Փաստ ինֆո

Հայ Առաքելական եկեղեցու Շիրակի թեմի առաջնորդ Միքայել եպիսկոպոս Աջապահյանը  ՀՀ պետեկամուտների կոմիտեից տարօրինակ գրություն է ստացել։

Գրության լուսանկարը տեղադրելով Ֆեյսբուքում, Միքայել եպիսկոպոս Աջապահյանը  գրել է. «Սիրելիներ, ՀՀ Պետական եկամուտների կոմիտեի ոչ առևտրային կազմակերպությունների հսկողության բաժնի պետ Արման Ղազարյանը փնտրում է «Հայ առաքելական եկեղեցու Շիրակի թեմ»-֊ի տնօրեն պարոն Գևորգ Աջսպահյանին, ով բնակվում է Շիրակի մարզի Գյումրի քաղաքի Մայիսյան ապստամբ. 1 հասցեում։ Հայցում եմ ձեր օգնությունը գտնելու սույն մարդուն»։

ՊԵԿ-ից ստացված փաստաթղթում նախ տառասխալով է գրված Շիրակի թեմի առաջնորդի ազգանունը, նշված է նրա մկրտության անունը, իսկ  եւ Միքայել եպիսկոպոս Աջապահյանը  ներկայացված է որպես Հայ Առաքելական եկեղեցու Շիրակի թեմի տնօրեն։ Բացի այս, փաստաթղթում, ըստ էության նշված է գոյություն չունեցող հասցել՝ Մայիսյան ապստամբության փողոց 1։

Ի դեպ, գրության մեջ հղում է արվում ՀԿ-ների մասին օրենքի 18-րդ հոդվածի  (Կազմակերպության գործունեության նկատմամբ վերահսկողությունը )   1-ին մասի 3-րդ կետին (կազմակերպության պաշտոնատար անձանցից, անդամներից ու աշխատողներից պահանջել և ստանալ գրավոր կամ բանավոր տեղեկատվություն)։ Միքայել եպիսկոպոս Աջապահյանի գրառման մեկնաբանություններում, ՀՀ փաստաբանների պալատի նախագահ Արա Զոհրաբյանը նշել է, որ «Հասարակական կազմակերպությունների մասին» ՀՀ օրենքի 1-ին հոդվածի 2-րդ մասի համաձայն՝ սույն օրենքը չի տարածվում կրոնական կազմակերպությունների, կուսակցությունների, արհեստակցական միությունների, հիմնադրամների, ինչպես նաև ոչ առևտրային կազմակերպությունների` օրենքով նախատեսված այլ ձևերի վրա:

««Հասարակական կազմակերպությունների մասին» ՀՀ օրենքի 1-ին հոդվածի 2-րդ մասի համաձայն՝ Սույն օրենքը չի տարածվում կրոնական կազմակերպությունների, կուսակցությունների, արհեստակցական միությունների, հիմնադրամների, ինչպես նաև ոչ առևտրային կազմակերպությունների` օրենքով նախատեսված այլ ձևերի վրա»,-նշել է Արա Զոհրաբյանը:

Գրության հետ կապված «Փաստինֆո»-ն առաջիկայում կփորձի մեկնաբանություն ստանալ ՊԵԿ-ից։

Աղբյուր` Փաստինֆո