Փաստ ինֆո

Այդ վիճակում խափանման միջոցը չփոխելն արդեն ինքնին մարդու իրավունքների ոտնահարում է։ «Փաստինֆո»-ի հետ զրույցում ասել է Հայաստանում առաջին ՄԻՊ, «Ընդդեմ իրավական կամայականության» ՀԿ ղեկավար Լարիսա Ալավերդյանը՝ անդրադառնալով Մանվել Գրիգորյանի առողջական վիճակին։ Նշենք, որ նա շարունակում է մնալ բժշկական կենտրոնում, երեկ կտրուկ վատացել է առողջական վիճակը եւ գտնվում է նարկոզի տակ։

Լարիսա Ալավերդյանն ասաց, որ խոշտանգման կամ դաժան վերաբերմունքի չենթարկվելը յուրաքանչյուրի իրավունքն է՝ ընդգծելով, որ խափանման միջոցի փոփոխությունը չի նշանակում արդարացում և բոլոր նրանք, ովքեր դեմ են այդ գործընթացին, ուղղակի կոպիտ ոտնահարում են մարդու իրավունքները։

«Խնդիրն այն չէ, թե ինչպես եմ ես վերաբերում այդ անձնավորության գործունեությանը, այլ այն է, որ խոսքը գնում է մի մարդու մասին, որը հիմա տառապում է տարբեր հիվանդություններով»,- նշեց տիկին Ալավերդյանը։

Այն հարցին, թե արդյո՞ք ճիշտ է Մանվել Գրիգորյանի փաստաբանների կողմից կիրառվող խոշտանգում եզրույթը՝ տիկին Ալավերդյանը հայտնեց, որ խոշտանգում եզրույթի կիրառման համար անհրաժեշտ տարր է՝ ինչ-որ խոստումի կամ գործողության կատարման դիմաց նման վերաբերմունքը, ուստի Մանվել Գրիգորյանի դատապաշտպանն ավելի լավ գիտի, թե ինչպես բնութագրի։ Տիկին Ալավերդյանն առանձնացրեց նաև Մանվել Գրիգորյանի նկատմամբ մարդու իրավունքների այլ խախտումներ. Մանվել Գրիգորյանի՝ կալանավայրում նկարի հրապարակումը, մինչև դատավճռի հրապարակումը՝ նրա անվան շուրջ ծավալվող քարոզչական գործունեությունը։

Լարիսա Ալավերդյանն ընդգծեց, որ այս գործերով առկա է ոչ միայն քաղաքականացված, այլև՝ անձնավորված մոտեցում, որն ամբողջովին ընկնում է ընտրովի արդարադատության բնութագրի ներքո, ինչը ևս խոսում է այն մասին, որ կարող ենք հայտնվել այնպիսի իրավիճակում, երբ մարդու կյանքի կամ առողջության գնով հնարավոր է, որ ուզում են հասնել ինչ-ինչ նպատակների։ Նա նաև հավելեց, որ դատապաշտպանն ավելի խորքային է ծանոթ այդ իրավիճակին և, եթե դա այդպես է, ապա դա շատ ծանր հետևանքներ կարող է ունենալ ոչ միայն Մանվել Գրիգորյանի, այլև՝ հասարակության համար։

Անդրադառնալով այն հարցին, թե Մանվել Գրիգորյանի առողջության վատթարացման և վատագույն ավարտի դեպքում ո՞վ պետք է կրի պատասխանատվություն, Լարիսա Ալավերդյանը նշեց, որ վատագույն ավարտի դեպքում պատասխանատվությունն ամբողջովին իշխանությունը պետք է կրի։ Ինչը վերաբերում է ՀՀ նախկին ոստիկանապետ, գեներալ-գնդապետ Հայկ Հարությունյանի ինքնասպանությանը, Հայաստանում առաջին ՄԻՊ-ը նշեց. «Ինչքան էլ զարմանալի է, բայց հենց իշխանության կողմից հնչեցվեց այն, որ Հայկ Հարությունյանը պետք է կանչվեր մարտի 1-ի գործով, հարցաքննվեր և ձերբակալվեր։ Այսինքն՝ սա խոսում է այն մասին, որ ոչ թե քողարկվում է ինքնասպանության հասցնելու փաստը, այլ՝ ուղղակի հրապարակայնորեն դրա մասին խոսվում է։ Ես դրա մեջ եմ տեսնում շատ վտանգներ։ Այսինքն՝ դա հասարակությանը կամ հասարակության առանձին ներկայացուցիչներին ահաբեկելու ձևերից մեկն է։ Կարծես թե, դա հետևողական դիրքորոշում կամ կեցվածք է, որով ցանկանում են նրանց համար, ովքեր դեռ չեն ընդգրկվել այդ գործերի մեջ, նախապես վախի մթնոլորտ ստեղծել»՝ հավելելով, որ դա ճնշման ամենամերժելի և ամենադատապարտելի ձևերից մեկն է։

Ինչը վերաբերում է խափանման միջոցների կիրառմանը, Լարիսա Ալավերդյանը հայտնեց, որ վերջին ժամանակներում կալանքը՝ մինչև դատարանի դատավճիռը կիրառվում է որպես պատժի ձև, ինչն իր կարծիքով, հետընթաց է ՝ Հայաստանում մարդու իրավունքների՝ մասնավորապես անազատության մեջ հայտնված անձանց վերաբերյալ։

Հիշեցնենք, որ Երևանի ընդհանուր իրավասության դատարանը դատավոր Մնացական Մարտիրոսյանի նախագահությամբ այսօր կրկին մերժել է Մանվել Գրիգորյանին գրավի դիմաց ազատ արձակելու վերաբերյալ պաշտպանի միջնորդությունը։ Երևանի ընդհանուր իրավասության դատարանում դատական նիստի ժամանակ Մանվել Գրիգորյանի պաշտպան Լևոն Բաղդասարյանը հայտարարել էր, որ Մանվել Գրիգորյանի առողջական վիճակը վատթարացել է, ձեռքերն ու ոտքերը գրեթե 90 %-ով անզգայացել են ։

Հեղինակ` Իզաբել Սահակյան

Աղբյուր` Փաստինֆո