Փաստ ինֆո

Նորաշեն համայնքի բնակիչները շարունակում են բողոքի ակցիան, բայց այս անգամ՝ Կառավարության շենքի մոտ։ Նրանք պահանջում են, որ Արարատի մարզպետ Գարիկ Սարգսյանը վերանայի իր որոշումը, որով նա համայնքի ղեկավարի ժամանակավոր պաշտոնակատար է նշանակել Արտակ Հարությունյանին։ Բնակիչները ցանկանում են համայնքի ղեկավարի ժամանակավոր պաշտոնակատարի պաշտոնում տեսնել համայնքապետի գործող տեղակալին՝ մինչև ընտրությունները։ Նշենք, որ Արտակ Հարությունյանը՝ ավագանու անդամ է։

Կառավարության շենքի մոտ բողոքի ակցիա իրականացնողների թվում է նաև «Ուժ և իրավունք» ՀԿ նախագահ Ալինա Մախսուդյանը, ով լրագրողների հետ զրույցում հայտնել է, որ համայնքն այս պահին երեք մասի է պառակտված, որոնցից մեկ կողմը ավագանու այն չորս անդամներն են, որոնք կողմ են մարզպետի որոշմանը։ Նրա խոսքով՝ դա նշանակում է, որ այդ չորս անձանց ընտանիքներն էլ են կողմ, իսկ գյուղի մեծամասնությունը ձայն է տվել Նորայր Գրիգորյանին։

Նրա փոխանցմամբ՝ կա նաև չեզոք կողմ։ «Երկու ամիս հետո ընտրություն է։ Այդտեղ ամեն ինչ պարզ կլինի»,- ասաց Մախսուդյանը։ Նրա խոսքով՝ Արարատի մարզում նման դեպք այլևս չի կրկնվի, որովհետև, եթե այս պատմությունը չունենա արդար ավարտ,եթե չվերականգնվի արդարությունը, ապա դա ահազանգ կլինի մյուս համայնքապետերին։ «Բեսպրեդելով գյուղապետ չենք փոխում։ Գյուղապետին փոխում ենք, եթե մարդը ունի ոչ պատշաճ վերաբերմունք իր գյուղի բյուջեի և մնացածի հանդեպ։ Չենք փոխում՝ զուտ անձնական կապերից ելնելով »,- ասաց Մախսուդյանը։

Հեղինակ` Իզաբել Սահակյան