Փաստ ինֆո

«Սպային հարվածողը հարվածում է ազգին», «Պահանջում ենք արդար քննություն» պաստառներով և վանկարկումներով այսօր Քննչական կոմիտեի շենքի դիմաց բողոքի ակցիա էին իրականացնում «Այլընտրանք» ՀԿ ներկայացուցիչները ՝ դաժանաբար ծեծի ենթարկված փոխգնդապետ Արա Մխիթարյանի հարցի կապակցությամբ։

«Մենք այսօր հավաքվել ենք ՝ պահանջելու արդարություն։ Իրականությունն այն է, որ ձեռք են բարձրացրել սպայի վրա, այն էլ՝ համազգեստով սպայի վրա։ Այսինքն՝ պատահականություն չի եղել, դա եղել է կանխամտածված։ Ձեռք բարձրացնել սպայի վրա նշանակում է՝ ձեռք բարձրացնել պետության, պետականության և ազգի վրա»,- հայտարարեց ակցիայի մասնակիցներից մեկը՝ նշելով, որ պահանջում են արդար քննություն և, որ մեղավորները պետք է կրեն իրենց պատիժը՝ անկախ դիրքից և պաշտոնից։ Նա շեշտեց. «Ցանկացած մարդ՝ ՀՀ քաղաքացի, ով ձեռք կբարձրացնի հայ սպայի վրա՝ ազգի դավաճան է»։ Նրա խոսքով՝ սա խայտառակություն է ՀՀ-ի համար։ «Օրը ցերեկով ձեռք բարձրացնել համազգեստով սպայի վրա՝ չտեսնված բան է։ Սա խայտառակություն է մեր պետության համար»,- ասաց նա՝ հավելելով, որ պատասխանատուները պետք է իրենց պատիժը կրեն։

Ցուցարարների պատվիրակներին ընդունեց ՔԿ Հատուկ հանձնարարությունների, կազմակերպական-վերլուծական և քրեագիտական գլխավոր վարչության պետ Արթուր Մելիքյանը։ Վերջինս վստահեցրեց, որ Արա Մխիթարյանի ծեծի դեպքի առթիվ հարուցված գործը գտնվում է ՔԿ նախագահի անձնական հսկողության տակ։ Արթուր Մելիքյանի խոսքով՝ ՔԿ նախագահի հանձնարարությամբ գործը հանձնարարվել է հատկապես կարևոր գործերի գլխավոր վարչությանը, որտեղ քննվում են յուրահատուկ գործեր, որոնք գտնվում են անձնական հսկողության տակ։ Արթուր Մելիքյանը նշեց, որ գործի տեղափոխումը գլխավոր վարչություն, ունի միայն մեկ նպատակ՝ արագ արձագանք և բոլոր մեղավորների պատասխանատվության ենթարկում։ «Նախորդող օրերին քննիչները եղել են Վայքում, դա էլ պատահական չի։ Դուք ձեր աչքի առաջ տեսնում եք, որ այն, ինչ որ պետք է Վայոց ձորում տեղի քննիչները փորձեին անել, հիմա կատարվում է մի վարչության՝ մարդու դեմ ուղղված հանցագործության մի ամբողջ վարչության ուժերով։ Մի քննիչ չի աշխատում »,- նշեց Մելիքյանը

Աղբյուր` Փաստինֆո