Փաստ ինֆո

«Ամուլսարի հարցով իմ ամենամեծ դժբախտությունն այն է, որ բոլորն արդեն ունեն իրենց տեսակետն անկախ ամեն ինչից։ Մի մասն ասում է՝ Ամուլսարը սար է, ինչ ուզում է լինի, թեկուզ աշխարհը քանդվի, մյուսն մասն էլ ասում է՝ աշխարհն էլ քանդվի Ամուլսարը պետք է շահագործվի»,-ԱՄՆ-ում հրավիրված ասուլիսում ասել է ՀՀ վարչապետ Նիկոլ Փաշինյանը։

«Հիմա դա էկոլոգիական աղե՞տ է, թե՞ էկոլոգիական աղետ չէ։ Այս հարցի պատասխանն ես դե յուրե և դե ֆակտո պետք է ստանամ»,-ասել է Փաշինյանը։
Նա ընդգծել է, որ Ամուլսարի հարցը շատ կարևոր է և՛ տնտեսական, և՛ էկոլոգիական առումներով։

«Ես երբեք չեմ դրել հանքը բացելու կամ չբացելու խնդիր, ես ասել եմ՝ պետք է մինչև վերջ գնամ ճշմարտության հետևից։ Լիդիանի ներկայացուցիչներին էլ ասել եմ՝ եթե պարզվի այն ստանդարտներով, որով դուք ասում եք, հնարավոր է հանքը շահագործել՝ ես ձեզ կաջակցեմ, եթե ոչ՝ բացառված է»,-նշել է ՀՀ վարչապետը։
Նրա խոսքով, պետք է կայացնել տեղեկացված որոշում և ինքը համաձայն չէ, որ կառավարությունը պետք է որոշում կայացնի նրա ցանկությամբ, ում ճնշումն ուժեղ է։

«Ես երբեք ճնշման տակ չեմ գործել ու չեմ գործի, անկախ ամեն ինչից։ Իմ դիրքորոշումը պարզ է, և՛ հայ, և՛ միջազգային հանրության հետ այս հարցում պետք է լինենք ազնիվ, իսկ ազնիվ լինելու համար մինչև վերջ պետք է գնանք ճշմարտության հետևից»,-շեշտել է Փաշինյանը։

Վարչապետը կրկին ընդգծել է՝ այս պահին Ամուլսարի հանքի շահագործումն արգելելու հիմքեր չկան, ապա ավելացրեց, որ կես ժամից հնարավոր է պարզվի այդ դե յուրե հիմքն ի հայտ է եկել։

«Եթե պարզվի ի հայտ է եկել, ոչ մի զգացմունք չունենք, ոչ մի շահագրգռվածություն չկա կփակենք, բայց եթե ի հայտ չգա միայն այն բանի պատճառով, որ Կառավարության վրա ճնշում են գործադրում՝ մենք չենք պատրաստվում այն փակել...»,-ասել է Փաշինյանը։

Մանրամասները՝ տեսանյութում։

Հեղինակ` Սոնա Գեւորգյան