Փաստ ինֆո

«Փաստինֆո»-ի հաղորդմամբ՝ Երեւանի ընդհանուր իրավասության դատարանում քիչ առաջ մեկնարկեց Մանվել Գրիգորյանի եւ նրա կնոջ՝ Նազիկ Ամիրյանի գործով դատական նիստը։ Նշենք, որ Մանվել Գրիգորյանը նիստին ներկա չէ։

Ներկա են պաշտպաններ Լևոն Բաղդասարյանը, Կարեն Քամալյանը, Արսեն Մկրտչյանը, գործով ամբաստանյալ Նազիկ Ամիրյանը, դատախազ Վահե Դոլմազյանը։

Նախագահող դատավոր Մնացական Մարտիրոսյանը հայտնեց, որ դատարան է ստացվել գրություն, ըստ որի՝ այսօրվա դատական նիստին Մանվել Գրիգորյանը չի կարող մասնակցել՝ ելնելով առողջական վիճակից։ Դատավորը հիշեցրեց, որ նախորդ դատական նիստին պաշտպանները միջնորդություն էին ներկայացրել՝ կապված Մանվել Գրիգորյանի գույքի որոշ մասը արգելանքից հանելու վերաբերյալ, եւ խնդրեց մասնավորեցնել, թե կոնկրետ որ գույքի մասին է խոսքը։

Պաշտպան Լեւոն Բաղդասարյանը թվարկեց 5 հասարակական տարածք՝ Էջմիածին քաղաքում, 1-ը՝ Արմավիրի մարզի այլ համայնքում գտնվող, եւ եւս 1 տաղավար։ Նա նշեց, որ սրանցից 5-ը պատկանում են ֆիզիկական անձի՝ Մանվել Գրիգորյանին, 2-ը՝ իրավաբանական անձանց՝ կազմակերպությունների։ Պաշտպանը տեղեկացրեց, որ նշված տարածքները ցանկանում են հանձնել վարձակալության։

Դատավորը հայտնեց, որ այս պահին անհրաժեշտ է նաեւ դատարան ներկայացնել վարձակալող կազմակերպությունների հետ կնքված պայմանագրերը, ինչպես նաեւ՝ նրանց եւս տեղեկացնել, որ այդ գումարները փոխանցվելու են համապատասխան դեպոզիտային հաշվին։

Պաշտպաններն առարկեցին դատարանի այս հայտարարության դեմ՝ նշելով, որ դա Քրեական դատավարության սահմաններում քննվելիք խնդիր չէ, դա կարգավորված է Քաղաքացիական օրենսգրքով։

Դատախազ Վահե Դոլմազյանը նշեց, որ սկզբւնքորեն չի առարկում միջնորդության դեմ, եթե գույքը տրամադրվում է օգտագործման իրավունքով՝ առանց տնօրինման իրավունքի․ «Կարող է երրորդ անձի հետ կնքվել պայմանագիր, որը առաջին հայացքից լինի քաղաքացիական դաշտում, բայց որոշակի պայմաններում այդ գույքը անցնի այդ երրորդ կազմակերպությանը։ Դատարանը, ինչպես հասկացա, ցանկանում է այդ հնարավոր վարձակալի հետ կնքվող պայմանագրի տեքստի հետ ծանոթանալ հնարավոր վտանգներից խուսափելու համար»,-նշեց նա։

Հեղինակ` Միլենա Խաչիկյան