Փաստ ինֆո

Տարիներ շարունակ Սորոսի գրասենյակը Հայաստանում ֆինանսավորել է տարբեր ծրագրեր, որոնք ուղղված են եղել մի շարք արժեքների խաթարմանը կամ վերանայմանը։ ՎԵՏՕ հասարակական-քաղաքական շարժման շտապ հավաքի ժամանակ լրագրողների հետ զրույցում ասել է քաղաքագետ Հրանտ Մելիք-Շահնազարյանը:

Նրա խոսքերով՝ գրասենյակի գործունեությունն արշավ էր Հայ Առաքելական եկեղեցու դեմ, և հայկական ավանդական ընտանիքի դեմ, և ուժային կառույցների դեմ։ «Սա պետական տարբեր ինստիտուտներին ավելի վերահսկելի դարձնելու շարժում էր, որը տարիների ընթացքում բավական լուրջ արդյունքներ է տվել և բերել նրան, որ անցած տարվա մայիսին նման շարժումների կողմից ֆինանսավորվող ուժերը կարողացել են Հայաստանում զավթել իշխանությունը», - ասաց քաղաքագետը։ Ըստ նրա՝ ՎԵՏՕ-ի գործունեությունը նպատակաուղղված է պետական ինստիտուտների ուժեղացմանը, ինչպես նաև հայկական արժեքների պահպանմանը, ուստիեւ ինքը եւս մասնակցում է ակցիային

«Վերջին շրջանում լիարժեք աջակցում եմ ՎԵՏՕ-ին, փորձում եմ հնարավորինս մասնակցել ցույցերին՝ ևս մեկ անգամ խոսելու այն վտանգների մասին, որոնք այսօր կան մեր երկրում», - նշեց Հրանտ Մելիք-Շահնազարյանը՝ ընդգծելով, որ պետք է փորձենք հասնել նրան, որ պետությունը, ժողովուրդը, եկեղեցին իրենց արժանի տեղն ու դերն ունենան մեր հասարակության մեջ։

նա մտահոգիչ համարեց եկեղեցին ըուլացնելու քաղաքականությունը, որը նկատելի է Փաշինյանի՝ իշխանության գալուց հետո։

«Իհարկե, Փաշինյանը փորձեց իր առաջին պահի հարձակումը քողարկել դիվանագիտական հայտարարություններով, բայց մենք տեսնում ենք, որ նրա՝ իշխանության գալուց հետո եկեղեցուն թուլացնելու քաղաքականություն է ընթանում։ Առաջին օրենքը, որը Նիկոլ Փաշինյանը ստորագրել է որպես վարչապետ, Վեհափառին պետական պահպանությունից զրկելն էր։ Այսինքն՝ կա եկեղեցին կրոնական այլ կազմակերպությունների հետ մեկ շարքում դասելու մարտավարություն»,- ասաց Հրանտ Մելիք-Շահնազարյանը՝ անդրադառնալով հոգեւորականությանը ծնկի բերելու վերաբերյալ ամերիկյան այցի ժամանակ վարչապետ Փաշինյանի հայտարարությանը։

Աղբյուր` Փաստինֆո