Փաստ ինֆո

Չեմ կարծում, թե ողջամիտ է ցանկացած քրեական գործով մեղադրանքի կամ որպես մեղադրյալ ներգրավելու գործընթացին հաղորդել բարոյականության շղարշ,- հայտարարել է ԱԺ «Իմ քայլը» խմբակցության պատգամավոր Հայկ Կոնջորյանը՝ արձագանքելով ՀՀ պաշտպանության նախկին նախարար Վիգեն Սարգսյանի հայտարարությանը։

Հիշեցնենք, որ երեկ ՔԿ-ն հայտարարություն տարածեց, որ զինծառայողների բնակարանային ապահովման ընթացքում առերեւույթ չարաշահումների թույլ տալու գործով տվյալներ են ձեռք բերվել ՀՀ պաշտպանության նախկին նախարար Վիգեն Սարգսյանին որպես մեղադրյալ ներգրավելու համար եւ գործն ուղարկել են ՀՔԾ, ինչին որոշ ժամանակ անց արձագանքեց Վիգեն Սարգսյանը՝ նշելով, որ մամուլից է իմացել իրեն մեղսագրվող գործողությունների մասին՝ այն գնահատելով բարեվարքության կանոնների խախտում։
Ըստ պատգամավորի՝ երբ գալիս է ժամանակը, որպեսզի նախկին կոռումպացված պաշտոնյաներն օրենքի առջև պատասխանատվության ենթարկվեն, գրեթե բոլորն ասում են, թե քաղաքական հետապնդում է։

«Ես կարծում եմ դա անհեթեթ շղարշ է, որով փորձում են պատել իրականությունը։ Մենք և հանրությունը գիտենք, թե Հայաստանում ինչեր են տեղի ունեցել նախկին տարիներին և այժմ նորմալ, իրավական ընթացակարգերով, եթե ի հայտ են գալիս նոր հանգամանքներ և փաստեր, ապա իրավապահ մարմիններն ընթացք են տալիս գործերին»,-այսօր լրագրողների հետ ճեպազրույցում ասաց «Իմ քայլը» պատգամավորը։
Խոսելով ՀՀ պաշտպանության նախկին նախարար Վիգեն Սարգսյանին որպես մեղադրյալ ներգրավելու մասին, Կոնջորյանն ասաց, որ նախորդ իշխանությունների բազմաթիվ ներկայացուցիչներ բանակի և հայրենասիրության անվան տակ զբաղված են եղել կոռուպցիայով ու թալանով։

«Իրենց ճղճիմ գործելաոճը փորձել են թաքցնել հայրենասիրության անվան տակ, ամեն անգամ, երբ հանրությունը կասկած է հայտնել այս կամ այն խնդրի վերաբերյալ»,-ընդգծեց Կոնջորյանը։

Մանրամասները՝ տեսանյութում։

Հեղինակ` Սոնա Գեւորգյան