Փաստ ինֆո

ՍԴ նախագահ Հրայր Թովմասյանի լիազորությունները դադարեցնելու ԱԺ նախաձեռնած գործընթացը ֆորմալ առումով համապատասխանում է իրավական կարգավորումների տրամաբանությանը, բայց հիմքերը հիմնականում մտնում են քաղաքական տիրույթ։ «Փաստինֆո»-ի հետ զրույցում ասել է սահմանադրական իրավունքի փորձագետ Վարդան Այվազյանը։

«Պետությունն ինքը միասնական ամբողջություն է։ Եթե միասնական ամբողջության մեջ կա որևէ օղակ, որը ճիշտ չի աշխատում, ապա դա անմիջականորեն անդրադառնում է մնացած բոլոր օղակների վրա։ Հիմա հարց եմ տալիս՝ արդյո՞ք ԱԺ բարեփոխման անհրաժեշտություն չունի, արդյո՞ք Կառավարությունը բարեփոխման անհրաժեշտություն չունի։ Արդյո՞ք իրենք իրենց բոլոր առումներով ավելի բարձր են արժեքներով, քան դատական իշխանությունը։ Իհարկե՝ ոչ։ Բնականաբար այս համընդհանուր ամբողջականությունից դատական իշխանության մասն առանձնացնել և փորձել բարեփոխումներ իրականացնել, կարծում եմ՝ դա ճիշտ չի։ Առնվազն բարեփոխում իրականացնողներն էլ՝ որպես գործադիրի նախաձեռնություն, ի դեմս Արդարադատության նախարարության և ԱԺ-ի, որը օրենսդրական ամրագրումներով պետք է իրականացնի։ Դրանք պետք է առնվազն ավելի բարձր պետք է լինեն, քան դատական իշխանությունը և՛ իրենց մտավոր, և՛ մնացած պոտենցիալով, որպեսզի կարողանան։ Բայց դա չկա, գոյություն չունի»,- ասաց փորձագետը՝ անդրադառնալով դատաիրավական համակարգի հիմնախնդիրներին և դատաիրավական բարեփոխումներին։ Նա նաև հավելեց. «Բնականաբար, այս դատաիրավական,այսպես կոչված, բարեփոխումները պետք է միտված լինեն ընդհանրապես պետական իշխանության գործունեության ոչ թե արդյունավետության, այլ՝ հարմարավետության բարձրացմանը»։

Անդրադառնալով՝ Հրայր Թովմասյանի լիազորությունները դադարեցնելու վերաբերյալ, Վարդան Այվազյանը նշեց, որ Հրայր Թովմասյանի իր պաշտոնին գալը եղել է ձևական առումով լիովին իրավական կարգավորումների և ընթացակարգերի շրջանակներում։
«Սակայն բարոյական, տրամաբանական և սահմանադրականության առումով որևէ չափորոշիչի չի համապատասխանել, այլ տեղի է ունեցել՝ Սահմանադրությունը հարմարեցնելու սեփական քմահաճույքին և ուզուրպացրել է, ըստ էության, ՍԴ նախագահի պաշտոնը, որը, մեր գործող սահմանադրական կարգավորումներով առավելագույնը 6 տարի է պաշտոնավարման ժամկետը։ Հիմա ԱԺ-ն նույնպես ձևական առումով, իրավական կարգավորումների առումով, լիովին տեղավորվում է նախաձեռնած ընթացակարգը, բայց այն հիմքերը, որով ուզում են պաշտոնանկ անել, բնականաբար դրանք տրամաբանության և իրավաբանության հետ որևէ աղերս չունեն »,- նշեց սահմանադրագետը։

Իսկ ինչը վերաբերում է Հրայր Թովմասյանի լիազորությունները դադարեցնելու հիմքերին, Վարդան Այվազյանը նշեց, որ Հրայր Թովմասյանի՝ ՍԴ նախագահի պաշտոնին գալը ձևական առումով լիովին համապատասխանել է սահմանադրական և իրավական կարգավորումների ընթացակարգերին, սակայն սահմանադրականության տրամաբանության և բարոյականության հետ որևէ աղերս չի ունեցել։

«Այնպես են նենգափոխել Սահմանադրությունը, որ Հրայր Թովմասյանը մինչև 2035թ լինի ՍԴ նախագահ։ Ըստ էության՝ Սահմանադրության այն դրույթը, որը նախատեսում է ՍԴ նախագահի լիազորությունների ժամկետն առավելագույնը 6 տարի, դարձնել՝ մեռելածին է։ Հիմա նույն կերպ ՝ ձևական առումով ԱԺ նախաձեռնած գործընթացը համապատասխանում է իրավական կարգավորումների տրամաբանությանը, համահունչ է և՛ ՍԴ մասին օրենքն, և՚ ԱԺ կանոնակարգին, բայց հիմքերը, որը ներկայացվել են Հրայր Թովմասյանի լիազորությունները դադարեցնելու համար, տրամաբանության հետ որևէ աղերս չունեն և հիմնականում դրանք մտնում են քաղաքական տիրույթ »,- շեշտեց Այվազյանը՝ ընդգծելով, որ Հրայր Թովմասյանը թիրախավորված է։

Մանրամասները՝ տեսանյութում:

Հեղինակ` Իզաբել Սահակյան