Փաստ ինֆո

«Վարչապետի ժամանակը կանգ է առել անցած տարվա մայիսին, կանգ է առել ու վերջ։ Նրա մոտ չկա ընկալում, որ կա երկիր, կա պետություն, կա նրա զարգացման խնդիր , կա սեփական հանրությունը կոնսոլիդացնելու, ոչ թե ամեն օր նոր բաժանարար գծեր գծելու խնդիր, այդ ամենը չկա, ժամանակը կանգ է առել»,- «Փաստինֆո»-ի հետ զրույցում ասաց քաղաքագետ Կարեն Բեքարյանը՝ անդրադառնալով վարչապետ Փաշինյանի՝ ՄԱԿ-ում ունեցած ելույթի ներքաղաքական շեշտադրումներին։

Բեքարյանի խոսքով, ՄԱԿ-ի ամբիոնը բացառություն չէ, Փաշինյանն ամեն անգամ հանրային խոսքում հեղափոխության մասին է խոսում, ինչը բնութագրում է նրա հոգեվիճակը։ Բայց, ըստ քաղաքագետի, կա նշվածից ավելի բարդ խնդիր. «Երբ Փաշինյանը առանց որեւէ օբյեկտիվ հիմքի, խոսում է իրեն խանգարողների մասին, կարծես ստեղծում է նախադրյալներ, որ պետք է լինեն գործողություններ, որոնցից դու փորձում ես նախապես ապահովագրված լինել դրսում։ Եթե մենք սա դիտարկենք բոլոր ռեպրեսիաների եւ հարուցվող քրեական գործերի շարքում , սա կարող է ուղղակի առնչություն ունենալ այդ գործընթացի հետ»,- ասաց նա։

Կարեն Բեքարյանը շեշտում է՝ ՄԱԿ-ում ունեցած ելույթի՝ այդքան մեծ հատվածը տրամադրել թավշյա հեղափոխությանը եւ տարաբնույթ պոպուլիստական ճառերին, նորմալ չէ երկրի ղեկավարի համար։

Հիշեցնենք, ՄԱԿ-ի ամբիոնից Նիկոլ Փաշինյանը հայտարարել է. «Ժողովրդավարական բարեփոխումների նկատմամբ երկրի ներսում կա որոշակի դիմադրություն նախկին կոռումպացված վերնախավի կողմից, որը փորձում է խոչընդոտել նոր կառավարության որդեգրած կոռուպցիայի դեմ զրո հանդուրժողականության քաղաքականությանը: Նրանք փորձում են խուսափել արդարադատությունից՝ օգտագործելով իրենց ֆինանսական ռեսուրսները եւ մարտահրավեր նետելով մեր ժողովրդավարական նվաճումներին և ժողովրդավարական եղանակով ընտրված Հայաստանի կառավարությանը, որը չի իրականացրել գույքի եւ սեփականության վերաբաշխում»:

Փաշինյանը նաեւ հայտարարել է. «Անցյալ տարի տեղի ունեցած իրադարձությունների արդյունքում միջազգային ԶԼՄ-ները Հայաստանն անվանեցին համաշխարհային ժողովրդավարության հույս: Ի գիտություն ընդունելով մեր ժողովրդավարական նվաճումները՝ The Economist-ը Հայաստանը հռչակեց տարվա երկիր»:

Աղբյուր` Փաստինֆո