Փաստ ինֆո

Արարատի մարզը թույլ մարդու տեղ չէ, այստեղ ուժեղ մարդ է պետք։ «Փաստինֆո»-ի հետ զրույցում ասաց «Ուժ և իրավունք» հկ նախագահ Ալինա Մախսուդյանը՝ մեկնաբանելով Արարատի մարզի Նորաշեն համայնքի բնակիչների բողոքի ակցիան, որով բնակիչները պահանջում են՝ վերադարձնել գյուղապետ Նորայր Գրիգորյանին և Արարատի մարզպետ Գարիկ Սարգսյանի հրաժարականը։

Ալինա Մախսուդյանը «Փաստինֆո»-ին հայտնեց, որ Գարիկ Սարգսյանի մարզպետ նշանակվելուց հետո մարզում խնդիրները միայն ավելացել են և մարզի խնդիրները կլուծվեն միայն մարզպետի հեռանալուց հետո։

Նրա խոսքով՝ մարզպետարանը լցված է քեռու տղաներով, մորքուրի հարսներով, փեսաներով։

«Բոլորին աշխատանքից հանում է և տեղավորում իր բարեկամներին»,- նշեց Մախսուդյանը՝ հիշեցնելով Ավշարի դպրոցի դասադուլի դեպքը. «ուզում էր 40 տարվա ուսմասվարին հեռացնել գործից, մորքուրի հարսին դնեին ուսմասվար, մորքուրի հարսի բարեկամուհուն դներ տնօրեն»։

Մեր այն հարցին, թե արդյո՞ք բողոքի ակցիայի մասնակիցներն ունեն Արարատի մարզպետի պաշտոնի համար իրենց թեկնածուն, Մախսուդյանը նշեց.«Շատ կուզեի, որ մարզպետի պաշտոնը նույնպես լիներ ընտրովի պաշտոն, որովհետև ժողովուրդը կընտրեր ու կիմանար, թե ում է ընտրում։ Սա նշանակովի պաշտոն է և վարչապետը պետք է որոշի, թե ում է վստահում, բայց տեսեք՝ վարչապետի վստահած մարդը վարչապետի համար Արարատի մարզում թշնամիներ է շատ արագ հավաքում»։

Ալինա Մախսուդյանը կարծում է, որ Նորաշենի համայնքապետին աշխատանքից ազատելու Գարիկ Սարգսյանի որոշման պատճառը անձնական տիրույթում է։
«Ճիշտ այսպիսի դեպք մեր մարզում եղել է՝ Փոքր Վեդիում, երբ ավագանին դիմել է և՛ մարզպետին, և՛ նախարարությանը, որպեսզի գյուղապետը հրաժարական տա, սակայն պատասխանել են, որ դա հնարավոր չէ։ Իսկ Նորաշենի դեպքում, չգիտես ինչու, դա հնարավոր եղավ, որովհետև գյուղապետը հարցազրույց տվեց, որ ԱԺ ընտրություններին ինքը պաշտպանել է հարևան գյուղի իր ընկերոջ թեկնածությունը, որը նույնպես «Ելք» դաշինքից էր։ Այդ ժամանակվանից էլ նրա և մարզպետի հարաբերությունները լարվել են, որովհետև իրեն չի տվել ձայնը »,- նշեց Մախսուդյանը։

Նրա փոխանցմամբ՝ այդ ամենից հետո մարզպետը կանչել է Նորաշենի արդեն նախկին գյուղապետ Նորայր Գրիգորյանին, որ վերջինս անդամակցի «ՔՊ» կուսակցությանը, իսկ հրաժարվելուց հետո նրանց հարաբերություններն ավելի են վատթարացել։

«Սկսել են գյուղ ուղարկել տարբեր ատյաններից ստուգողներ, որոնք ոչինչ էլ չեն բացահայտել։ Հիմա ունենք այն, ինչ ունենք։ Անձնական բնույթի է եղել »,- ասաց Մախսուդյանը՝ հավելելով, որ գյուղում պառակտումներ են առաջացել.«Այստեղ մարդիկ իրար հետ վիճաբանում են։ Մեր մարզն ընդհանրապես Գարիկ Սարգսյանից հետո շատ ողորմելի վիճակում է»։

Նրա խոսքով՝ ստուգումներ են եղել և ոչ ոք չի էլ փորձել ճշտել, թե գերեզմանների համար նախատեսված հեկտարներով հողատարածքներն ում են վաճառվել 400.000 ՀՀ դրամով։

«Երկու տարի հետո վերավաճառել է 20.000 ԱՄՆ դոլարով։ Այ քեզ քրեական գործ։ Դե բացահայտեք։ Լուրջ գործեր կա բացահայտելու»,- շեշտեց Մախոսուդյանը։

Վերջինիս կարծիքով՝ մարզպետը նախկին գյուղապետի հետ պայմանավորվածություն ունի և ցանկանում է նրան վերադարձնել պաշտոնը։

«Արարատ քաղաքի դեպքում վարչապետն ասաց ընտրողների 50+1 ստորագրություն և ես կստիպեմ, որ հրաժարական տա ձեր համայնքապետը։ Արարատ քաղաքում ստորագրությունները հավաքվեցին։ Երբ վարչապետը եկավ Արարատ քաղաք, անձամբ հանձնեցինք վարչապետին։ Հավատու՞մ եք ՝ մինչև հիմա որևէ պատասխան չկա»,- հայտնեց հկ նախագահը՝ նշելով, որ ասում են՝ դա ընտրովի պաշտոն է և անհասկանալի է, թե ինչու Նորայր Գրիգորյանի դեպքում այդպես չէ։

Հիշեցնենք, որ այսօր վաղ առավոտից Նորաշեն համայնքի բնակիչները բողոքի ակցիա են իրականացնում՝ ի պաշտպանություն իրենց արդեն նախկին գյուղապետ Նորայր Գրիգորյանի՝ պահանջելով Գարիկ Սարգսյանի հրաժարականը։ Նրանք փակել են գյուղապետարանի մուտքը և թույլ չեն տալիս գյուղապետի ժամանակավոր պաշտոնակատարին մուտք գործել աշխատավայր։ Նրանք համոզված են, որ Նորայր Գրիգորյանին համայնքի ղեկավարի պաշտոնից ազատել են անօրինական ճանապարհով։ «Ուժ և իրավունք» հկ նախագահը «Փաստինֆո»-ին հայտնեց, որ ավագանին ապօրինի որոշում է կայացրել՝ 4 ձայնով, որը համարվում է օրենքի խիստ խախտում, որովհետև քվեն ապահովելու համար անհրաժեշտ է առնվազն 5 ձայն և այդ որոշման հիման վրա՝ մարզպետ Գարիկ Սարգսյանը կարգադրություն է ուղարկել Նորաշեն գյուղ՝ գյուղապետի լիազորությունները դադարեցնելու համար։

Հեղինակ` Իզաբել Սահակյան