Փաստ ինֆո

«Քանի որ դիվերսիոն ներթափանցման փորձի մանրամասները հայտնի չեն, 2 ենթադրություն կարելի է անել. կամ դա եղել է նախապատրաստված դիվերսիա կամ մեկ կամ մի քանի հոգու կողմից ինքնագլուխ գործողություն է, ինչը Ադրբեջանում խրախուսվում է եւ տեղավորվում է հայատյացության պետական քաղաքականության մեջ»,-«Փաստինֆո»-ի հետ զրույցում ասել է ռազմական փորձագետ Կարեն Վրթանեսյանը՝ անդրադառնալով վերջին օրերին սահմանին տիրող իրավիճակին։

Հիշեցնենք, սեպտեմբերի 22-ին հակառակորդը արցախա-ադրբեջանական հակամարտ զորքերի շփման գծի հարավ-արևելյան հատվածում ուղղությամբ հակառակորդը դիվերսիոն ներթափանցման անհաջող փորձ էր ձեռնարկել ՝ թողնելով մեկ դիակ։ Իսկ այսօր ՊԲ-ից ստացված տեղեկատվության համաձայն, սեպտեմբերի 25-ին՝ ժամը 10:15-ի սահմանում, ՊԲ հակաօդային պաշտպանության ստորաբաժանումների կողմից Ակնայի հատվածում խոցվել է հետախուզական թռիչք իրականացնող հակառակորդի ORBITER-2 տիպի անօդաչու թռչող սարք:

Անօդաչուի թռիչքը Կարեն Վրթանեսյանը պայմանավորում է Հայաստանում ու Արցախում անցկացվող լայնամասշտաբ զորավարժություններով. «Կարծում եմ, սա Ադրբեջանի կողմից շատ ստանդարտ քայլ է եւ նույն կերպ իրենց զորավարժությունների ժամանակ հայկական կողմը պետք է փորձի հետեւել, տեղյակ լինել զորքերի տեղաշարժերից»։

Հարցին, արդյո՞ք այս երկու գործողությունները փոխկապակցված չեն կարող լինել եւ չեն վկայում հակառակորդի ակտիվացման մասին՝ Կարեն Վրթանեսյանը պատասխանել է. «Միտում կարելի է տեսնել, եթե վստահ լինենք, որ դիվերսիոն գործողությունը, որի ընթացքում կորուստ ունեցան, եղել է պլանավորված իշխանությունների կողմից, այլ ոչ թե ինքնագլուխ գործունեություն է եղել»։

Ինչ վերաբերվում է ՀՀ ներքաղաքական իրավիճակի ազդեցությանը արտաքին անվտանգության վրա, ռազմական փորձագետը պատասխանել է.« Հայաստանում ցանկացած անկայունություն, բնականաբար, ի վնաս մեզ է եւ ցանկացած բան, որն ի վնաս մեզ է, բնական է, ՝ հօգուտ հակառակորդի է եւ չկա որեւէ երաշխիք, որ ինչ-որ պահի իրենց մտքով չի անցնի նման մի իրավիճակից օգտվել։ Մենք, ցանկացած դեպքում, անկախ այն բանից, թե աշխարհում ինչ իրավիճակ է, միշտ պետք է պատրաստ լինենք Ադրբեջանի արկածախնդրությանը, որովհետեւ երբ նրանց թվա, թե ինչ-որ հաջողության կհասնեն, թեկուզ մեծ կորուստներով, այդ քայլին կգնան»։

Անդրադառնալով վարչապետ Փաշինյանի այն հայտարարությանը, թե ինքը Հայաստանի առաջին ղեկավարն է, որը պետք է գտնի ԼՂ հիմնախնդրի կարգավորման այնպիսի լուծում, որը կբավարարի թե Հայաստանի, թե Արցախի, թե Ադրբեջանի ժողովուրդներին՝ Կարեն Վրթանեսյանն ասել է. « Հաշվի առնելով Ադրբեջանի առավելապաշտական մոտեցումը, որ Ադրբեջանի համար միակ ընդունելի տարբերակը Ղարաբաղի հանձնումն է Ադրբեջանին, եթե նա հասկանում է դա, այդ դեպքում անհասկանալի է այդ հայտարարությունը, թե ինչի է ասում լուծում, որն ընդունելի է Ադրբեջանի համար , եթե չի հասկանում, կրկին, պրոբլեմ է»։

Միեւնույն ժամանակ ռազմական փորձագետը նշեց, որ իրականում Հայաստանի բոլոր ղեկավարները մշտապես հայտարարել են, որ պատրաստ են փոխզիջումների, ինչը ենթադրում է լուծման մի տարբերակ, որը ինչ-որ առումով նաեւ հակառակ կողմին է բավարարում, այսինքն, փոխադարձ ընդունելի է։

Աղբյուր` Փաստինֆո