Փաստ ինֆո

«Հայաստանի անորոշ ապագան բերել-պարփակել են Մարտի 1-ի գործի «բացահայտման» շրջանակի մեջ ու զբաղված են շոուներով»,- «Փաստինֆո»-ի հետ զրույցում անդրադառնալով Հայաստանի ներքաղաքական իրավիճակին, ասաց 1991-95 թթ ԳԽ պատգամավոր Ալբերտ Բաղդասարյանը: 

Նրա խոսքով, Փաշինյանի՝ ԱՄՆ այցելությունը ցույց տվեց, որ Հայաստանը, իսկապես, դարձավ «իզգոյ» պետություն, որի ղեկավարին ԱՄՆ –ում պետական մակարդակով ոչ մի պաշտոնական հանդիպման չչարժանացրին։ Այս կարեւոր խնդիրները թողած, ըստ Բաղդասարյանի, քննարկում ենք, թե արդյո՞ք, Ռոբերտ Քոչարյանին դատեցին։ «Ամբողջ ազգը լուրջ զբաղված է երկրորդական հարցերով, որոնցից 1-2-ը պարբերաբար գալիս են առաջին պլան եւ դառնում են գերխնդիր։ Ինձ մեծ հարցերն են հետաքրքրում, թե գաղութային իշխանությունը ում հետ է կռիվ անում՝ Պուտինի վերջնական վստահությանը արժանանալու համար, դա հեռանկար չէ Հայաստանի համար»,-նշեց ԳԽ պատգամավորը։

Անդրադառնալով նախկին ոստիկանապետ Հայկ Հարությունյանի հետ կատարվածին եւ դեպքից հետո հանրային օրակարգ նետված մանիպուլյացիոն հարցին, թե ո՞ւմ էր ձեռնտու Մարտի 1-ի գործով կարեւոր վկայի մահը, Ալբերտ Բաղդասարյանն ասաց. «Ո՞ւմ է ձեռնտու հարցը ամենահիմնազուրկն է, ոմանք իրենց դնում են մեծ կրիմինալիստի տեղ եւ հարցին, իրենց կարծիքով սպառիչ պատասխան տալուց հետո, հայտնաբերում են , թե «ով դրդեց ինքնասպանության կամ սպանեց»»։

Ալբերտ Բաղդասարյանը նշեց, որ նման քննարկումները իրավապահ համակարգի նկատմամբ անվստահության արդյունք են. «Ինքս էլ չեմ վստահում իրավապահ մարմիններին եւ ապրել եմ այն ժամանակներում, որտեղ Արծրուն Մարգարյանը ինքնասպան էր լինում ստուգողական կրակոցով՝ կրակում էր իր գլխին, հետո՝ սրտին։ Ես իրավապահ մարմիններին չեմ վստահել 1991 թվականից սկսած։ Ոնց որ գնաս Հյուսիային Կորեայում վստահես Կիմ Չն Ընի ներքին գործերի նախարարին, որը մեկին գնդակահարում է ինչ-որ բանի համար եւ հայտարարում, որ դա անում է արդարության համար, այլ ոչ թե համակարգն ամրապնդելու։ Այնպես, որ հիմա կոնյուկտուրային ինչ ձեռնտու լինի, այն էլ կասի եւ որեւէ բան արժանահավատ չէ։ Ամեն մեկը կշահարկի այդ հարցը իր նպատակներին հասնելու համար, բայց, թե իրականում ինչո՞ւ է պետությունն այն վիճակում, որ մարտի 1-եր են առաջանում, որ Հայկ Հարությունյանը նախարար է դառնում , նրան փոխարինում է Օսիպյանը, կամ Վանեցյանը, կամ ուրիշ ԿԳԲ-ական, դա հանրությանը չի հուզում։ Փաշինյանը ԱՄՆ-ում ինչ շոուներ սարքեց, դա հետաքրքիր չէ»։

Դիտարկմանը, թե վկաների մասին խոսելիս շատերը մոռանում են օրինակ գեներալ Մանվել Գրիգորյանին, որն այսօր աննախանձելի վիճակում է, Ալբերտ Բաղդասարյանն ասաց.«Մանվել Գրիգորյանը պետք է իմանար, որ այդ ավտորիտար համակարգը, որը իրեն վստահում էր իշխանությունը եւ նա բեսպրեդել էր անում, կփոխվի եւ իրեն կպատժեն եւ այսօրվա բեսպրեդել անողներն էլ պետք է իմանան, որ վաղը տերերը կփոխվեն եւ իրենց կպատժեն։ Ավտորիտար ռեժիմներն այդպիսին են, այսօրվա իրեն լավ զգացողը վաղը կարող է իրեն շատ վատ զգալ, ինչպես Ռոբերտ Քոչարյանն էր իրեն շատ լավ զգում, հիմա Նիկոլ Փաշինյանն է իրեն շատ լավ զգում, առաջիկայում շատ վատ կզգա եւ այդպես շարունակ»։

Ալբերտ Բաղդասարյանի խոսքով, իրականում «Մարտի 1» գոյություն չունի, այն հետեւանք է, նույնպիսի, ինչպիսին եղել են 1996 թվական սեպտեմբերի 26-ը, դրանից առաջ՝ 2004 թվականի ապրիլի 6-ը, 1994 հուլիսը։ Ըստ Բաղդասարյանի իրականում պետք է կենտրոնանալ ոչ թե հետեւանքների, այլ պատճառների վրա։ Քննարկումները պետք է ընթանան համակարգափոխության դաշտում, մինչդեռ դա ձեռնտու չէ «գաղութի տերերին եւ սպասարկողներին»։

«Ի՞նչն է փոխվել, Հայաստանում բացի Նիկոլ Փաշինյանից, ուրիշ որոշող կա՞, Սերժ Սարգսյանի ժամանակ բացի Սերժ Սարգսյանից ուրիշ որոշող կա՞ր, Ռոբերտ Քոչարյանի ժամանակ ուրիշ որոշող կա՞ր, Տեր-Պետրոսյանի ժամանակ ուրիշ որոշող կա՞ր։ Համակարգն է խնդիրը, մեր ժողովրդին բթացրել են ՝ մխրճելով այս հարաբերությունների մեջ»,-շեշտեց մեր զրուցակիցը։

ԳԽ պատգամավորը չի հավատում նաեւ Ամուլսարի հարցով Փաշինյանի հայտարարությանը, թե պետք է գնալ ճշմարտության հետեւից։ «Ինչ ճշմարտության մասին է խոսքը, երբ ինքը հազար փաստարկ բերեց, որ Ամուլսարը չպետք է շահագործվի, ապա այլ հայտարարություններ արեց։ Տեսեք, թե Ամուլսարի հարցում ինչ կոնսոլիդացիա կա՝ քոչարյանականների, սարգսյանականների եւ փաշինյանականների միջեւ , բոլորը դարձել են ճշմարտության հետեւորդներ, իսկ շարքային քաղաքացի՞ն»,-հարցնում է բանախոսը։

Աղբյուր` Փաստինֆո