Փաստ ինֆո

«Պաշտպանների ներկայացրած բացարկի միջնորդությունը մերժվել է օրենքի տառի կոպիտ խախտմամբ, քանի որ ՀՀ քրեական դատավարության օրենսգիրքը հստակ սահմանում է, որ նման գործերը պետք է գտնվեն ՀՔԾ տիրույթում և այդ վարույթը պետք է իրականացվի հատկապես ՀՔԾ-ում»,- այսօր ասուլիսի ժամանակ հայտարարեց Դավիթ Սանասարյանի պաշտպաններից Ինեսա Պետրոսյանը՝ նշելով, որ բացարկի մերժմամբ արդեն ակնհայտ էր, որ պարոն Սանասարյանի նկատմամբ ուղղորդված և պատվիրված քննություն պետք է տեղի ունենար ։

Փաստաբանի խոսքով՝ պարոն Սանասարյանը մտել էր մի դաշտ, որտեղ չէին սպասում ՊՎԾ-ին և որոշ անձինք սկսեցին տարբեր պատճառաբանություններով այդ գործն ուղղորդել։ Նրա ներկայացմամբ՝ գործով անցնող մեղադրյալները դիմումներ են ներկայացրել քննիչներին, առանձնատեսակցություններ խնդրել՝ առանց փաստաբանների։ «Այսինքն՝ այդ ձեռագիրն ակնհայտ է։ Սանասարյանի դեմ իրականում գործը սարքվել է, որովհետև երկու-երեք կալանավորված անձինք անընդհատ առանձնատեսակցություն են խնդրել վարույթն իրականացնող մարմնի հետ, չկա որևէ փաստաթուղթ, թե ինչի մասին են իրենք զրուցել և հանկարծ հետո հայտնվում են պարոն Սանասարյանի դեմ ցուցմունքներ։ Այդտեղից երևում է, թե ինչ ուղղորդվածություն է եղել և այդ օրերն ինչպես են օգտագործել»,- ասաց Պետրոսյանը՝ նշելով, որ նպատակը Սանասարյանի լիազորությունների կասեցումն էր, «անհրաժեշտ էր այդ պահին մեկուսացնել Դավիթ Սանասարյանին այն աշխատանքից, որը նա կատարում էր»։

Անդրադառնալով՝ քրեական գործի հիմքերին, նա նշեց, որ քրեական գործը բաղկացած է 29 հատորից, որը հիմնականում պատճենահանված փաստաթղթերով է ծանրաբեռնված, որը քրեական գործի նյութ էլ չի կարող հանդիսանալ և, որ բուն քրեական գործը բաղկացած է մի քանի հատորից։ «Իրենք այսպիսի ծավալ են տվել քրեական գործին, որ տպավորություն ստեղծեն՝ իբրև թե լուրջ քրեական գործ են քննել։ Նման բան գոյություն չունի»,- նշեց պաշտպանը՝ շեշտելով, որ հույս ունեին, որ դատախազությունը այդ ճանապարհով չէր գնա։ «Չնայած՝ հաշվի առնելով, որ առաջին իսկ օրվանից գործը ունեցել է դատախազ։ Այսինքն՝ դատավարական ղեկավարումն իրականացվել է այդ գործով, բայց, այնուամենայնիվ, այս փուլում, երբ մեղադրական եզրակացությունը կազմել և ուղարկել էին դատախազի հաստատմանը՝ մենք լիահույս էինք, որ այդ գործը պարոն Սանասարյանի մասով չի հաստատվի եւ չի ուղարկվի դատարան»,- նշեց Պետրոսյանը՝ մանրամասնելով, որ մյուսներն ընդունում են իրենց մեղադրանքները։

Նրա խոսքով՝ իրենք բողոք են ներկայացրել, սակայն առ այսօր դատախազությունից գրավոր պատասխան չեն ստացել և տեղեկացել են մամուլից, որ մեղադրական եզրակացությունը հաստատվել և ուղարկվել է դատարան։ Նրա խոսքով՝ առ այսօր չեն ստացել պատասխանը ո՛չ պաշտոնավարման վերականգնման վերաբերյալ դիմումի, ո՛չ բողոքի վերաբերյալ։ Հիշեցնենք, որ դատախազը հաստատել էր Պետական վերահսկողական ծառայության լիազորությունները դադարեցրած պետ Դավիթ Սանասարյանի եւ մյուսների գործով մեղադրական եզրակացությունը եւ գործն ուղարկել դատարան: Քրեական գործը մակագրվել էր դատավոր Դավիթ Բալայանին:

Հեղինակ` Իզաբել Սահակյան