Փաստ ինֆո

Պետական վերահսկողական ծառայության պետ (լիազորությունները ժամանակավորապես կասեցված են) Դավիթ Սանասարյանի պաշտպանական խումբը նրա նկատմամբ հարուցված քրեական հետապնդումը դադարեցնելու միջնորդություն է ներկայացնել դատախազություն։ Այս մասին «Փաստինֆո»-ն տեղեկացավ Դավիթ Սանասարյանի պաշտպան Արսեն Սարդարյանից։

«Սպասում ենք նրանց պատասխանին։ Դեռևս չկա պատասխանը, բայց մոտակա օրերս պետք է լինի։ Այդ է պատճառը, որ հիմա որևէ գործողություն չենք անում։ Դավիթ Սանասարյանը գրել էր, որ կսպասենք Դատախազության դիրքրոշումը կունենանք և ըստ այդմ կորոշվի հետագա գործողությունները»,-ասաց պաշտպանը՝ ավելացնելով, որ ակնհայտորեն չկան քրեական հետապնդում իրականացնելու հիմքեր, բայց արդեն ամիսներ շարունակ իրականացվում է քրեական հետապնդումը։

Արսեն Սարդարյանն ընդգծեց, որ քրեական գործի նյութերն ամբողջ ծավալով ուսումնասիրելուց հետո հասկացել է՝ չկա որևէ ապացույց, որը կարող է փաստել՝ Սանասարյանը հանցագործություն է կատարել. «Ակնհայտ է, որ նույնիսկ ենթադրյալ ապացույցները, օրինակ Սամվել Ադյանի ցուցմունքով, որը փոփոխված է և արժանահավատ չէ, Սանասարյանը որևէ կերպ չի արատավորվում։ Այսինքն այդ ցուցմունքը ոչ միայն չի համապատասխանում մյուս ցուցմունքներին և կեղծ է, այլ նույնիսկ եթե դա հիմք ընդունենք, այդ ցուցմունքով էլ գրվում է, որ Սանասարյանն ազնիվ է եղել»,-հավելեց պաշտպանը։

Նշենք, որ Դավիթ Սանասարյանի գործով նախաքննության ավարտ հայտարարվել էր օգոստոսի 21-ին։ Ավելի վաղ «Փաստինֆո»-ի հետ զրույցում Արսեն Սարդարյանը նշել էր, որ պաշտպանական խումբը 29 հատորանոց գործին ծանոթանալու համար 20 օր է խնդրել։

Հիշեցնենք, որ Դավիթ Սանասարյանին մեղադրանք է առաջադրվել պաշտոնեական լիազորությունները չարաշահելու համար՝ ՀՀ ՔՕ 308-րդ հոդվածի 1-ին մասի հատկանիշներով։ Նրա նկատմամբ որպես խափանման միջոց է կիրառվել չհեռանալու մասին ստորագրությունը։

Սանասարյանի նկատմամբ քրեական հետապնդումը դադարեցնելու վերաբերյալ միջնորդություն պաշտպանական խումբն ավելի վաղ ներկայացրել էր նաեւ նախաքննական մարմնին, ինչը մերժվել էր։

Հեղինակ` Հասմիկ Կոշկարյան