Փաստ ինֆո

Մարտի 1-ի գործով Զաքար Հովհաննիսյանի սպանության մեջ մեղադրվող ոստիկանության զորքերի շտաբի նախկին պետ Գեղամ Պետրոսյանի նկատմամբ քրեական հետապնդումը դադարեցնելու վերաբերյալ որևէ որոշում դեռևս չի կայացվել։ Այս մասին «Փաստինֆո»-ն տեղեկացավ փաստաբան Վաղարշակ Գևորգյանից։

«Օգոստոսի 4-ին, երբ Գեղամ Պետրոսյանն ազատ արձակվեց, մինչ օրս որևէ քննչական գործողություն տեղի չի ունեցել և նրա վերաբերյալ որևէ դատավարական որոշում չի կայացվել»,-ասաց փաստաբանը՝ ավելացնելով, որ տեղյակ չեն, թե ինչ է կատարվում։

Հարցին ՝ արդյոք համապատասխան միջնորդություն չե՞ն ներկայացրել, փաստաբանն արձագանքեց. «Մտածում էի, որ քննչական գործողություններ տեղի կունենան, որոնց արդյունքում վերջնական որոշում կկայացվի։ Պատրաստվում եմ համապատասխան վարքագիծ դրսևորել և հասկանալ՝ ինչ է կատարվում և ինչ են մտածում Գեղամ Պետրոսյանի նկատմամբ ապօրինի և անհիմն հարուցված մեղադրանքի հետ կապված»,-նշեց Վաղարշակ Գևորգյանը։

Նրա կարծիքով գուցե այս ընթացքում իրականացվել են քննչական գործողություններ, որոնք իրենց հետ առնչություն չեն ունեցել, սակայն վստահ է՝ քրեական հետապնդումը պետք է դադարեցվի. «Պարտավոր են կա՛մ քննչական գործողություններ անել՝ հիմնավորելով դրանք, կա՛մ էլ քրեական գործի վարույթը կարճել։

Չեն կարող չդադարեցնել հետապնդումը, որովհետև այդպիսի ապացույց չեն կարող ձեռք բերել, քանի որ այդպիսի դեպք իրականության մեջ տեղի չի ունեցել»,-ընդգծեց պաշտպանը։

Նշենք, որ Գեղամ Պետրոսյանին Զաքար Հովհաննիսյանի սպանության համար մեղադրանք առաջադրելու մասին հայտարարվեց 2019 թվականի հունիսին եւ կալանավորվեց, սակայն օգոստոսի 4-ին Գեղամ Պետրոսյանը «Երևան-Կենտրոն» քրեակատարողական հիմնարկից ազատ արձակվեց. լրացել էր նրա նկատմամբ որպես խափանման միջոց կալանավորումն ընտրելու երկու ամսվա ժամկետը, որը երկարացնելու միջնորդություն նախաքննական մարմինը՝ ՀՔԾ-ն, դատարան չէր ներկայացրել։

Հեղինակ` Հասմիկ Կոշկարյան