Փաստ ինֆո

«Հրայր Թովմասյանի լիազորությունները դադարեցնելու գործընթացը ՍԴ-ի հեղինակության բարձրացմանն է ուղղված, և ես ցավով եմ նշում, որ ԱԺ-ն է ստիպված լինում զբաղվել ՍԴ-ի հեղինակության բարձրացմամբ»,-այս մասին այսօր «Փաստինֆո»-ի հետ զրույցում ասաց ԱԺ «Իմ քայլը» խմբակցության պատգամավոր Արուսյակ Ջուլհակյանը։

Նա ընդգծեց, որ «Իմ քայլը» ՍԴ դատավոր Վահե Գրիգորյանին ՍԴ նախագահ դարձնելու նպատակ չունի, միակ նպատակը ՍԴ-ն այն տեսքի բերելն է, որն ամրագրված է Սահմանադրությամբ։

Հարցին, եթե ՍԴ դատավորները հավանություն չտան Թովմասյանի լիազորությունները դադարեցնելու նախաձեռնությանը, ի՞նչ քայլեր են ձեռնարկվելու և արդյո՞ք խմբակցությունում քննարկվել է այդ սցենարը, Ջուլհակյանը պատասխանեց. «Այս պահի դրությամբ զերծ կմնամ այս հարցը մեկնաբանելուց։ Եթե ՍԴ-ն որոշի, որ գնում է մերժման ճանապարհով, մեզ համար կարևոր է տեսնել ՍԴ-ի կողմից ներկայացված փաստարկները։ Այդ հիմքերին ծանոթանալուց հետո ավելի բովանդակային մեկնաբանություն կտամ այս հարցի վերաբերյալ»։

Խոսելով ՌԴ նախագահ Վլադիմիր Պուտինի և ՀՀ երկրորդ նախագահ Ռոբերտ Քոչարյանի կնոջ՝ Բելլա Քոչարյանի, երեկ տեղի ունեցած հանդիպման մասին, «Իմ քայլը» պատգամավորը ՌԴ դեսպատունը Ռուսաստանի տարածքը համարեց ու նշեց, որ Պուտինն է որոշում՝ ում հանդիպի իր տարածքում։

«Ես կարդացել եմ լուր, որ հանդիպում է տեղի ունեցել (եթե իհարկե այդպիսին եղել է) ՌԴ դեսպանատանը և ուզում եմ հստակ շեշտել, որ ՌԴ դեսպանատունը, ինչպես նաև ցանկացած երկրի դեսպանատուն, համարվում է այդ երկրի տարածքը, և ես չեմ կարծում, որ հանդիպումը տեղի է ունեցել Հայաստանում, իսկ իր տարածքում պարոն Պուտինի կարող է հանդիպել ցանկացած անձի»,-շեշտեց «Իմ քայլը» պատգամավորը։

Մանրամասները՝ տեսանյութում։

Հեղինակ` Սոնա Գեւորգյան