Փաստ ինֆո

Վարչապետը Արթուր Վանեցյանի աշխատանքից գոհ չի եղել։ Այս մասին Կառավարության նիստից հետո ճեպազրույցում հայտարարել է ԱԽ քարտուղար Արմեն Գրիգորյանը՝ անդրադառնալով ԱԱԾ նախկին պետ Արթուր Վանեցյանի պաշտոնից ազատվելուն։ Նա նաև շեշտեց, որ նշանակովի պաշտոններում ընդհանրապես հրաժարականներ չեն լինում։

«Ընտրովի պաշտոններում է հրաժարական լինում։ Նշանակովի պաշտոններում հրաժարական չի լինում, ազատման դիմում է լինում»,- նշեց Գրիգորյանը՝ հավելելով. «Բնականաբար վարչապետն է այդ պաշտոններում նշանակումներ և ազատումներ կատարում և շատ կարևոր է, որ մենք հստակ իմանանք, որ այդ պաշտոններից հրաժարականներ չեն լինում։ Հնարավորինս բաց վարչապետն այս մասին խոսել է և գոհ չի եղել աշխատանքից»։

Անդրադառնալով՝ վարչապետի այն հայտարարությանը, որում ասվել էր, որ Վանեցյանն իր այդ քայլով ուսադիրները նետել է աղբարկղը, ԱԱԽ քարտուղարը նշեց.
«Վարչապետն ինչ ասել է համապատասխանում է իրականությանը»։

Այն հարցին, թե արդյո՞ք Վանեցյանը կարող էր հովանավորչությամբ զբաղվել և այս ընթացքում թաքցնել մարդկանց, ովքեր կոռուպցիոն սխեմաներում ներգրավվածություններ ունեն՝ Արմեն Գրիգորյանը պատասխանեց. «Եթե այդպիսի բաներ լինեն, ես կարծում եմ, իրավապահ մարմինները կզբաղվեն և այս հարցի պատասխանը կտան»։

Ինչ վերաբերում է ԱԱԾ նախկին տնօրենի կողից հնարավոր հեղաշրջում նախապատրաստելուն՝ Ա.Գրիգորյանը նշեց. «Այդպիսի վտանգ ես չեմ տեսել»։
Հարցին, թե ինչու է կայքից հեռացվել Արթուր Վանեցյանի աշխատանքից ազատվելու մասին հայտարարությունը՝ ԱԱԽ քարտուղարը նշեց, որ կայքում նման հրապարակում անելը որևէ ձևով չի համապատասխանում պետական կառավարման սկզբունքներին։

Հիշեցնենք, որ ԱԱԾ տնօրեն Արթուր Վանեցյանը սեպտեմբերի 16-ին հայտարարել էր աշխատանքից ազատվելու մասին։ Հայտարարության մեջ ասվում էր.

«Պետականաշինությունն իր տրամաբանությունն ունի` որոշումների տարերայնությունը, գործողությունների հախուռնությունը, առաջնայինը երկրորդականից, իսկ անցողիկը մնայունից չտարբերելու գործելաոճն այն ճանապարհը չէ, որը տանում է դեպի նպատակների իրականացում։ Այն ընդհանուր ոչինչ չունի սպայի արժանապատվության հետ. սպայի ուսադիրն ու զարգացումների նման ընթացքն անհամատեղելի են։ Իմ հրաժարականը թող լինի «Կանգ ա՛ռ»-ի սթափեցնող քայլ, մնացած բոլոր տարբերակներում կհաղթանակի հայրենիքի հանդեպ պարտքը: Խաղաղություն ու անվտանգություն մեր երկրին»։

Նույն օրը ՀՀ նախագահն ստորագրել է Արթուր Վանեցյանին ԱԱԾ տնօրենի պաշտոնից ազատելու մասին հրամանագիրը։

Հեղինակ` Իզաբել Սահակյան