Փաստ ինֆո

Սա վկայում է այն մասին, որ Մարդու իրավունքների եվրոպական դատարանը ընդունում է Սահմանադրական դատարանի լեգիտիմությունը և օրինականությունը։ «Փաստինֆո»-ի հետ զրույցում ասաց սահմանադրական իրավունքի փորձագետ Գոհար Մելոյանը՝ մեկնաբանելով Ռոբերտ Քոչարյանի գործով խորհրդատվական կարծիք ստանալու նպատակով ՄԻԵԴ ներկայացված ՍԴ դիմումը վարույթ ընդունելու մասին ՄԻԵԴ որոշումը։

Գոհար Մելոյանը կարծում է, որ դիմումի վարույթ ընդունումը երկակի նշանակություն ունի։ «Սա առաջին հերթին հավաստվում է, որ այն պնդումները՝ գործող իշխանական թևի և մի շարք այլ իրավաբանների կողմից, որ Ռոբերտ Քոչարյանի վերաբերյալ ՍԴ դիմումը ընթացակարգային խախտմամբ է ուղարկվել ՄԻԵԴ ՝ չի համապատասխանում իրականությանը և ընդամենը հերթական մանիպուլյատիվ առիթ էր ՍԴ-ն վարկաբեկելու համար։ Երկրորդ հերթին սա նշանակում է, որ ՄԻԵԴ-ն ընդունում է ՍԴ լեգիտիմությունը և օրինականությունը»,- նշեց Մելոյանը։ Սահմանադրագետի խոսքով՝ այս երկարատև գործընթացի ընթացքում գործող քաղաքական ուժի կողմից բարձրաձայնվող խնդիրը ևս մեկ անգամ միջազգային կառույցները՝ իրենց գործողություններով հերքում են, այսպես կոչված, ճգնաժամային վիճակը։

«Այսպես նրանք նաև հավաստում են, որ Սահմանադրական դատարանը գործում է միջազգային նորմերին համապատասխան և լեգիտիմ կառույց է, որի հետ իրենք համագործակցում են»,-ասաց Մելոյանը։ Այն հարցին, թե արդյո՞ք ներկայիս գործող քաղաքական ուժի համար սա սպասելի գործընթաց էր, Գոհար Մելոյանը նշեց. «Երբ հայտարարվեց, որ ՍԴ-ն խորհրդատվական կարծիք ստանալու համար դիմում է ներկայացրել ՄԻԵԴ և Վենետիկի հանձնաժողով, շատ տարօրինակ, արհեստական աժիոտաժ սկսվեց գործող քաղաքական ուժի կողմից։ Ինչը բավականին կասկածի տեղիք էր տալիս, որովհետև ամեն դեպքում, կարծում եմ իրենց էլ պետք է ձեռնտու լիներ, որ նման միջազգային հեղինակավոր կառույցը այս գործերի վերաբերյալ կարծիք պետք է հայտներ։ Հատկապես, որ այդ կարծիքն ընդամենը խորհրդատվական բնույթի է լինելու։

Այսինքն՝ դա վերջնական որոշում չի դառնալու։ Դա խորհրդատվական բնույթի եզրակացություն է լինելու, որը ՍԴ-ն կարող է օգտագործել՝ որոշումը կայացնելիս»։ Սահմանադրագետի խոսքով՝ գործող քաղաքական ուժի կողմից ստեղծված աժիոտաժի հիմնական միտումը ՍԴ-ի վերաբերյալ ապատեղեկատվություն տարածելն էր։ Իսկ ինչը վերաբերում է ՄԻԵԴ ուղարկված դիմումների ընթացակարգին, Գոհար Մելոյանը հայտնեց, որ դա նոր ընթացակարգ է, որը հնարավորություն է տալիս մի շարք պետությունների Բարձր դատարաններին խորհրդատվական կարծիք ստանալու նպատակով դիմել միջազգային կառույցներին։ Նրա փոխանցմամբ՝ ՄԻԵԴ կողմից տրվելու է եզրակացություն կոնկրետ գործի վերաբերյալ , որը տեխնիկական ազդեցություն գործի վրա չի ունենալու և այդ խորհրդատվական եզրակացությունը ՍԴ-ն կարող է և՛ հաշվի առնել, և՛ հակառակը ։

Այն հարցին, թե եզրակացությունը, սովորաբար ինչ ժամկետում պետք է հրապարակվի, Գոհար Մելոյանը ասաց, որ ժամկետային սահմանափակումներ չկան։

Հիշեցնենք, որ հուլիսի 18-ին ՀՀ ՍԴ-ն ընդունեց աշխատակարգային որոշումներ՝ «Երևան քաղաքի ընդհանուր իրավասության դատարանի և Ռոբերտ Քոչարյանի դիմումների հիման վրա՝ ՀՀ քրեական օրենսգրքի 300.1-րդ հոդվածի՝ Սահմանադրությանը համապատասխանության հարցը որոշելու վերաբերյալ» գործերով խորհրդատվական կարծիք ստանալու նպատակով ՄԻԵԴ-ին և Վենետիկյան հանձնաժողովին դիմելու և այդ կապակցությամբ հիշյալ գործերի վարույթները՝ մինչև պատասխանները ստանալը, «Սահմանադրական դատարանի մասին» սահմանադրական օրենքի 56-րդ հոդվածի առաջին մասի 5-րդ կետի հիմքով կասեցնելու վերաբերյալ: Հոկտեմբերի 2-ին հայտնի դարձավ, որ ՄԻԵԴ-ն այն վարույթ է ընդունել։

Հեղինակ` Իզաբել Սահակյան