Փաստ ինֆո

ՔԿ նախագահի տեղակալ Արսեն Այվազյանը չի բացառում, որ Ամուլսարի գործով լրացուցիչ կամ կրկնակի փորձաքննություն նշանակվի ։ Այս մասին լրագրողների հետ զրույցում ասել է ՔԿ նախագահի տեղակալ Արսեն Այվազյանը, որը նաև Ամուլսարի գործով քննչական խմբի ղեկավարն է։ Նրա խոսքով՝ Քրեական դատավարության օրենսգիրքը հնարավորություն է տալիս նշանակելու լրացուցիչ փորձաքննություն։

Լրագրողների հետ զրույցում նա նշեց, որ Ամուլսարի վերաբերյալ քրեական գործով նախաքննությունը շարունակվում է՝ հավելելով, որ այս փուլում իրականացվում է քրեական գործի ուսումնասիրություն և պլանավորում՝ հաշվի առնելով, որ նախաքննությունը շարունակվում է և շարունակվելու է առաջիկայում։

«Քրեական գործը շատ դինամիկ է։ Ցանկացած պահի՝ ցանկացած նախադասություն, ցանկացած վիճակ, ցանկացած նոր տեղեկատվություն կարող է պատճառ լինել նախաքննությունը շարունակելու կամ, ինչու ոչ, ընդհուպ մինչև կայացված որոշումները վերանայելու»,- ասաց Արսեն Այվազյանը՝ նշելով, որ անգամ մեկ փաստաթուղթը, անգամ մեկ դատավարական կարծիքը կարող է քրեական գործին որոշակի ընթացք տալ,որոշակի փոփոխություն բերել քրեական գործի ընթացքում։

«Վերջին շրջանում նախաքննության ընթացքում ի հայտ են եկել նոր տեղեկություններ, նոր տվյալներ, որոնցով պայմանավորված անհրաժեշտություն է առաջացել շարունակելու նախաքննությունը» ,- նշեց Այվազյանը։

Արսեն Այվազյանի փոխանցմամբ՝ նախաքննությունը շարունակելու հիմքը ՀՀ  շրջակա միջավայրի նախարարության կողմից ստացված գրությունում առկա նոր տվյալներն են, որոնք անհրաժեշտ է քրեական գործի ընդհանրության մեջ դիտարկել։ Նա հրաժարվեց մեկնաբանել Ընդերքի և շրջակա միջավայրի նախարարի հայտարարությունը, որը վերաբերում է Ամուլսարի գործով տվյալների կեղծմանը։

«Քրեական գործը քննությունն ընթացքի մեջ է։ Մենք կարող ենք ամեն ինչ պարզել։ Այսինքն՝ հնարավոր է ցանկացած զարգացում և ցանկացած տեղեկատվության հաստատել կամ հերքել»,- ասաց ՔԿ նախագահի տեղակալը։

Արսեն Այվազյանը նշեց, որ Ամուլսարի քրեական գործն իր ծավալով և բովանդակությամբ նախադեպը չունեցող գործ է և կան նեղ մասնագիտական խնդիրներ, պետք է դիմեն մասնագետների օգնությանը, ինչը ժամանակատար է։

«Մենք այս փուլում էլ հարցաքննություններ ենք իրականացնում, հետաքննության մարմնին ուղղված հանձնարարություններ ենք տալիս ՝ ՔԴՕ նախատեսված կարգով»,- նշեց Այվազյանը՝ հավելելով, որ, նախաքննության գաղտնիությունը հաշվի առնելով, այս փուլում չցանկացավ հրապարակել։

«Նոր անձինք կան, նոր անձինք կլինեն, նախկինները հնարավոր է, որ նորից հարցաքննվեն»,- նշեց Այվազյանը՝ հավելելով, որ նախկիններին նույնպես կհարցաքննեն, կհարցաքննեն նաև այն մարդկանց, ում նախկինում չեն հարցաքննել։

Նրա խոսքով՝ անգամ մեկ ցուցմունքը կարող է հեղաշրջում անել։ Կատարվում է բազմակողմանի լայնածավալ քննություն՝ տարբեր ուղղություններով։

Հեղինակ` Իզաբել Սահակյան