Փաստ ինֆո

Առաջին ատյանի դատարանն ըստ էության թույլ է տվել ակնհայտ և կոպիտ խախտումներ։ Այս մասին լրագրողների հետ զրույցում ասաց ՊԵԿ նախկին նախագահ Գագիկ Խաչատրյանի պաշտպան Երեմ Սարգսյանը։

Նա պնդում է՝ դատարանն իր տրամադրության տակ չունի Քրեական օրենսգրքի  179-րդ հոդվածի 3-րդ մասի 1-ին կետով առաջադրված մեղադրանքի վերաբերյալ բավարար հիմքեր. «Դատարանն ընդհանրապես չուներ փաստական նյութ, որի հիման վրա կարող էր հիմնավոր կասկածի շեմը հաղթահարված համարել։ Եթե դատարանը չունի նյութ կասկածը հաստատված համարելու, ապա ակնհայտ է, որ խախտում է թույլ տվել»,-նկատեց Երեմ Սարգսյանը՝ ավելացնելով, որ անձի ազատության իրավունք է սահմանափակվել։ Այս դեպքում պետք է անձերից վեր կանգնել, սակայն պաշտպանի կարծիքով դատարանը չի կարողացել այդպես վարվել և ընդամենը մեխանիկական որոշում է կայացրել. «Դատարանը մեխանիկական որոշում է կայացրել և այն բոլոր միջնորդություններն ու բողոքները, որ դատարանին մակագրվել են, երևի հատուկ նպատակով նույն դատավորին են մակագրվում, որպեսզի անձը քննի այս բողոքները և կայացնի այն որոշումը, որն ակնկալվում է նրանից»,-ընդգծեց պաշտպանը։

Վերջինս հավելեց, որ դատարաններն այս գործով համատարած կոպիտ խախտումներ են թույլ տալիս և չի բացառվում, որ դրանք արձանագրվեն նաև ՄԻԵԴ-ում։

Երեմ Սարգսյանը տեղեկացրեց, որ Գագիկ Խաչատրյանին կալանավորելու որոշում կայացրած առաջին ատյանի դատարանի դատավոր Արտուշ Գաբրիելյանը թույլ է տվել ակնհայտ խախտում, ինչի համար վերջիններս հաղորդում են ներկայացրել Արդարադատության նախարարին և դատավորների ընդհանուր ժողովի կարգապահական հանձնաժողովին։

Հավելենք, որ Գագիկ Խաչատրյանի ունեցվածքն այժմ կալանքի տակ է։ «Փաստինֆո»-ի փոխանցմամբ Խաչատրյանի պաշտպաններն այդ որոշումը բողոքարկել են։

Աղբյուր` Փաստինֆո