Փաստ ինֆո

Բավական է՝  ներդրողը խորը ուսումնասիրի հարուցված ու կարճված քրեական գործերը, դատական իշխանության սահմանափակման նախադեպերը, իշխանությունների տարանջատման այս լղոզված վիճակը տեսնելով բացասական տրամադրություն կստեղծվի։ «Փաստինֆո»-ի հետ զրույցում այսպիսի կարծիք հայտնեց «Հայացք» վերլուծական կենտրոնի փորձագետ, տնտեսագետ Լիլիա Ամիրխանյանը։

Վերջինս, անդրադառնալով ստեղծված ներքաղաքական իրավիճակին, նկատեց, որ այն բնականաբար իր ազդեցությունը կթողնի ներդրումային դաշտի վրա. «Մի կողմից, իհարկե, այս ամենը կարող ենք դիտարկել կոռուպցիայի դեմ պայքարի, օրինականության հաստատման փաթեթավորման ներքո, սակայն ներդրողի տեսանկյունից այս ամենը միանշանակ լինելու է բացասական, մեզ համար ոչ այնքան ցանկալի տրամադրություն ստեղծող։ Ներդրողի համար մեծագույն նշանակություն ունի նույն դատական համակարգի անկախությունը»,-ընդգծեց տնտեսագետը։

Նա չի բացառում, որ երեկ Երևանի ընդհանուր իրավասության դատարանի դատավոր Աննա Դանիբեկյանի հետ կապված միջադեպի պատճառները ամիսներ առաջ ամենաբարձր մակարդակով արված դատարանի դռները փակելու, դատավորների աշխատանքին խոչընդոտելու թույլտվությունն էր. «Դրա առաջին հետևանքը տեսանք երեկ քաղաքացիների կողմից ոչ օրինական գործողությունների տեսքով։ Այդ ամենը, իհարկե, բացասական հետևանք է թողնում ոչ միայն ներդրումային, այլ առհասարակ մեր երկրի վարկանիշի վրա»,-հավելեց Լիլիա Ամիրխանյանը։

Հեղինակ` Հասմիկ Կոշկարյան