Փաստ ինֆո

Բերեք հոկտեմբերի 27-ի զոհերի ընտանիքներին էլ տվեք 30 մլն ՀՀ դրամ, հայը եկավ՝ հային սպանեց։ Այսօր  մամուլի ասուլիսի ժամանակ հայտարարեց «Զինվոր» հկ նախագահ Մարգարիտա Խաչատրյանը՝ անդրադառնալով Կառավարության այն որոշմանը, որի համաձայն մարտի 1-ի զոհերի ընտանիքներին պետք է հատկացվի 30 մլն դրամ, իսկ զոհված զինծառայողների ընտանիքներին՝ ոչ։

Տիկին Մարգարիտայի խոսքով՝ մարտի 1-ի ցույցերը կապված էին ընտրության, աթոռակռվի և թալանի հետ, իսկ մարտական գործողությունների ժամանակ զոհված զինծառայողները զոհվել են իրենց պարտքը կատարելիս՝ նշելով, որ արդյո՞ք կարելի է տարբերակել զոհերին։

«Դե բերե՛ք հոկտեմբերի 27-ի զոհերի ընտանիքներին էլ տվեք։ Հայը մտավ՝ հային սպանեց։ Եկե՛ք «Սասնա Ծռեր»-ի սպանվածներին էլ տվեք 30 մլն, բերե՛ք փողոցային կռիվների ժամանակ դանակահարվածներին էլ տվեք։ Արդյո՞ք մենք սխալվել ենք, որ մեր տղերքին դրսից բերել ենք ու ուղարկել ենք ծառայության ու էսօր դիակ ենք ստացել»,- ասաց Մարգարիտա Խաչատրյանը։

Նրա խոսքով՝  այդտեղ ոչ թե իր և այլ զոհված զինծառայողների հարազատների խնդիրն է, այլ այն, որ պետք է բոլորին դաս լինի՝ զորակոչի պահին ինչպես զորակոչում են, այդպես էլ կենդանի վերադարձնեն։

«Եթե կենդանի չեն վերադարձնելու, մեր զոհվածի տեղեկանքը՝ զոհվել է ծառայողական պարտականությունները կատարելուց, մենք իրենց տեղեկանքները հետ ենք տալիս։ Թող տան մեր որդիներին, մեր ամուսիններին, թող աշխատեն՝ մեզ պահեն»,- նշեց Մարգարիտա Խաչատրյանը՝ կոչ անելով, որ սևազգեստ մայրերի քանակը չավելանա։

Ինչը վերաբերում է Կառավարություն ուղարկված դիմումներին, Մարգարիտա Խաչատրյանը նշեց, որ դեռ անպատասխան է մնացել։ Անդրադառնալով՝ Կառավարության շենքի մոտ օրեր առաջ կազմակերպված բողոքի ակցիային և այն արտահայտություններին, որի համաձայն նա գումարի դիմաց է իրականացրել այն, տիկին Խաչատրյանը հայտնեց. « Որոշ մարդիկ Սորոսի գումարներով փորձում են վարկաբեկել տիկին Մարգարիտային, չի ստացվելու»՝ շեշտելով, որ մինչև վերջ պայքարելու է։

Տիկին Մարգարիտայի խոսքով՝ նա միշտ է բարձրաձայնել բանակում առկա խնդիրները։

«Այն ժամանակ ինչու՞ իմ կողքին չէին կանգնում, երբ հարց էի բարձրացնում, որ զինվորը զուգարան չմաքրի, խրամատներում՝ զինվորների սննդի խնդիրը, զինծառայողների ընտանեկան վիճակի խնդիրը»,- ասաց տիկին Խաչատրյանը՝ հավելելով, որ բոլոր խնդիրները օրենսդրական դաշտ է բերվել համակարգող խորհրդի միջոցով։

«Եթե տարածքների խնդիր լինի, ես կոկորդը կկրծեմ այն մարդու, որտեղ իմ տղայի արյունը թափվել է, որ փորձի տարածքների հարց բարձրացնի և իր վարկաբեկիչ բառերով փորձի հողերի խնդիրը լուծի։ Մենք՝ մայրերով, մեր որդիների, մեր ամուսինների կիսատ թողածը մինչև վերջ գնալու ենք՝ լուծում ստանալու։ Եթե 30 մլն հնարավորություն ունենք փողոցային վեճերի համար տալու, ապա 30 մլն-ի հնարավորություն պետք է ունենանք զոհված զինծառայողի ընտանիքներին ապահովելու։ Մենք  մուրացիկներ չենք, մենք հաց հավաքող չենք, մենք իրենց բառերի կարիքը չունենք։ Ունենք փող, տեղը գիտե՞ք փողի, ասում եք՝ փողի խնդիր չունեք, բարի եղեք՝ հիմնադրամի հետ մի կապեք զոհվածի ընտանիքների հետ։ »,- շեշտեց Մարգարիտա Խաչատրյանը։

Մարգարիտա Խաչատրյանը հայտարարեց, որ կսպասեն մինչև Կառավարության հաջորդ նիստը և, եթե արձագանք չլինի, բոլոր մայրերով դուրս կգան պայքարի՝ իրենց արժանապատվությունը վերականգնելու, իրենց որդու ճակատագրերը ղեկավարությանը  հասանելի դարձնելու համար, որ այլևս սևազգեստ մայրերի քանակը չավելանա։

Հեղինակ` Իզաբել Սահակյան