Փաստ ինֆո

«Հայկ Հարությունյանը հրավիրվելու էր դատարան, ցուցմունք էր տալու  և հարցեր էին հնչելու դատախազների, պաշտպանների, դատարանի կողմից, սակայն դրա հնարավորությունն այլևս չկա»,-այսօր լրագրողների հետ ճեպազրույցում ասաց ՀՀ գլխավոր դատախազ Արթուր Դավթյանը։

Անդրադառնալով մարտի 1-ի գործով Հ. Հարությունյանի նկատմամբ ճնշումների մասին լուրերին, Դավթյանն ասաց. «Վստահ եմ, ցանկացած ողջամիտ մարդ այդ վարկածը լսելուց շատ լավ հասկացել է ինչ պատվերների իրացման մասին է խոսքը»։

Ըստ նրա՝  գլխավոր դատախազը կամ ՀՔԾ պետն որևէ գործով, առանց բացառության չեն կարող առնչվել վկաների հետ, առավել ևս ճնշումներ գործադրել։

«Ինձ ճանաչող ցանկացած մարդ գիտի, որ դա անհնար է, իսկ գլխավոր դատախազի պաշտոնը և՛ իրավական, և՛ բարոյական առումով այդպիսի բան թույլ չի տալիս»,-ասաց Դավթյանը։

Ի պատասխան հարցին,  թե Հայկ Հարությունյանի մահվան դեպքը կարո՞ղ է էական ազդեցություն ունենալ մարտի 1-ի գործի բացահայտման վրա՝ գլխավոր դատախազն ասաց, որ մարտի 1-ի գործի քննությունը շատ ակտիվ իրականացվում է. «Յուրաքանչյուր դետալ, էլ չեմ ասում այսպիսի կարևոր իրադարձություն իր առանցքային նշանակությունն է ունենալու որոշակի վարկածների ընտրության և այդ վարկածներով որոշակի ուղղությամբ գործի քննություն իրականացնելու համար»։

Մանրամասները՝ տեսանյութում։

Հեղինակ` Սոնա Գեւորգյան