Փաստ ինֆո

Ընդդեմ ՌԴ նախագահ Վլադիմիր Պուտինի այսօր իրականացվել է երկու ակցիա, որոնցից մեկը կառավարության շենքի մոտ, իսկ մյուսը՝ Բաղրամյան 26, որտեղ կողմնակի անձանց մուտքն արգելված էր։ Նշենք, որ ՎԵՏՕ նախաձեռնության մասնակիցներին արգելվել է ակցիա իրականացնել նույն հասցեում կամ մուտք գործել Բաղրամյան պողոտա։

Ընդդեմ Վ. Պուտինի ակցիայի մասնակիցներից «Հելսինկյան ասոցիացիա» ՀԿ փաստաբան Նինա Կարապետյանցը կարծում է, որ իրենց հաջողվել է Բաղրամյան 26-ի դիմաց ակցիա իրականացնել, քանի որ այն մասսայական բնույթ չի կրել։
«Չգիտեմ ինչ է կազմակերպել ՎԵՏՕ-ն, ես չեմ հետևում իրենց գործունեությանը։ Ես բոլոր մյուս քաղաքացիների նման քայլելով բարձրացել եմ դեպի Բաղրամյան պողոտա և ուղղակի վերնաշապիկը հագիս կանգնել եմ այնտեղ իմ պաստառով»,-«Փաստինֆո»-ի հետ զրույցում ասաց Կարապետյանցը։

Նա նշեց, որ ի սկզբանե ակցիային մասնակցել են ինքն ու իր գործընկերուհին, հետո միացել են ևս 2 աղջիկներ։
«Ես իմ գործընկերուհու հետ եմ եղել, մասսայական շարժում չի եղել, որևէ բան չենք վանկարկել, խնդիր չենք առաջացրել, ոստիկանները մեզ առաջարկել են անցնել դիմացի մայթ, մենք համաձայնել ենք, որպեսզի իրենք իրենց աշխատանքն անեն, մեզ ընդամենն անհրաժեշտ էր փոքր ակցիա անել»,-նշեց «Հելսինկյան ասոցիացիա» ՀԿ փաստաբանը։

Զրուցեցինք նաև ՎԵՏՕ շարժման ղեկավար Նարեկ Մալյանի հետ, ով նշեց՝ իր պատկերացմամբ խտրական վերաբերմունք է ցուցաբերվել, և, իր խոսքով, սորոսականներին առավելություն են տվել։

«Այն,, ինչ այսօր տեղի ունեցավ ՎԵՏՕ-ի նկատմամբ դա բոլոր սովորական մահկանացուների նկատմամբ կարող էր տեղի ունենալ, ոստիկանները՝ հղում անելով օրենքին, թույլ չտվեցին գնալ Բաղրամյան 26։ Բայց, քանի որ սորոսականները սովորական մարդիկ չեն Հայաստանում՝ կիսաաստվածներ են, ինչ ուզեն կանեն, կարող են, ասենք, ՍԴ դատավորին քաշքշել, հարձակվել Ալվինա Գյուլումյանի վրա ու որևէ ձևով պատասխանատվության չենթարկվել»,-ասաց Մալյանը։

Նա Պուտինի դեմ ակցիա իրականացնողներին սորոսական է համարեց ու ավելացրեց, որ , սորոսականները ոստիկանին անվանում են «մուսր», «մենթ», «ուլ», ոստիկաններն էլ նրանց նկատմամբ մեծ զիջողությունների են գնում, իսկ մարդիկ, ովքեր հարգում են ոստիկանի ուսադիրները, ստիպված են լինում սահամանափակ իրավունքներից օգտվել։

Անդրադառնալով Կարապետյանցի խոսքերին, թե հնարավոր է խնդիրն ակցիայի համեմատաբար մեծածավալության մեջ է եղել, ՎԵՏՕ ղեկավարն ասաց. «Իրենք ստախոսներ են, ՀՀ-ում ցույցերը, հավաքները կարգավորվում են նույն օրենքով և դրանք իրենցից չեն ենթադրում շատ քանակ կամ քիչ, քանակային կարգավորում չկա՝ մինչև 100 հոգանոց ցույցերի մասին է խոսքը։ Ոստիկանության գնդապետի արգելքը դեպի Բաղրամյան պողոտա բարձրանալու հավասարապես տարածվում է թե՛ նրանց, թե՛ մեր վրա։ Գոյություն ունի օրենք, որը հավասարապես չի գործում իմ նկատմամբ՝ որպես ՀՀ քաղաքացի, և ինչ-որ առավելություն է տալիս սորոսականներին»,-ընդգծեց Մալյանը։

«Փաստինֆո»-ն կապ հաստատեց նաև Ոստիկանության լրատվության վարչություն՝ պարզելու ինչ տրամաբանությամբ են առաջնորդվել. «Բաղրամյան 26-ում ինչ որ քաղաքացիներ՝ անհատներ, մոտեցել են, ինչ-որ պաստառները պարզել և քանի որ տարածքում արարողակարգ է եղել, հեռացել են այդտեղից»,-հայտնեցին «Փաստինֆո»-ին։ Հիշեցնենք, որ խոսքը Վ. Պուտինի դեմ ակցիայի մասին է։
Հարցին,թե ինչու՞ պաստառները չեն առգրավվել ոստիկանության կողմից, ոստիկանության լրատվության բաժնից մեկնաբանեցին հետևյալ կերպ. «Երբ որ տեսել են, այդ պահին նրանք հեռացվել են տարածքից»։

Աղբյուր` Փաստինֆո