Փաստ ինֆո

Եթե մենք որդեգրել ենք քաղաքականություն, որ մեր երկրում հանցագործ փողեր չպետք է լինեն, սա նաև պետք է ապացուցողական հենք ունենա։ Այսինքն` հայտարարում ես, պետք է նաև ապացուցես, որ իսկապես չկան նման փողեր։ Այս իմաստով ողջամիտ է օրինագիծը շրջանառության մեջ դնել։ «Փաստինֆո»-ի հետ զրույցում այս մասին ասաց ԱԺ «Բարգավաճ Հայաստան» խմբակցության պատգամավոր Սերգեյ Բագրատյանը՝ անդրադառնալով «Բանկային գաղտնիքի մասին» օրենքում փոփոխությունների և լրացումների նախագծին։

Նա նկատեց՝ նախագծի վերաբերյալ առկա է երկու կարծիք. Նախ, որ օրենքի հետ կապված ներդրումային որոշակի խնդիրներ կառաջանան։ Երկրորդ կարծիքը կիսողներն էլ պնդում են՝ եթե գումարները մաքուր են և կեղտոտ փողեր չեն, հետևաբար ինչ խնդիր կա, եթե որևէ քրեական գործի շրջանակներում իրավապահ մարմիններն իրավասություն ունենան դրանք ստուգելու։

Պատգամավորի պնդմամբ խոսքը ոչ թե ընդհանրապես բանկային գաղտնիք հասկացության մասին է, այլ բանկային գաղտնիքի հնարավորությունների որոշակի սահմանափակման. «Կարծում եմ՝ երկու տեսակետն էլ քննարկելու տեղ ունի և այստեղ պետք է ավելի մանրամասն դիտարկել խնդիրը։ Պետք է հատկապես զգույշ լինել ներդրողների հետ, քանի որ նրանք կարող են իսկապես մաքուր գումարներ ունենալ և ցանկություն չունենան, որ այդ մասին տեղեկացվի այլ ընկերությունների կամ հանրությանը»,-ասաց պատգամավորը՝ ընդգծելով, որ հանրային որոշակի տրամադրություններից խուսափելու համար պետք է սահմանափակել այդ գաղտնիքը։

«Եթե կա կոնկրետ գործ և կոնկրետ խնդիր, գերադասելի կլինի դա ոչ թե հանրայնացնել, այլ թողնել տվյալ քրեական գործի շրջանակներում։ Չի բացառվում, որ որևէ ներդրումային ընկերություն զուտ առևտրային գաղտնիքի մասով չցանկանա՝ այդ մասին բարձրաձայնվի և այդ մասին տեղեկացվեն համապատասխան մարմինները»,-նկատեց պատգամավորը՝ հավելելով, որ կարևոր է չվնասել բանկային գաղտնիքի գաղափարը։
Նախագիծն արդյո՞ք կվանի օտարերկրյա ներդրողներին, թե ոչ, պատգամավորը կարծում է՝ կախված է նրանից, թե ինչպես կկիրառվի այն. «Պետք է ավելի դետալացնենք, կարևորենք ներդրումային ընկերությունների շահերը։ Սա դժվար չէ, որովհետև կարող ենք դիմել համապատասխան ընկերություններին և միջազգային փորձագետներին՝ հասկանալու համար արդյոք դրանով կխաթարվի ներդրումների մուտքը հայկական տնտեսություն, թե ոչ և որքանով է դա միջազգային օրենքին համահունչ»,-ասաց Սերգեյ Բագրատյանը՝ նշելով, որ ամեն դեպքում կարող ենք աշխարհում ընդունված չափանիշներին. «Եթե այդ սահմանը չենք անցնում, ինչու՞ ոչ։ Պետք չէ, որ բանկային գաղտնիքը դառնա «սրբազան կով»։ Այսինքն` դրա տակ չթաքնվեն հանցագործ գումարներ»։

Պատգամավորն այժմ փորձում է ուսումնասիրել մեր տարածաշրջանի և նաև եվրոպական երկրների փորձը։ Նրա խոսքով մեզ համար այս պահին կարևոր է տնտեսության մեջ ներդրումներ ներգրավելու հնարավորությունը. «Պետք է հասկանանք՝ ինչպես է, որ բանկային գաղտնիքը և ներդրողը չեն հակադրվում, այլ համադրվում են այդ իրավունքները։ Կարող ենք գալ ճիշտ կոնսեսուսի։ Այժմ ուսումնասիրման փուլում ենք, որից հետո ավելի կուռ տեսությամբ կարտահայտենք մեր կարծիքը»,-հավելեց Սերգեյ Բագրատյանը։

Մանրամասները՝ տեսանյութում

Հեղինակ` Հասմիկ Կոշկարյան