Փաստ ինֆո

Մտածում էի՝ ինքնաբացարկ հայտնելու համար Ձեզ դրամական փոխհատուցում առաջարկել, քանի որ առկա իրողությունների շրջանակներում, ՀՀ-ում նորմալ է գնահատվում, երբ դատավորի կողմից չպաշտոնավարելու համար դրամական փոխհատուցում են նշանակում, հիմքը՝ ՍԴ դատավորներին վաղաժամ կենսաթոշակի անցնելու մասին օրենքն է։ Ռոբերտ Քոչարյանի և մյուսների գործով դատական նիստի ժամանակ  հայտարարել է Յուրի Խաչատուրովի պաշտպան  Միհրան Պողոսյանը՝ հայտնելով, որ միանում է ՀՀ երկրորդ նախագահ Ռոբերտ Քոչարյանի պաշտպանական թիմի ներկայացրած ինքնաբացարկի միջնորդությանը։

«Փաստինֆո»-ն ավելի վաղ հայտնել է, որ դատական նիստում դատավոր Դանիբեկյանին ինքնաբացարկի միջնորդություն է ներկայացրել ՀՀ երկրորդ նախագահ Ռոբերտ Քոչարյանի պաշտպանական թիմը։

Յուրի Խաչատուրովի փաստաբանի խոսքով՝ դատարանը կանխակալ բացասական վերաբերմունք ունի իր պաշտպանյալի՝ Յուրի Խաչատուրովի, նկատմամբ և այս գործով պատշաճ դատարան չէ։ Միհրան Պողոսյանի մատնանշած ինքնաբացարկի հիմքը վերաբերում է Յուրի Խաչատուրովի խափանման միջոցի կիրառման հարցն անգամ քննարկման առարկա չդարձնելուն։ Փաստաբանի խոսքով՝ Յուրի Խաչատուրովի խափանման միջոցի հարցը քննարկվել է մեկ անգամ։

«2018թ. հուլիսի 28-ին Երևանի ընդհանուր իրավասության դատարանն արձանագրել է, որ Յուրի Խաչատուրովի նկատմամբ՝ որպես խափանման միջոց կիրառելի է կալանքը և թույլատրելի է դրա նկատմամբ այլընտրանքային խափանման միջոց գրավի կիրառումը։ Տվյալ որոշման մեջ դատարանն արձանագրել է, որ վարույթն իրականացնող մարմնի կողմից ներկայացված նյութերը ոչ թե հաստատում են մեղադրյալին առաջադրված մեղադրանքում հիմնավոր կասկածի առկայությունը, այլ դատարանը փաստում է, որ ներկայացվել են հիմնավոր տեղեկություններ ու փաստեր, որոնք բավարար հիմք են տալիս եզրակացնելու, որ առկա է մեղադրյալ Յուրի Խաչատուրովի առնչությունը ՀՀ քրեական օրենսգրքով սահմանված հանցակազմի այլ հատկանիշներ պարունակող արարքի կատարմանը»,- ասաց Պողոսյանը՝ նշելով, որ սա երբևէ դատական քննության առարկա չի դարձել։ Փաստաբանի խոսքով՝ դատարանն արձանագրել էր, որ մինչ դատական վարույթի ընթացքում Խաչատուրովի նկատմամբ կիրառվող խափանման միջոցի տեսակը՝գրավը, հիմնավոր է և նշված խափանման միջոց կիրառելու հիմքերն ու պայմանները շարունակում են առկա լինել, մինչդեռ՝ դատարանը չի բացահայտել խափանման միջոց կիրառելու պայմանները։

Յուրի Խաչատուրովի փաստաբանը նշեց, որ դատավոր Աննա Դանիբեկյանը թույլ է տվել Յուրի Խաչատուրովի իրավունքների խախտում՝ անփոփոխ թողնելով նրա խափանման միջոցը՝ հավելելով, որ դատարանը նաև խախտել է ՍԴ 2018թ հունիսի 26-ի որոշումը։ Ի պատասխան Միհրան Պողոսյանի՝ դրամական փոխհատուցում առաջարկելու մասին հայտարարությանը, դատավոր Աննա Դանիբեկյանը կիրառեց դատական սանկցիա՝ նկատողություն՝ դատարանի նկատմամբ անհարգալից վերաբերմունք ցուցաբերելու համար։

Հիշեցնենք, որ ներկայացնելով ինքնաբացարկի միջնորդությունը Ռոբերտ Քոչարյանի պաշտպան Հայկ Ալումյանը հայտարարել է, որ դատարանը ձեւավորվել է կամայականորեն․ «Առկա են մի շարք հանգամանքներ, որոնք բացառում են Ձեր մասնակցությունը սույն դատական գործին։ Առաջինն այն է, որ Դուք սույն գործը քննելու համար չեք կարող համարվել պատշաճ դատարան, երկրորդն այն է, որ Դուք ունեք կանխակալ բացասական վերաբերմունք Ռոբերտ Քոչարյանի նկատմամբ»,- խոսքն ուղղելով դատավորին ասել է Հայկ Ալումյանը։

Հեղինակ` Իզաբել Սահակյան