Փաստ ինֆո

«ԲՀԿ-ն վերահաստատում է այն դիրքորոշումը, որ Հրայր Թովմասյանի լիազորությունները դադարեցնելու խնդիրն ունի բացառապես իրավական բնույթ։ Եթե անգամ այս խնդիրն ունի քաղաքական շարժառիթներ, մենք խնդիրը դիտում ենք զուտ իրավական հարթությունում»,-այս մասին այսօր Սահմանադրական դատարանի նախագահ Հրայր Թովմասյանի լիազորությունները դադարեցնելու նախագծի քննարկման ժամանակ ասաց ԱԺ «Բարգավաճ Հայաստան» խմբակցության պատգամավոր, պետաիրավական հարցերի մշտական հանձնաժողովի անդամ Գևորգ Պետրոսյանը։

Նա անդրադառնալով մեկնաբանություններին, թե ԲՀԿ-ն պաշտպանում է Հրայր Թովմասյանին, ասաց. «Հրայր Թովմասյանը նախ իրեն կարողանում է պաշտպանել որպես իրավաբան և երկրորդը դա չէ մեր խնդիրը։ Բայց ես չհասկացա, պարոն Զոլյան, ո՞ր իրավունքից եք բխեցնում, որ ասում եք կողմ քվեարկեք, որպեսզի ԲՀԿ-ի վարկանիշը բարձրանա։ Դա ասելու բա՞ն է։ Դուք հավատու՞մ եք, որ ԲՀԿ-ի վարկանիշը սրանո՞վ է բարձրանալու։ Մոլորության մեջ եք»։

Պետրոսյանի խոսքերով իր մոտ տպավորություն է, որ կարծես թշնամանքի մթնոլորտ կա, ապա ավելացրեց, որ անիմաստ է լարվածությունը. «Մենք այսօր բոլորս այստեղ նստած ենք հանուն ՀՀ-ի, այստեղ չենք եկել իրար վիրավորելու, այստեղ իրար վիրավորելու տեղը չէ։ Դրա համար չենք եկել, մի ընդունեք թշնամաբար, խնդրում եմ»։

ԲՀԿ պատգամավորը հիշեցրեց, որ ՍԴ դատավոր Վահե Գրիգորյանն ԱԺ ամբիոնից ասել է ՍԴ անդամի ընտրությունը քաղաքական բնույթ ունի։

«Ընկերներ, մոռացե՞լ ենք այս արտահայտությունը, բա եթե քաղաքական բնույթ ունի, այսօր Հրայր Թովմասյանին ինչի ենք մեղադրում քաղաքական կապերի մեջ։ Կամ ասում եք քավոր-սանիկ, մենք ավանդական ժողովուրդ ենք, այս քավոր-սանիկ հարաբերություններն էլ արդեն քաղաքական շահարկումների առարկա դարձրինք»,-ասաց Պետրոսյանն ու ընդգծեց, որ քավոր-սանիկն իրավական կարգավիճակ չէ, իրավական արգելք չկա։

Մանրամասները՝ տեսանյութում

Հեղինակ` Սոնա Գեւորգյան