Փաստ ինֆո

Բարձրագույն դատական խորհուրդը ստացել է ՀՀ 2-րդ նախագահ Ռոբերտ Քոչարյանի փաստաբանական խմբի անդամ Հայկ Ալումյանի դիմումը՝ «պատերի տակ վնգստացող» դատավորների ցանկը տրամադրելու վերաբերյալ եւ փաստաբանին կպատասխանի օրենքով սահմանված պատշաճ ժամկետներում։ Այս մասին «Փաստինֆո»-ի հետ զրույցում ասաց ԲԴԽ անդամ Գրիգոր Բեքմեզյանը։ 

Անդրադառնալով նախօրեին Երեւանի ընդհանուր իրավասության դատավոր Աննա Դանիբեկյանի հետ տեղի ունեցած միջադեպին՝ Գրիգոր Բեքմեզյանն ասաց, որ ամբողջությամբ կիսում է ԲԴԽ հայտարարության մեջ արտահայտված տեսակետը։ «Մենք գտնում ենք, որ պետք է բացառել ցանկացած նման դրսեւորում դատավորների նկատմամբ, ուստի նաեւ հետամուտ ենք լինելու, որպեսզի նման գործողություններ կատարողները կրեն համապատասխան պատասխանատվություն՝ օրենքի սահմաններում, միմիայն օրենքի»,-ասաց ԲԴԽ անդամը։

ԲԴԽ հայտարարության մեջ, հիշեցնենք, խոսք է գնում երիտասարդի կողմից դատավորին հոգեբանական ճնշման ենթարկելու, վիրավորելու և նսեմացնելու փորձի մասին: Հարցին, արդյո՞ք նույնքան վիրավորական չէր արտահայտությունը, երբ այն ՀՀ վարչապետ Նիկոլ Փաշինյանն էր հնչեցնում, իսկ ԲԴԽ նախագահ Ռուբեն Վարդազարյանը կրկնում էր՝ Գրիգոր Բեքմեզյանը պատասխանեց. «Հիմա ես չեմ քննարկի վարչապետի ասածը, մենք, կոնկրետ դեպքի հետ կապված, ինչը որ տեսել ենք, դրա վերաբերյալ տվել ենք մեր կարծիքը, մեր վերաբերմունքը եւ մեր դիրքորոշումը»։

Դիտարկմանը, որ դատավոր Դանիբեկյանին հարցեր ուղղած երիտասարդը փաստացի կրկնեց վարչապետ Փաշինյանի ձեւակերպումը, ստացվում է, ձեւակերպումը մի դեպքում վիրավորական չէ, մյուս դեպքում վիրավորակա՞ն է, Գրիգոր Բեքմեզյանը պատասխանեց. «ես համաձայն չեմ Ձեզ հետ։ Երիտասարդի կողմից արված արտահայտությունն ակնհայտորեն վերաբերվում էր դատավորին եւ ակնհայտորեն նպատակ ուներ դատավորին վիրավորելու , գոնե ես, տեսանյութը դիտելիս, այդպես եմ հասկացել՝ կոնկրետ, նպատակադրված, երիտասարդն ուզում էր դատավորին վիրավորել»։

«Փաստինֆո»-ի ճշտող հարցին, թե առհասարակ, դատավորների հասցեին նման ձեւակերպումները ինչպե՞ս է գնահատում, ԲԴԽ անդամն արձագանքեց.«Քանի որ ես դա դիտում եմ որպես քաղաքական հայտարարություն, իսկ ԲԴԽ անդամները քաղաքական հայտարարություններ չպետք է մեկնաբանեն եւ քաղաքականությամբ չպետք է զբաղվեն, ես գտնում եմ, որ այդ հայտարարությունը մեկնաբանելու կամ դրան պատասխանելու խնդիր ես այս պահին չունեմ»

Հիշեցնենք, նախօրեին՝ երեկոյան, 2 երիտասարդ ֆեյսբուքյան ուղիղ եթերով ուղեկցում էին դատավոր Աննա Դանիբեկյանին, երիտասարդներից մեկը հարցեր էր ուղղում դատավորին , թե արդյո՞ք նա իրեն համարում է «դռների տակ վնգստացող դատավոր»։ Դեպքի առթիվ ոստիկանության Շենգավիթի բաժնում հարուցվել է քրեական գործ՝ ՀՀ քրեական օրենսգրքի 343-րդ հոդվածի 3-րդ մասի հատկանիշներով /դատարանի նկատմամբ անհարգալից վերաբերմունք/, երիտասարդները ձերբակալված են։

Նշենք, որ արտահայտության հեղինակը ՀՀ վարչապետ Նիկոլ Փաշինյանն է, որը առաջին անգամ «Ազատություն» ռադիոկայանին տված հարցազրույցում հայտարարեց . «Ներկայիս դատական համակարգը տեր-ստրուկ համակարգ է, և փոխանակ մեկ տարում զբաղվեին ինքնամաքրմամբ, դառնալով արժանապատիվ դատավոր, «տերեր են փնտրում, դռների տակ վնգստում են, որ եկեք մեզ տիրություն արեք, այն ժամանակ մեզ փող էիք տալիս, հաց էիք տալիս, խաշ ու քյաբաբ էիք ուղարկում, բա հիմա մենք մնացել ենք անտեր»։ Երկրորդ անգամ նույն արտահայտությունը կրկնեց սեպտեմբերի 16-ին՝ Վանաձորում կայացած ասուլիսի ժամանակ՝ հայտարարելով. «Այսօր մեր երկրին սպառնացող ամենաապիկար վտանգները բխում են դատական համակարգից, ինչը չի նշանակում, որ Հայաստանի բոլոր դատավորները պատերի տակ վնգստացողներ են, բայց որ կան այդպիսի դատավորներ եւ նրանց մի մասի անունը հայտնի է հանրությանը, կարծում եմ՝ ակնհայտ է»։

Ինչպե՞ս, ՍԴ-ն ինչպես հիմնադրման օրից գործել է, շարունակելու է գործել Հայաստանի ժողովրդի դե՞մ. Նիկոլ Փաշինյան

Աղբյուր` Փաստինֆո