Փաստ ինֆո

«Երբ լսում էի Վիտալի Բալասանյանի հարցազրույցը մտածում էի՝ արդյոք արժե՞ մեկնաբանել այն, որովհետև դրանում ոչ թե քաղաքական գործչի, պաշտոնատար անձի ինչ-որ տեսակետ է հնչեցվում, այլ մարդը փորձում է հորինված փաստերը լուրջ դեմքով ներկայացնել որպես իրականություն»,- «Փաստինֆո»-ի հետ զրույցում ասաց ԱԺ «Իմ քայլը» խմբակցության պատգամավոր Նիկոլայ Բաղդասարյանը, անդրադառնալով Արցախի անվտանգության խորհրդի նախկին քարտուղար Վիտալի Բալասանյանի հարցազրույցին։

Հիշեցնենք, որ Բալասանյանն երեկ լրատվականներից մեկի հետ հարցազրույցի ժամանակ ասել էր, թե «Փաշինյանը ցանկանում է վիժեցնել այն արգանդները, որոնք պետք է ծնեն ապագա հերոսներ»։ Նա նաև անդրադարձել էր Նիկոլ Փաշինյանի հանդիպմանը «Սասնա Ծռեր» կուսակցության երկու անդամների հետ ու ասել. «Նիկոլ Փաշինյանը փորձում է ահաբեկել բոլորին, ինչու ոչ նաև ինձ, և իմ նմաններին, որ տեսեք մենք ունենք մարտական թև, կարող եմ հրաման տալ և «Սասնա Ծռերը» կամ մնացածը ձեր հարցերը ֆիզիկապես լուծեն։ Լուր տամ բոլորին, մանավանդ Փաշինյանին և «Սասնա Ծռերին» թող չփորձեն նմանատիպ խոսակցություններ ծավալել կամ քննարկել՝ րոպե առաջ պատասխան են տալու։ Ցռան Վերգոյի տպավորությունը Փաշինյանն ու իր կողմնակիցներն են, մենք ճանապարհ անցած մարդիկ ենք»։

Բաղդասարյանը չի կարծում, որ այս հայտարարությունները կարող են վնասել Արցախի և Հայաստանի հարաբերություններին. «Չեմ կարծում, որ մարդիկ հավատան իր խոսքերին, ինքն ասում է թեկուզ դատարկ թուղթ լինի «Իմ քայլականները» կողմ կքվեարկեն, նման բանը լուրջ չէ և չեմ կարծում, թե մարդիկ կմտածեն այդտեղ ճշմարտություն կա։ Եթե լուրջ դեմքով հայտարարություններ անեմ Վ. Բալասանյանի վերաբերյալ, ինչ-որ բաներ պատմեմ, այն դեպքում երբ ոչինչ չգիտեմ, ի՞նչ եք կարծում լուրջ կընդունվե՞մ»։

Հարցին, ո՞րն է պատճառը, որ Բալասանյանը նման սուր քննադատությամբ է հանդես գալիս վարչապետի հասցեին, Բաղդասարյանը պատասխանեց. «Մարդը սխալ է ընկալել օրենքի պահանջը, որ պետք է լինի խոսքի ազատություն։ Խոսքի ազատությունը չի նշանակում մարդկանց վիրավորել, բայց իմ կարծիքով ինքն արժեզրկում է իրեն և իր կերպարը։ Բոլոր դեպքերում մարդիկ կան, որ մտածում են Բալասանյանը հերոս է, նվաճել է այդ կոչումը»։

«Իմ քայլը» պատգամավորը նշեց, որ Բալասանյանի այս պահվածքը հարիր չէ և ոչ ադեկվատ է հերոսի համար։ Բաղդասարյանի խոսքով, մարդ պետք է միշտ սթափություն պահպանել և խուճապի մեջ չընկնել։

«Նման մարդ ով պատերազմ է անցել, խուճապի մեջ է ընկել, իրեն թվում է՝ կորցրել է իշխանությունը և վերականգնել հնարավոր չէ իր հեղինակությունը, դրա համար էլ նման քայլերի է դիմում։ Պետք է ադեկվատ լինել իրավիճակին և գիտակցել, որ խոսվում է զորքերի գլխավոր հրամանատարի մասին»,-ասաց պատգամավորն ու ավելացրեց, որ մարդ, ով ուզում է անվտանգության հարցի լուծում, չի կարող զորքերի գլխավոր հրամանատարի մասին նման արտահայտություններ անել։

Հեղինակ` Սոնա Գեւորգյան