Փաստ ինֆո

Եվրոպարտատոմսերի հերթական թողարկմամբ կառավարությունը պարտք վերցրեց նախկին պարտքը փակելու համար։ Խոսքը 500 մլն դոլարի մասին է։ Այն կուղղվի դեռևս 2013թ. տեղաբաշխված պարտատոմսերի առաջին թողարկման հետգնմանը։ 

Պարտք վերցնելը և դրանով եղած պարտքը փակելը բնավ էլ լավագույն լուծումը չէ, ինչքան էլ դա ոգևորել է Նիկոլ Փաշինյանին։ Դա ընդամենը հնարավորություն է` ժամանակավորապես հետաձգելու պարտքի մարումը։ Այն իրականում շարունակում է մնալ և ծանրանալ պետական բյուջեի վրա։ Կառավարությունը դրա դիմաց տոկոսներ է վճարում։

Իհարկե, եվրոպարտատոմսերի նոր տեղաբաշխման եկամտաբերությունն ավելի ցածր է, բայց այն շարունակում է թանկ փող լինել. 4,2 տոկոսը բարձր տոկոս է` անկախ նրանից նախորդ թողարկման համեմատ այն նվազել է, թե ոչ։

Նախկին պարտքը փակելու համար նոր պարտք վերցնելու փոխարեն լավ կլիներ, որպեսզի կառավարությունը մտածեր այն սեփական միջոցների հաշվին մարելու մասին։ Հատկապես, որ իշխանափոխությունից հետո կառավարությունը ժողովրդից թալանված միլիարդավոր դոլարները վերադարձնելու խոստումներ էր տալիս։

Հիշեցնենք, որ մինչև այժմ Հայաստանը իրականացրել էր եվրոպարտատոմսերի ևս երկու թողարկում։ Առաջինը` 2013թ., երբ ներգրավվեց 700 մլն.դոլար, 7 տարի մարման ժամկետով և 6,25 տոկոս եկամտաբերությամբ: Այդ գումարով կառավարությունը ժամկետից շուտ մարեց Ռուսաստանի Դաշնությունից վերցրած 500 մլն.դոլարի վարկը:

Պարտատոմսերի երկրորդ թողարկումն իրականացվեց 2015թ.` 500 մլն դոլար ծավալով, 10 տարի մարման ժամկետով և 7,5 տոկոս եկամտաբերությամբ։ Գումարի մի մասը` 200 մլն դոլարի չափով, ուղղվեց առաջին թողարկման պարտատոմսերի հետգնմանը, իսկ մյուս մասը` պետական բյուջեի ծախսերի իրականացմանը։

Աղբյուր` Փաստինֆո