Փաստ ինֆո

«Հայելի» ակումբի վրա տեղի ունեցած հարձակումը չի կարող նախաձեռնված կամ ուղղորդված լինել իշխանությունների կողմից, դա միայն վառ երևակայության արդյունք է։ Կարծում եմ ճիշտ հակառակն է, այն ուղղորդված է այն խմբակի կողմից, որն ուզում է ցույց տալ, թե երկրում խնդիր կա»,- «Փաստինֆո»-ի հետ զրույցում նման կարծիք է հայտնել ԱԺ «Իմ քայլը» խմբակցության պատգամավոր Հովհաննես Հովհաննիսյանը։

Հիշեցնենք, որ հոկտեմբերի 5-ին չորս երիտասարդ ձվեր են նետել ակումբի դռներին ու պատերին, պաստառներ փակցրել` պահանջելով փակել լրատվամիջոցը: Նախնական տվյալներով` լրատվամիջոցի նկատմամբ ոտնձգությանը մասնակից են եղել Դավիթ Հովհաննիսյանը, Սարգիս Մանուկյանը, Արտակ Մարգարյանը և Հայկ Ստեփանյանը:

Որպես ակցիայի պատճառ նշվել է Hayeli.am լրատվական կայքում հրապարակված «Ալիևի ուշացած, բայց հուժկու պատասխանը Փաշինյանին» վերնագրով հրապարակումն էր։ Արձանագրենք, որ ակումբի ղեկավարը՝ Անժելա Թովմասյանը, ՀՀ ՍԴ նախագահ Հրայր Թովմասյանի քույրն է, ում լիազորությունները դադարեցնելու գործընթաց է սկսել իշխող քաղաքական ուժը։

Ա. Թովմասյանը հայտարարել է, որ տեղի ունեցած հարձակումը իշխանության կողմից է նախաձեռնված և տեղի է ունեցել իշխանության հովանավորությամբ։
Հովհաննիսյանը նշեց, որ փորձ է արվում անկայուն վիճակ ստեղծել և անվստահություն սերմանել իշխանության նկատմամբ։

«Իշխանությունն այնքան ամուր է և ունի ժողովրդի վստահության քվեն, որ իրեն չի հետաքրքրում Hayeli.am-ի կամ այլ կայքերի դիրքորոշումները, իրեն հետաքրքրում է երկրում բազմակարծությունը։ Իհարկե, երբեմն այդ բազամակարծությունը դուրս է գալիս սահմաններից։ Տարբեր պարագաներում, երբ հարձակվում են նույն իշխանության ներկայացուցիչների, նրանց ընտանիքների վրա, անպատկառ խոսքեր են ասում, որևէ մեկը դրանց ուշադրություն չի դարձնում, որովհետև «նյուզմեյքինգը» գտնվում է որոշ մարդկանց ձեռքում»,-ասաց «Իմ քայլը» խմբակցության պատգամավորը։

Հովհաննիսյանի խոսքով, կոնկրետ խմբերի առաջ խնդիր կա դրված՝ նվազեցնել իշխանության վարկանիշը։

«Այդ խմբերը ֆինանսավորվում են տարբեր ձևերով, որպեսզի թիրախավորեն իշխանության այս կամ այն անհատին և ամբողջ ռեսուրսը մի պահ ուղղեն այդ անհատի վրա, հետո թեքվեն մեկ ուրիշի վրա։ Այսպես` ծրագրավորված ռազմավարությամբ փորձում են իշխանության մեջ գտնվող առանձին ներկայացուցիչների վարկաբեկել, որպեսզի դա ազդի իշխանության ընդհանուր վարկանիշի վրա»,-հայտնեց «Իմ քայլը» պատգամավորը։

Մանրամասները՝ տեսանյութում։

Հեղինակ՝ Սոնա Գեւորգյան

Աղբյուր` Փաստինֆո