Փաստ ինֆո

«Հարգելի դատարան, Դուք դրանով լավություն կանեք և՛ Ձեզ, և՛ արդարադատությանը։ Հավանաբար՝ ավելի համարձակ դատավոր կգտնվի, որը նաև արդարադատություն կիրականացնի »,- այսօր ՀՀ երկրորդ նախագահ Ռոբերտ Քոչարյանի և մյուսների գործով դատական նիստի ժամանակ հայտարարեց Արմեն Գեւորգյանի պաշտպան Վարդգես Գևորգյանը՝ նշելով, որ միանում է ինքնաբացարկի միջնորդություն ներկայացնող գործընկերներին։

Նշենք, որ դատական նիստում դատավոր Դանիբեկյանին ինքնաբացարկի միջնորդություն է ներկայացրել ՀՀ երկրորդ նախագահ Ռոբերտ Քոչարյանի պաշտպանական թիմը։

Արմեն Գեւորգյանի պաշտպանը կարծում է, որ Ռոբերտ Քոչարյանի կալանքի տակ մնալը արդեն իսկ կողմնակալ վերաբերմունք է դատարանի կողմից։ «Բա գրավը ո՞ւմ համար է, եթե ոչ պարոն Քոչարյանի»,- ասաց Գևորգյանը՝ հավելելով, որ գրավի միջնորդությունը կիրառելու համար բոլոր հիմքերն առկա էին, բայց դատարանը գրավ կիրառելու համար համարձակություն չունեցավ։ «Պետք է եզրակացնել, որ դատարանի նկատմամբ կա՛մ կա ճնշում, կա՛մ դատարանը չունի համարձակություն»,- ասաց Գևորգյանը։ Փաստաբանի խոսքով՝ դա արդեն իսկ բավարար է ինքնաբացարկ հայտարարելու համար։ Նա նաև նշեց, որ կան հարցեր կապված մեղադրանքի հետ, որը նույն պես պետք է քննարկվի և գտնում է, որ դատարանն ի վիճակի չէ հետագա հարցերը քննության առնել։

Հիշեցնենք, որ ներկայացնելով ինքնաբացարկի միջնորդությունը Ռոբերտ Քոչարյանի պաշտպան Հայկ Ալումյանը հայտարարել է, որ դատարանը ձեւավորվել է կամայականորեն․ «Առկա են մի շարք հանգամանքներ, որոնք բացառում են Ձեր մասնակցությունը սույն դատական գործին։ Առաջինն այն է, որ Դուք սույն գործը քննելու համար չեք կարող համարվել պատշաճ դատարան, երկրորդն այն է, որ Դուք ունեք կանխակալ բացասական վերաբերմունք Ռոբերտ Քոչարյանի նկատմամբ»,- խոսքն ուղղելով դատավորին ասել է Հ.Ալումյանը։

Հեղինակ` Իզաբել Սահակյան