Փաստ ինֆո

«Բազմաթիվ հարթակներում արձանագրել ենք, որ ՀՀ-ում խոսքի ազատությունը, մամուլի ազատությունը չափազանց բարձր մակարդակի վրա է՝ հատկապես, եթե համեմատության մեջ դնենք տարածաշրջանի երկրների հետ։ Ըստ էության խոսքի ազատության բռնությունն ու ճնշումների գործադրումն իմ ու իմ գործընկերների կողմից դատապարտելի է»,- «Փաստինֆո»-ի հետ զրույցում ասաց ԱԺ փոխնախագահ, ԲՀԿ անդամ Վահե Էնֆիաջյանը՝ անդրադառնալով Hayeli.am-ի վրա տեղի ունեցած հարձակմանը։

Հիշեցնենք, որ հոկտեմբերի 5-ին չորս երիտասարդ ձվեր են նետել ակումբի դռներին ու պատերին, պաստառներ փակցրել` պահանջելով փակել լրատվամիջոցը: Նախնական տվյալներով` լրատվամիջոցի նկատմամբ ոտնձգությանը մասնակից են եղել Դավիթ Հովհաննիսյանը, Սարգիս Մանուկյանը, Արտակ Մարգարյանը և Հայկ Ստեփանյանը:

Որպես ակցիայի պատճառ նշվել է Hayeli.am լրատվական կայքում հրապարակված «Ալիևի ուշացած, բայց հուժկու պատասխանը Փաշինյանին» վերնագրով հրապարակումն էր։ Արձանագրենք, որ ակումբի ղեկավարը՝ Անժելա Թովմասյանը, ՀՀ ՍԴ նախագահ Հրայր Թովմասյանի քույրն է, ում լիազորությունները դադարեցնելու գործընթաց է սկսել իշխող քաղաքական ուժը։

Անդրադառնալով Hayeli.am կայքի ղեկավար Անժելա Թովմասյանի հայտարարությանը, թե հարձակումը ծրագրված էր իշխանության կողմից և իշխանության հովանավորմամբ, ԲՀԿ պատգամավորն ասաց. «Խոսքի ազատությունը գերակա արժեք է և չի կարելի իշխանության կամ ընդդիմության պրիզմայի ներքո նայել, ՀՀ-ում խոսքի ազատությունը պետք է գերակայություն լինի»։

Դիտարկմանը, թե տեղի ունեցածը կապվում է ՍԴ նախագահ Հրայր Թովմասյանի և Անժելա Թովմասյանի բարեկամական կապերի հետ և խոսվում Թովմասյանի ընտանիքի նկատմամբ ճնշումների մասին, Էնֆիաջյանն ասաց. «Եթե նման փաստեր, նման հանգամանքներ կան պետք է հրապարակվեն և իրավական գործընթաց պետք է սկսվի»։

Մանրամասները՝ տեսանյութում։

Հեղինակ` Սոնա Գեւորգյան