Փաստ ինֆո

«Վճռաբեկ դատարանը խուսափում է այս գործընթացներում մասնակցություն ունենալ, մինչդեռ իրենից՝ որպես բարձրագույն դատական ատյանի, ակնկալվում էր, որ համարձակություն կունենար, որովհետեւ օրենքի պահանջ էր, որ մեր բողոքները վարույթ ընդունվեին»,-«Փաստինֆո»-ի հետ զրույցում անդրադառնալով Վճռաբեկ դատարանի սեպտեմբերի 20-ի որոշմանը՝ այս մասին ասաց Ռոբերտ Քոչարյանի պաշտպաններից Հովհաննես Խուդոյանը։

Հիշեցնենք, որ ՀՀ Վճռաբեկ դատարանը Լիլիթ Թադեւոսյանի նախագահությամբ սեպտեմբերի 20-ի որոշմամբ մերժել է վարույթ ընդունել Վերաքննիչ քրեական դատարանի՝ 2019 թվականի հունիսի 25-ի որոշման դեմ Ռոբերտ Քոչարյանի պաշտպանների բողոքները։ Վճռաբեկ դատարանն արձանագրել է, որ գործի քննությունն իրականացվել է առկա քրեադատավարական կարգավորումների շրջանակներում, եւ որ բողոքաբերը չի հիմնավորել, որ առերեւույթ առկա են մարդու իրավունքների խախտումներ։

Մեզ հետ զրույցում պաշտպան Հովհաննես Խուդոյանն ասաց, որ Արմեն Դանիելյանի որոշումներում խախտումները բազմաթիվ էին. «Ներկայացված են այն շաբլոն ձեւակերպումները, որ դրվում են Վճռաբեկի վարույթն ընդունելը մերժելու որոշումներում, բայց մեր բողոքներում արձանագրված են բազմաթիվ խախտումներ, այդ թվում՝ այն, որ Վճռաբեկ դատարանն ինքն է դիրքորոշում հայտնել, որ անձը իրավունք ունի իրեն կալանավորելու ակտը առնվազն մեկ աստիճան բողոքարկելու»։

Պաշտպանը հիշեցրեց՝ նոյեմբերի 15 որոշմամբ՝ Վճռաբեկ դատարանը գործը վերադարձրեց Վերաքննիչ դատարան՝ պատճառաբանելով, որ թեեւ նման լիազորություն չունեն, բայց վերադարձնում են, որպեսզի հետագայում, եթե անձը այդ որոշմամբ կալանավորվի, մեկ աստիճան բողոքարկելու իրավունք ունենա. «Բայց այդ բողոքարկման իրավունքը ինչպես նախկինում, այնպես էլ այս դեպքում չի ապահովովվում»,-նշեց Հովհաննես Խուդոյանը։

Հեղինակ` Միլենա Խաչիկյան