկ Հայրապետյանը։

Վերջինս նկատեց՝ Ադրբեջանում վարչապետի պաշտոնն առանձնապես մեծ կարևորորություն իրենից չի ներկայացնում, քանի որ վերջինս երկրի քաղաքական դաշտում էական դերակատարում չունի. «Կարծում եմ՝ պետք է տեսնենք, թե հետագայում ինչ գործընթացներ կհաջորդեն։ Կլինի՞ արդյոք կառավարության կազմի փոփոխություն, թե ոչ և ըստ այդմ հասկանանք, թե այս գործընթացներն ուր են տանում»,-ասաց պատգամավորը։

Նրա հավաստիացմամբ էական ոչինչ տեղի չի ունեցել, ինչպես նախորդ վարչապետը՝ Նովրուզ Մաեդովը, այնպես էլ Ալի Ասադովը ծագումով Նախիջևանից է, այսինքն նախիջևանյան կլանի ներկայացուցիչ է։ Բացի այդ Ալի Ասադովը վերջին 21 տարիներին զբաղեցրել է նախագահի տնտեսական հարցերով խորհրդականի պաշտոնը։

Հարցին, այնուամենայնիվ Ադրբեջանում կա՞ն ներքաղաքական խոսակցություններ, որ կառավարության կազմում փոփոխություններ են տեղի ունենալու, այդ թվում պաշտպանության և արտաքին գործերի նախարարություններում, պատգամավորը նկատեց. «Հաշվի առնելով ադրբեջանական մամուլի փակությունը, սահմանափակումները՝ ինչ-որ փորձագիտական մակարդակներում հնչում են կարծիքներ, բայց դրանք դեռևս աղոտ են, հստակ չեն։ Կարծում եմ հենց այնպես վարչապետին չէին փոխի, առավել ևս, երբ դաորևէ դերակատարում չունի ադրբեջանական հասարակության ընկալման մեջ»։

Անդրադառնալով վերջերս Ադրբեջանում ընդդիմադիր Ժողճակատ կուսակցության կազմակերպած ցույցին՝ Տաթևիկ Հայրապետյանն ասաց, որ այն բավական դաժան ճակատագիր ունեցավ. «Դեռևս ցույցը չսկսած ոստիկանությունն անմիջապես միջամտեց։ Հայտարարություն տարածեց, որ ցուցարարները խախտում են հասարակական կարգը, մոտ 30 ձերբակալված ունեին, որոնք հետագայում մեծամասամբ ազատ արձակվեցին»,-ասաց Տաթևիկ Հայրապետյանը՝ ավելացնելով, որ անհեթեթն այն էր, որ իշխանությունն ինքն էր արտոնել ցույցը։

Պատգամավորի խոսքով Ժողճակատի ղեկավարը հայտարարել է, որ շարունակելու են այդ ալիքը, և հաջորդ ցույցը նախատեսվում է հոկտեմբերի 19-ին։

Պատգամավորն ուշադրություն դարձրեց նաև այն հանգամանիքն, որ ցույցի ժամանակ իշխանությունների ցանկությամբ ներկա էին մարդիկ, որոնք իշխանությունների օգտին էին վանկարկում և սադրում էին իրավիճակը. «Հետաքրքական էր, որ սոցցանցերում տարածվել էր մի տեսանյութ, որտեղ վանկարկողներից մեկը նշում է ՝«Ալիև, Ղարաբաղ» և դրան ի պատասխան՝ ընդդիմադիր ցուցարարներից մեկը նշում է՝ «Քո Ալիևը, Քո Ղարաբաղը, ինչե՞ր ես խոսում, երբ Ղարաբաղը վաղուց արդեն Փաշինյանի զամբյուղում է»»,-նշեց Տաթևիկ Հայրապետյանը՝ ընդգծելով, որ ըստ էության կա դժգոհություն, որն այժմ տարբեր դրսևորումներ է ստանում։ Պատգամավորի խոսքով եթե Ադրբեջանում ներքաղաքական դրությունը սրվի, Ղարաբաղում տեղի ունեցող դեպքերը և Ղարաբաղի հարցը դառնալու են շահարկումների առարկա.

«Այս պահին դա այդքան էլ լարված չէ, բայց դժգոհություն կա, և մարդիկ փորձում են դրա դրսևորման մեթոդները գտնել, սակայն, ցավոք, չեն կարողանում դա անել անգամ արտոնված ցույցի պայմաններում»,-հավելեց պատգամավորը։

Հեղինակ` Հասմիկ Կոշկարյան