Փաստ ինֆո

«Առաջային ռիսկը Նիկոլ Փաշինյանն է. բանակում չծառայածը, որեւէ բանից գաղափար չունեցողն այսօր կարող է լինել գերագույն գլխավոր հրամանատար, դրանից այն կողմ ռի՞սկ».-«Փաստինֆո»-ի հետ զրույցում հայտարարել է ԱԱԾ պետի նախկին տեղակալ Գուրգեն Եղիազարյանը՝ անդրադառնալով այն հնարավոր ռիսկերին, որոնք կարող են բխել ուժային կառույցների՝ մասնավորապես, ԱԱԾ-ի եւ Ոստիկանության ղեկավարներ մարմիններին ներկայացվող պահանջների հնարավոր փոփոխության մասին հարցին։

«Մենք մեր աշխարհագրական դիրքով շրջափակման մեջ ենք գտնվում եւ որոշվում է 25 տարեկան տղայի՝ բառի բուն եւ խորը իմաստով ծծկեր երեխային բերել ԱԱԾ-ն ղեկավարելու։ Սա դավադրություն է մեր անվտանգության նկատմամբ»,-ասել է Գուրգեն Եղիազարյանը։

Հիշեցնենք, խորհրդարանն արդեն իսկ առաջին ընթերցմամբ ընդունել է Ազգային անվտանգության մարմիններում ծառայության մասին» և «Ոստիկանությունում ծառայության մասին» օրենքներում փոփոխություններ կատարելու՝ «Լուսավոր Հայաստանի» առաջարկը, որի համաձայն ԱԱԾ տնօրեն և ոստիկանապետ կարող են նշանակվել բոլոր այն անձինք, որոնք բավարարում են պատգամավորի թեկնածուին ներկայացված պահանջներին: Գործող օրենքով ԱԱԾ տնօրեն կարող է նշանակվել ԱԱԾ այն ծառայողը, որը մինչև նշանակումը այդ համակարգում զբաղեցրել է բարձրագույն խմբի պաշտոն կամ առնվազն 3 տարի զբաղեցրել է գլխավոր խմբի պաշտոն և ունի գնդապետից ոչ ցածր կոչում, իսկ առաջարկվող փոփոխություններով, ԱԱԾ տնօրեն կամ ոստիկանապետ կարող է նշանակվել 25 տարին լրացած, վերջին 4 տարում միայն Հայաստանի քաղաքացի հանդիսացող, վերջին 4 տարում Հայաստանում մշտապես բնակվող և հայերենին տիրապետող յուրաքանչյուր ոք:

Մամուլն ի դեպ, արդեն այսօր հնարավոր թեկնածուների անուն է շրջանառում։ Ըստ մամուլի տեղեկությունների, դիտարկվում է ԱԺ «Իմ քայլը» խմբակցության քարտուղար Հակոբ Սիմիդյանի թեկնածությունը, որը Նիկոլ Փաշինյանի մերձավորագույն շրջապատից է։

Եղիազարյանի խոսքով, Փաշինյանի մտքով անցնում է, որ ցանկացածին կարող է նշանակել ԱԱԾ տնօրեն.«Պատկերացնո՞ւմ եք, այդ 25 տարեկանը պետք է գնա, հավաքի կյանքի բովով անցած 50 տարեկան գնդապետներին եւ սկսի ցանցառի նման դուրս տալ, որովհետեւ ուրիշ բան անել չի կարող՝ համակարգում չի եղել, եթե եղել է՝ մի երկու տարի ընդամենը, եւ առաջին իսկ օրվանից լինելու է խորը անտագոնիզմ։

Բոլոր բաժինների ու վարչությունների պետերը ատելով ատելու են թե նրան, թե իրենց կյանքը, որ ընկել են նրա ձեռքը։ Սա են պատրաստում մեզ համար՝ որպես նվեր»։

ԱԱԾ պետի նախկին տեղակալի խոսքով, դիցուք, ադրբեջանական լրտեսը պետք է գար Հայաստան, հսկայական ջանքեր ու գումար ծախսեր, ստիպեր կամ խաբեր, որ ԱԺ նման օրենք մտներ, ապա ընդունվեր, բայց հիմա դա հարկավոր չէ անել. «Պատկերացնում եք չէ՞ միլոնավոր դոլարներ պետք է ծախսվեր, բայց հիմա դա պետք չէ անել, փաստորեն, լրտեսը մեր մեջ է։ ԱԱԾ-ն շարքից հանելու ամենակարճ ճանապարհն այդ 25 տարեկանին այնտեղ նստեցնելն է՝ որպես ԱԱԾ ղեկավար»։

Անդրադառնալով ԱԱԾ տնօրեն Արթուր Վանեցյանի հրաժարականին, Եղիազարյանն ասաց, որ նա չի դիմացել բոլոր այն հիմարություններին, ինչ նրան կարգադրվում էր։ «Օրինակ, ԱԱԾ-ն պետք է զբաղվի ՀԴՄ-ներով։ Լա՞վ եք պատկերացնում, թե դա ինչ է»,-հարցադրմամբ եզրափակեց նա։

Աղբյուր` Փաստինֆո