Փաստ ինֆո

Երեւանի ընդհանուր իրավասության դատարանի Շենգավիթի նստավայրում քիչ առաջ մեկնարկեց Ռոբերտ Քոչարյանի եւ մյուսների գործով դատական նիստը։ Այն նախագահում է դատավոր Աննա Դանիբեկյանը։

«Փաստինֆո»-ի հաղորդմամբ՝ դատական նիստի մեկնարկին ամբաստանյալ Արմեն Գեւորգյանի պաշտպան էրիկ Ալեքսանյանը ցանկացավ միջնորդություն ներկայացնել իր պաշտպանյալի խափանման միջոցի վերաբերյալ։ Միաժամանակ Ռոբերտ Քոչարյանի պաշտպան Հայկ Ալումյանը հայտնեց, որ իրենք դեմ չեն, եւ եթե դատարանը չի արգելի, ապա իրենց միջնորդությունը՝ դատավորին ինքնաբացարկ հայտնելու մասին, կարող են ներկայացնել վերը նշված միջնորդությունից հետո։ Սակայն դատավոր Աննա Դանիբեկյանը արգելեց պաշպան Էրիկ Ալեքսանյանին հայտարարությամբ հանդես գալ, ով էլ առարկեց վերջինիս գործողությունների դեմ։ Այսպիսով, Հայկ Ալումյանը ինքնաբացարկի միջնորդություն է ներկայացնում դատավոր Աննա Դանիբեկյանին։

Հայկ Ալումյանը նշեց, որ սույն դատարանը ձեւավորվել է կամայականորեն․ «Առկա են մի շարք հանգամանքներ, որոնք բացառում են Ձեր մասնակցությունը սույն դատական գործին։ Առաջինն այն է, որ Դուք սույն գործը քննելու համար չեք կարող համարվել պատշաճ դատարան, երկրորդն այն է, որ Դուք ունեք կանխակալ բացասական վերաբերմունք Ռոբերտ Քոչարյանի նկատմամբ»։

Անդրադառնալով Ռոբերտ Քոչարյանին առաջադրված մեղադրանքում արտակարգ դրություն հայտարարելու մասին հրամանագրի ընդունման վերաբեյալ դրվագին՝ Հայկ Ալումյանն ասաց, որ  քննիչի որոշման մեջ նախագահի հրամանագիրը՝ արտակարգ ռեժիմ սահմանելու մասին, որակված է որպես ապօրինի․ «Մեղադրանքի ձեւակերպումից երեւում է, որ նախագահի հրամանագրի ապօրինի լինելու պնդումը կենտրոնական նշանակություն ունի Քոչարյանին առաջադրված մեղադրանքի մեջ։ Սույն գործի քննության շրջանակում Դուք պետք է ի թիվս այլի, գնահատական տայիք այն հարցին, թե արդյոք նախագահի հրամանագիրը հակասել է Սահմանադրությանը թե ոչ, սակայն այդ հարցի քննությունը դուրս է սույն դատարանի լիազորություններից»։

Ըստ Ալումյանի՝ այդ հարցը վերապահված է Սահմանադրական դատարանին եւ Ազգային ժողովին․ «Ի տարբերություն նախագահի այլ հրամանագրերի, արտակարգ դրության վերաբերյալ հրամանագրերի օրինականության հարցը լիազորված է մեկ մարմնի՝ ՍԴ-ին եւ Ազգային ժողովին։ Հրամանագիրը սահմանված կարգով քննվել է ԱԺ-ի կողմից եւ թողնվել է ուժի մեջ, սակայն այս հարցը եւս ուշադրության չի անդրադառնում։ Որեւէ այլ մարմին Սահմանադրությամբ եւ օրենքներով օժտված չէ նման լիազորությամբ։ Սա առնչվւոմ է մարդու իրավունքների պաշտպանության վերաբերյալ Եվրոպական կոնվենցիայի սկզբունքներին»։

Ալումյանը հիշեցրեց, որ մեկ անգամ չէ, որ իրենք կասկածի տակ են դրել սույն գործով դատավորի ընտրության հարցը․ «Այս գործը ունի հասարակական աննախադեպ հնչեղություն, ուստի գործով դատավորի ընտրության թափանցիկության հարցը կարեւոր նշանակություն ունի ոչ միայն մասնակիցների, այլեւ հանրության համար։ Օրենքով արգելված չէ պաշտպանի ներկայությունը գործի բաշխման գործընթացին, ինչպես նաեւ առհասարակ սահմանված չէ, որ դա տեղի է ունենում գաղտնի պայմաններում։ Կանխատեսելով, որ սույն քրեական գործը Դավիթ Գրիգորյանի լիազորությունների կասեցումից հետո պետք է փոխանցվի այլ դատավորի, գրավոր դիմել էի Դեպարտամենտին դեռեւս հուլիսի 31-ին՝ ներկա գտնվելու  քրեական գործի համակարգչային բաշխման գործըթացին, խնդրել էի նաեւ այդ գործընթացը դարձնել թափանցիկ՝ հնարավորություն տալով զլմ-ներին լուսաբանել այն։ Չնայած իմ գրավոր միջնորդությանը՝ գործի վերաբաշխման գործընթացը անցել է փակ, ոչ թափանցիկ։ Օրենքի խախտմամբ սույն գործի փոխանցումը Ձեզ անկողմնակալ դիտորդի մոտ կարող է վկայել այն մասին, որ գործընթացն իրականացվել է այնպիսի եղանակով, որ այն մակագրվի նախապես որոշված դատավորի, այսինքն՝ Ձեզ»,- նշեց Ալումյանը։

Ելույթ ունեցավ նաեւ պաշտպան Հովհաննես Խուդոյանը՝ հարց ուղղելով դատավորին․ «Ըստ Դեպարտամենտի կայքում նշածի՝ հուլիս-օգոստոս ամիսներին Դուք գնտվել եք արձակուրդում, եւ դատավոր Դավիթ Գրիգորյանի լիազորությունների կասեցումից հետո բավական ժամանակ է անցել, մինչ գործը մակագրվել է Ձեզ»։ Պաշտպանը հետաքրքրվեց՝ արդյոք դատավորն այդ օրերին իսկապես եղել է արձակուրդում, սակայն դատավոր Դանիբեկյանը հայտնեց, որ պաշտպանը իրավունք չունի դատարանին հարցեր ուղղելու, ինչին ի պատասխան Խուդոյանն ասաց․ «Պատճառաբանություն էր բերվում, թե գործը Առաջին ատյանի դատարանում չէ։ Իսկ ավելի ուշ նույն պայմաններում այն վերադարձվեց Առաջին ատյանի դատարան։ Նշված ժամկետում եթե կատարված լիներ, Դուք արձակուրդում գտնվելիս կլինեիք, ուստի գործը Ձեզ մակագրվել չէր կարող»։

Խուդոյանը նշեց, որ իշխանության ներկայացուցիչների կողմից ակնհայտ հովանավորչական վերաբերմունք է դրսեւորվել դատավոր Դանիբեկյանի նկատմամբ․ «Սա նշանակում է, որ վերջինս կաշկանդված է՝ կայացնելու իշխանությանը հաճո որոշոմներ, իսկ սույն կասկածը փարատելու միակ տարբերակը ինքնաբացարկն է»,- ասաց Խուդոյանը՝ հավելելով․ «Այս գործով արդեն կա օրինական դատավոր, որը ապօրինի հեռացվել է դատական քննությունից․ խոսքը դատավոր Դավիթ Գրիգորյանի մասին է»։

Պաշտպանական կողմն ամբողջովին միացավ ներկայացված միջնորդությանը՝ նշելով, որ ինքնաբացարկի վերաբերյալ միջնորդություններ իրենք եւս ունեն։

Հեղինակ` Միլենա Խաչիկյան