Փաստ ինֆո

«Շատ վատ եմ վերաբերվում նման ակցիաներին, հատկապես , եթե դրանք ուղղված են լրատվամիջոցների»,-«Փաստինֆո»-ի հետ զրույցում ասել է Ինֆորմացիայի ազատության կենտրոնի նախագահ Շուշան Դոյդոյանը՝ անդրադառնալով «Հայելի» մամուլի ակումբի վրա հարձակման դեպքին։

«Եթե այսօր իրենք փորձում են ձվերով հարվածելու միջոցով իրենց դժգոհությունը հայտնել, ապա վաղը կարող են զենք վերցնել, գնալ խմբակցություն եւ այդպես իրենց վերաբերմունքը հայտնել։ Այսինքն, միջոցներն են փոխվում, սակայն երեւույթը մնում է նույնը, ինչը իրականում շատ դատապարտելի է»,-նշեց Դոյդոյանը։

ԻԱԿ նախագահը շեշտեց, որ անկախ նրանից, հավանում ենք, թե ոչ տվյալ լրատվամիջոցը, կիսում ենք թե ոչ բովանդակությունը, ուզում կամ չենք ուզում հանդուրժել, միեւնույնն է այս կամ այն լրատվամիջոցի հանդեպ նման վերաբերմունք արտահայտելն անընդունելի է։

Հիշեցնենք, որ հոկտեմբերի 5-ին չորս երիտասարդ ձվեր են նետել ակումբի դռներին ու պատերին, պաստառներ փակցրել` պահանջելով փակել լրատվամիջոցը: Նախնական տվյալներով` լրատվամիջոցի նկատմամբ ոտնձգությանը մասնակից են եղել Դավիթ Հովհաննիսյանը, Սարգիս Մանուկյանը, Արտակ Մարգարյանը և Հայկ Ստեփանյանը:

Որպես ակցիայի պատճառ նշվել է Hayeli.am լրատվական կայքում հրապարակված «Ալիևի ուշացած, բայց հուժկու պատասխանը Փաշինյանին» վերնագրով հրապարակումն էր։ Արձանագրենք, որ ակումբի ղեկավարը՝ Անժելա Թովմասյանը, ՀՀ ՍԴ նախագահ Հրայր Թովմասյանի քույրն է, ում լիազորությունները դադարեցնելու գործընթաց է սկսել իշխող քաղաքական ուժը։

«Այդ քայլից մինչեւ բռնություն, բռնությունից մինչեւ սպանություն սահմանը շատ հեղհեղուկ է։ Նման քայլերը ուղղակի պետք է բացառվեն, իսկ բացառվելու համար պետք է արժանի գնահատականի արժանանան, ինչը պետք է տան իրավապահ մարմինները»,-շեշտեց Շուշան Դոյդոյանը»։

«Հայելի» մամուլի ակումբի վրա հարձակման դեպքի առթիվ Ոստիկանության կենտրոնական բաժնում քրեական գործ է հարուցվել՝ ՀՀ քրեական օրենսգրքի 164֊րդ հոդվածի 1-ին մասի հատկանիշներով, սակայն ձերբակալվածներ կամ մեղադրյալներ քրեական գործով չկան։

ԻԱԿ նախագահն ակնկալում է, որ իրավապահ մարմինները գործի քննությունը պատշաճ կիրականացնեն եւ պատասխանատվության կենթարկեն արարքի հեղինակներին։ «Երբ դա կլինի, այ դա հետագայում կբացառի որեւէ ԶԼՄ-ի դեմ հետագայում նման ակցիաների իրականացումը»։

«Փաստինֆո»-ի հարցին, արդյո՞ք այս միջադեպը կարող է ընկալվել որպես նախազգուշացում բոլոր այն լրատվամիջոցներին, որոնք այսօր համարձակվում են քննադատել իշխանություններին՝ հաշվի առնելով նաեւ այն հանգամանքը, որ վերջին 1.5 տարվա ընթացքում նաեւ վարչապետն է մի քանի անգամ տարբեր հայտարարություններ արել՝ ուղղված մամուլին , Շուշան Դոյդոյանը արձագանքեց. «Ուղղակիորեն կապ չեմ տեսնում, երեւույթը ընդհանրապես, ահազանգ է բոլորի համար՝ անկախ իրենց նախասիրություններին եւ իշխանությանը կամ ընդդիմությանը հարելու հանգամանքից։ Ընդհանրապես, ես գտնում եմ, որ այսօր, ցավոք, չունենք ԶԼՄ-ների այնպիսի դաշտ, որը ներկայումս տեղի ունեցող քաղաքական գործընթացները անաչառ լուսաբանողի դերում հանդես կգա։ Ցավոք, մի մասը ընդդեմ իշխանության են , մյուս մասը՝ իշխանությանը կողմ են»։

Հարցին, արդյոք նախկին լրագրող վարչապետը չպե՞տք է երեւույթին գնահատական տա, Շուշան Դոյդոյանը պատասխանեց.«Կարծում եմ՝ տեղին կլիներ իր գնահատականը, որովհետեւ նման բարձր հեղինակություն վայելող քաղաքական գործչի կողմից նման արատավոր երեւույթին գնահատական տալը պահանջված է, բայց մյուս կողմից, արդարադատության նախարարի կողմից եղավ գնահատական եւ մերժող գրառում Ֆեյսբուքյան էջում, նաեւ «Իմ քայլը» խմբակցությունից մի քանի պատգամավորներ հանդես եկան։ Գուցե դա բավարար չհնչի, բայց ես կարծում եմ, որ դրանք քաղաքական գնահատականներ են, մեզ անհրաժեշտ է իրավապահ մարմինների պատշաճ գործողությունը, գործի պատշաճ քննությունը, ուղարկումը դատարան։ Սա շատ ավելի կարեւոր է, քան այս կան այն քաղաքական գործչի պարսավող գնահատականները, այնպես որ, պետք է հետամուտ լինել, որ մեղավորները պատժվեն, ընդհուպ մինչեւ քրեական պատասխանատվության ենթարկվեն, որպեսզի դա նաեւ կանխարգելիչ նշանակություն ունենա»։

Աղբյուր` Փաստինֆո