Փաստ ինֆո

Օրերս մամուլում ուշագրավ մի լուր էր հրապարակվել, ըստ որի՝ «վերջին շրջանում» Նիկոլ Փաշինյանը սկսել է մի շարք գործընկերների «էսէմէս»-ներին չպատասխանել և շփվում է միայն Մակունցի, Ռուբինյանի, Սիմիդյանի, Մխիթարի հետ: Ըստ այդմ՝ եզրակացվում է՝ «ոչ մեկին չի վստահում»: 

Բնականաբար, այս բառակապակցությունը ենթադրում է հստակեցում՝ իսկ , այնուամենայնիվ, ու՞մ է վստահում: Դե, Մխիթարը, նույն ինքը՝ ՍԴ նախագահ Հրայր Թովմասյանին 2 անգամ «շնորհ » արած՝ անդրադարձած երիտքպական Մխիթար Հայրապետյանն է, այսօր ՀՀ ԱԺ Գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նախագահը՝ փաշինյանական կառավարության սփյուռքի նախարարը, մասնագիտությամբ՝ արևելագետ:

Նա նաև՝ «Երիտասարդ քաղաքական գործիչների ասոցիացիա» կազմակերպության հիմնադիրն է և «Քաղաքացիական պայմանագիր» կուսակցության հիմնադիր անդամներից:

Թե՛ նրա կենսագրությունը, թե՝ վերևում նշված մյուս երեքի, հետաքրքիր խորհրդածությունների առիթ են տալիս: Ըստ էության, լայն հասարակությանն այդ անուններից Ռուբեն Ռուբինյանն է, որ հիշեցնում է Լ. Տեր-Պետրոսյանին և ՀՀՇ-ին, քանի որ Ռուբենը կարկառուն ՀՀՇ-ականներից մեկի՝ խորհրդարանի նախկին փոխխոսնակ Կարապետ Ռուբինյանի որդին է: Նա «Քաղաքացիական պայմանագիր» կուսակցության հիմնադիր անդամ է, 2015-2017թթ.՝ վարչության անդամ, և ՔՊ մամուլի խոսնակ: Մասնագիտությամբ՝ «եվրոպագիտության» մագիստրոս: Այսինքն, վստահելիների թվում արդեն իսկ առկա է մի արևելագետ՝ Մերձավոր Արևելքի, Թուրքիայի մասնագետ և մի եվրոպագետ: Ինչ խոսք, դեռևս նրանց արձանագրած հաջողությունները դիվանագիտական ասպարեզում չենք տեսել:
Ներկայումս ԱԺ ամենամեծ՝ ՔՊ խմբակցության ղեկավար Լիլիթ Մակունցին բոլորս նախևառաջ հիշում ենք որպես մշակույթն իր ներսում կրող էության, համենայնդեպս, նա այդպես ներկայացավ հանրությանը, երբ նշանակվեց մշակույթի նախարար: Պարզվում է նրա հայրիկը՝ Կամո Մակունցը նույնպես ՀՀՇական ու ՀԱԿ-ական արմատներ ունի, ավելին, նա 2012 թ ԱԺ ընտրությունների ժամանակ Լեւոն Տեր-Պետրոսյանի ՆՇ Էրեբունու ենթաշտաբի համակարգողն է եղել, ի դեպ, հենց այդ նույն ընտրությունների ժամանակ Լիլիթ Մակունցն էլ Հայ ազգային կոնգրեսի համամասնական ընտրացուցակում 59-րդ հորիզոնականն է զբաղեցրել:

Աշխարհաքաղաքական առումով, Լիլիթ Մակունցը Փաշինյանի կադրային բանկում ամերիկյան ուղղվածության ներկայացուցիչն է, վերջինս, բացի այն, որ անցել է Ֆլետչերի ամառային դպրոցով, և պայմանագրային հիմունքներով աշխատում է Ամերիկյան խաղաղության կորպուսում, նաև բանասիրական գիտությունների թեկնածու է, իսկ թեկնածուական թեզը նրա շատ արդիական թեմա է՝ «Ճշմարտություն» և «կեղծիք» հասկացությունների տարբեր մոտիվացիաները՝ խոսքից մինչև հոգեբանական ներազդեցություն, ընդ որում՝ անգլերեն և հայերեն քաղաքական դիսկուրսների զուգադրությամբ: Ըստ ամենայնի, հեղափոխության առաջնորդ Նիկոլ Փաշինյանը Մակունցի այս թեկնածուականից օգտված պիտի լինի:

Մնաց ԱԺ պատգամավոր, մասնագիտությամբ երկրաբան Հակոբ Սիմիդյանը, որի մասին նախօրեին գրել էին, թե Փաշինյանի ԱԱԾ թեկնածուն է և արդեն թրեյնինգներ է անցնում այդ ուղղությամբ, թեպետ վերջինս կատեգորիկ ժխտել էր այդ լուրը: Նա «Քաղաքացիական պայմանագիր» խմբակցության քարտուղարն է, և ըստ էության, հենց Հակոբ Սիմիդյանն է Փաշինյանի ամենավստահելին , մի տեսակ՝ ընտանեկան վստահելին, քանի որ նա 2009-2012թթ. աշխատել է «Հայկական ժամանակ» օրաթերթում՝ նախ՝ որպես էլեկտրոնային կայքի համակարգողի օգնական, ապա նաև՝ նույն օրաթերթի՝ «Դարասկիզբ» ՍՊԸ տնօրենի տեղակալ:

2012-ից նա ԱԺ պատգամավոր Նիկոլ Փաշինյանի օգնականն է: Հակոբ Սիմիդյանի հայրը՝ Կարապետ Սիմիդյանը նույնպես ՀՀՇ ակունքներում է եղել՝ զբաղեցնելով տարբեր պաշտոններ, հիմնականում՝ ուժային-զինվորական: Եղել է Որսորդ միության նախագահ, կռվել է նաև Ասկերանի գումարտակում, իսկ հրադադարից հետո՝ Լեռնային Ղարաբաղի բանակի վերահսկողության ծառայության պետի պաշտոնն է ստանձնել: Նաև՝ Լաչինում վարժարան է հիմնել և շատերի վկայությամբ՝ բազմաթիվ զինվորների ու մարդկանց օգնել: Այս ամենից զատ պարզվում է՝ մասնագիտությամբ ֆիզիկոս Սիմիդ Կարոն այն մարդն է, ով Փաշինյանին՝ ընդհատակում եղած ժամանակ թաքցրել է իր տանը:

Ահա այսպիսի նեոհհշական վստահելիներ ունի Փաշինյանը:

Աղբյուր` Փաստինֆո