Փաստ ինֆո

Չնայած Նիկոլ Փաշինյանը առիթը բաց չի թողնում խոսելու գրանցված աշխատողների թվի կտրուկ ավելացման և այդ առումով արձանագրված աննախադեպ ձեռքբերումների մասին, այնուհանդերձ պաշտոնական վիճակագրության ցուցանիշներն այլ բան են ասում։ Դրանց համաձայն, այս տարվա առաջին կեսին հայտարարագրված աշխատողների քանակն ավելի քիչ է աճել, քան 2018թ. նույն ժամանակահատվածում։ 

Եթե անցած տարվա առաջին վեց ամիսների ընթացքում գրանցված աշխատողների քանակը 509,5 հազարից հասել էր 558,6 հազարի կամ ավելացել էր 49,1 հազարով, ապա այս տարվա նույն ժամանակահատվածում ավել գրանցված աշխատողների թիվը չի հասնում նույնիսկ 41 հազարի։ Ընդ որում, անցած տարի հայտարարագրված աշխատողների թվի բավական կտրուկ ավելացում էր տեղի ունեցել հատկապես մինչև իշխանափոխությունը։ Մասնավորապես 2018թ. փետրվար-մարտին գրանցված աշխատողների թիվը համալրվել էր ավելի քան 22,3 հազարով։ Փոխարենը այս տարվա նույն ամիսներին հայտարարագրվել էր լրացուցիչ ընդամենը 8,8 հազար աշխատող։

Ակտիվությունն, իհարկե, ավելի բարձր է եղել դրան հաջորդող շրջանում։ Երկրորդ եռամսյակում հայտարարագրվածների թիվը ավելացել է 32 հազարով։
Պաշտոնական վիճակագրության համաձայն, վերջին մեկ տարվա ընթացքում գրանցված աշխատողների քանակը ավելացել է 42,9 հազարով` հունիսին հասնելով 601,5 հազարի։ Աճը արտահայտվել է բացառապես մասնավոր հատվածում։ Պետական համակարգում զբաղվածների թիվը այդ ընթացքում կրճատվել է ավելի քան 5,2 հազարով։

Աղբյուր` Փաստինֆո