Փաստ ինֆո

ԱԺ նախագահ Արարատ Միրզորյանը գեղեցիկ չի համարել «Իմ քայլը» խմբակցության պատգամավոր Անդրանիկ Քոչարյան՝ ԱԺ նախկին փոխնախագահ Արփինե Հովհաննիսյանին ուղղված ձեւակերպումները։ Այս մասին այսօր՝ հոկտեմբերի 4-ին,ԱԺ-ում պատասխանելով լրագրողների հարցերին ասել է ԱԺ նախագահը։

«Դե տեսեք, կարծում եմ՝ ինչ խոսք, գեղեցիկ չէր ձեւակերպումը, բայց ես կարծում եմ, որ դա ոչ միայն կոնկրետ Անդրանիկ Քոչարյանի դեպքում, մենք տեսնում ենք վերջին ամսիներին Հայաստանում բանավեճի կամ քննադատության մեջ անկախ ո՞ր անձից որ անձի նկատմամբ, մի տեսակ ոչ վայելուչ ձեւակերպումներն, իհարկե, անցանկալի են, կարիք չկա դրանց, կարելի է ավելի բովանդակալի խոսել»,- ասաց Ա.Միրզորյանը։

Օրենսդրի ղեկավարը կոչ արեց քաղաքական գործիչներին՝ քաղաքական բանավեճի ընթացքում պահպանել կոռեկտության սահմանները եւ հարգալից վերաբերմունք դրսեւորելմիմյանց նկատմամբ. «Իմ համոզմամբ, Արփինե Հովհաննիսյանի կողմից Դանիել Իոնիսյանին հիվանդ անվանելը, Արդարադատության նախարարին՝ անուղեղ, դրանք արդեն հիմք չեն տալիս մեկ այլ մարդուն, որ նույն բառապաշարով, նույն ոճով հակադարձել, կարծում եմ, որ տգեղ է»։

Հիշեցնենք, որ 1in.am-ին տված հարցազրույցում Անդրանիկ Քոչարյանը հայտարարել էր. «Արփինե Հովհաննիսյանը պետք է խոսի փաստերով․ իսկ պայմանական կարող է տալ իր մայրիկի և անհայտ հայրիկի անունները»։

Հայտարարությանը հաջորդեցին Քոչարյանին քննադատող, Հովհաննիսյանին սատարող բազմաթիվ հայտարարություններ։ Սոցցանցերում Անդրանիկ Քոչարյանին կոչ արեցին ներողություն խնդրել, նաև հրաժարվել մանդատից։ Քոչարյանի փոխարեն Արփինե Հովհաննիսյանից ներողություն խնդրեցին տղամարդ քաղաքական գործիչներ։ ՀՀԿ փոխնախագահ Արմեն Աշոտյանը հրապարակավ դիմել է ԱԺ նախագահին՝ պահանջելով պատասխանատվության ենթարկել տղամարդավայել պահվածքի և բարոյականության մասին մոռացած Անդրանիկ Քոչարյանին։

Հեղինակ` Հասմիկ Կոշկարյան