Փաստ ինֆո

Hayeli.am և Armlur.am կայքերի գլխավոր խմբագիրները չեն պատրաստվում բացահայտել իրենց տեղեկատվության աղբյուրը։

Հիշեցնենք, որ երկու կայքերն էլ մանրամասներ էին հրապարակել ՀՀ նախկին ոստիկանապետ Հայկ Հարությունյանի մահվան դեպքի մասին, որից հետո ՔԿ-ն հաղորդագրություն էր տարածել և տեղեկացրել, որ խմբագրություններ գրություն է ուղարկվել հոդվածների հեղինակներին պարզելու և գործով պարզաբանման ենթակա հանգամանքների վերաբերյալ նրանց հարցաքննելու համար:

«Փաստինֆո»-ի հետ զրույցում Hayeli.am-ի գլխավոր խմբագիր Անժելա Թովմասյանն ասաց, որ Քննչական Կոմիտեի հետ կապ է հաստատել ու տեղեկացրել, որ օրենքն իրեն թույլ է տալիս սեփական աղբյուրները չբացահայտել, և ինքը չի պատրաստվում ներկայանալ ՔԿ։

«Իրենք հարկ համարեցին գալ ու այդ ամենը գրավոր արձանագրել, վաղը կգան խմբագրություն և նորից նույն պատասխանը կտամ»,-ասաց Թովմասյանը։Վերջինս՝ ՔԿ-ի այս քայլը ճնշում համարեց լրատվականի նկատմամբ, ապա ավելացրեց, որ նախկինում տասնյակ նմանատիպ հրապարակումներ են եղել, սակայն երբևէ հարցաքննության չեն կանչվել։

«Կարող եմ ասել, որ պրիմիտիվ նոր մեթոդներ և ձևեր են բանեցնում, որոնք իրենց համար հստակորեն անարդյունավետ են»,-նշեց Թովմասյանը։
Hayeli.am-ի գլխավոր խմբագրը զավեշտալի որակեց այն հանգամանքը, որ իրենց հոդվածի հրապարակումից 5 րոպե հետո անմիջապես արձագանքել են և հերքել տեղեկատվությւոնը, թե ՀՔԾ-ից և դատախազությունից ճնշումներ կան. «Մենք գրել էինք, որ մահից առաջ Հայկ Հարությունյանն ասել է իր վրա ՀՔԾ-ից և դատախազությունից ճնշումներ կան, անմիջապես դրան արձագանքեցին և հերքեցին, տարօրինակ է, լուրջ չէ, որ 5 րոպե հետո միանգամից հերքում են հրապարակում, ո՞վ կընդուներ որ նման բան կա»։

Գլխավոր խմբագիրը նկատեց, որ եթե նման վաստակ ու ճանապարհ անցած մարդը, որը ոստիկանապետ է եղել, չդիմացավ այդ ճնշումներին, ինչպես կարող է վկան դիմանալ։ «Ինչպե՞ս եք պատկերացնում՝ վկան գնա ողջ իսկությունը ներկայացնի՞, վստահ եմ կրկին այնպիսի ճնշում կբանեցնեն, որ մարդը կամ կհրաժարվի իր ասածից կամ կփորձի հարմարվել իրենց պահանջներին»,- ասաց Ա.Թովմասյանը՝ նշելով, որ տեղեկատվության աղբյուրը չեն բացահայտելու։

Իսկ Armlur.am-ից «Փաստինֆո»-ին տեղեկացրին, որ պաշտոնական ծանուցում նախաքննական մարմնից դեռ չեն ստացել։
«Ծանուցումը կստանանք, կտեսնենք, թե ինչի համար, ինչ կարգավիճակով է նախաքննական մարմինը կանչում հարցաքննության և ըստ այդմ, օրենքով սահմանված կարգով մեր գործողությունները կիրականացնենք»,-մեզ հետ զրույցում ասաց Armlur.am-ի խմբագիր Քնար Մանուկյանը։

Նա ընդգծեց, որ եթե հարցաքննության կանչելու նպատակը տեղեկատվության աղբյուրի բացահայտումն է, ապա սխալ ճանապարհ են ընտրել, քանի որ տարիների ընթացքում իրենք ապացուցել են, որ տեղեկատվության աղբյուրը չեն բացահայտում։
Մանուկյանը հայտնեց, որ նշյալ հոդվածի հեղինակն ինքն է, առանց որևէ խնդրի, առանց կաշկանդվածության՝ նախաքննական մարմնի բոլոր հարցադրումներին պատրաստ է պատասխանել։

«Եթե այս պրոցեսը շարունակական բնույթ կրի, և ամեն հրապարակումից հետո նախաքննական մարմինը գա և ասի աղբյուր բացահայտեք, ըստ էության, սա ԶԼՄ-ի նկատմամբ ճնշում կլինի, քանի որ լրագրողը կաշկանդվածություն կունենա որևէ բան հրապարակելուց»,-ասաց Մանուկյանը։

Ամփոփելով խոսքը գլխավոր խմբագիրն ասաց, անկախ նրանից քրեական գործ կհարուցվի, թե ոչ՝ նախաքննական մարմիններն այս ճանապարհով չեն կարող ճնշել լրատվամիջոցին և լրագրողներին. «Սա առաջին փորձը չէ, որ կայքն ունենում է հրապարակում տարբեր քրեական գործերի հետ կապված, ճանապարհը միանշանակ սխալ է, այդպես լրատվամիջոցին չեն կարող կաշկանդել և աղբյուր բացահայտելու նպատակին չեն կարող հասնել»։

Հեղինակ` Սոնա Գեւորգյան